រាជធានីភ្នំពេញ ៖ ក្រុមហ៊ុនធានារ៉ាប់រងអាយុជីវិតបានប្រកាសចូលរួមឧបត្ថម្ភដល់គណៈកម្មការជាតិអូឡាំពិច កម្ពុជា ក្នុងព្រឹត្តិការណ៍ទិវារត់ប្រណាំងអន្តរជាតិពាក់កណ្ដាលម៉ារ៉ាតុងនៅអង្គរវត្តរយៈពេល៥ឆ្នាំ ចាប់ពីឆ្នាំ២០១៥ នេះ រហូតដល់ឆ្នាំ២០១៩ ហើយនៅក្នុងឆ្នាំ២០១៥ នេះដែរ អ្នកចូលរួមរត់ប្រណាំងក្នុងទិវារត់ប្រណាំងអន្តរជាតិពាក់កណ្ដាលម៉ារ៉ាតុងនៅអង្គរវត្តត្រូវរំពឹងថា នឹងមានចំនួនកើនជាងឆ្នាំ២០១៤កន្លង ។
លោកវ៉ាត់ ចំរើន អគ្គលេខាធិការគណៈកម្មការជាតិអូឡាំពិចកម្ពុជា និងជាអនុរដ្ឋលេខាធិការក្រសួងទេសចរណ៍បានមានប្រសាសន៍នៅក្នុងសន្និសីទសារព័ត៌មានមួយកាលពីថ្ងៃទី២៤ តុលា ២០១៥ នៅសណ្ឋាគារ រ៉ាហ្វលឡឺរ៉ូយ៉ាល់ ថា យើងពិតជារីករាយក្នុងការចាប់ដៃគូជាមួយក្រុមហ៊ុនមេនូឡាយហ្វ៍ កម្ពុជា ក្នុងការរៀបចំព្រឹត្តិការណ៍រត់ប្រណាំងអន្តរជាតិពាក់កណ្ដាលម៉ារ៉ាតុងនៅអង្គរវត្ត ។
លោកបន្តថា កីឡារត់ប្រណាំងអន្តរជាតិពាក់កណ្ដាលម៉ារ៉ាតុងនៅអង្គរវត្ត មិនត្រឹមតែក្លាយជាព្រឹត្តិការណ៍ ប្រមូលថវិកាដ៏ធំបំផុតមួយនៅកម្ពុជា ដើម្បីជួយកុមារកំព្រា និងជនពិការប៉ុណ្ណោះទេ តែវាក៏បានដើរតួនាទីយ៉ាងសំខាន់ក្នុងការជួយបង្កើនចំនួនភ្ញៀវទេសចរនៅកម្ពុជាផងដែរ ។
លោកក៏បានបញ្ជាក់ថា កីឡារត់ប្រណាំងអន្តរជាតិពាក់កណ្ដាលម៉ារ៉ាតុង បានរៀបចំឡើងអស់រយៈពេល២០ឆ្នាំមកហើយ និងមានការលំបាកមួយចំនួន ដោយចាប់ផ្ដើមដំបូងនៅឆ្នាំ១៩៩៦ ដែលមានអ្នកចូលរួមប្រមាណពី៤០០ទៅ៥០០នាក់ប៉ុណ្ណោះ ហើយនៅឆ្នាំ១៩៩៧ ដូចយើងដឹងហើយថា មានព្រឹត្តិការណ៍អ្វីកើតឡើងសម្រាប់កម្ពុជាយើង តែនៅក្នុងព្រឹត្តិការណ៍លើកទី២ មានអ្នកចូលរួមពី៦០០ទៅ៧០០នាក់ និងមានជនបរទេសប្រមាណ៣០០នាក់ផងដែរ ។
លោក Robert Elliott អគ្គនាយកប្រតិបត្តិ និងជានាយកចាត់ការទូទៅ ក្រុមហ៊ុនមេនូឡាយហ្វ៍ កម្ពុជា បានមានប្រសាសន៍ផងដែរថា ក្រុមហ៊ុនយើងពិតជាមានមោទនភាពក្រៃលែងក្នុងការឧបត្ថម្ភកីឡារត់ប្រណាំងអន្តរជាតិពាក់កណ្ដាលម៉ារ៉ាតុងនៅអង្គរវត្តកាលពីឆ្នាំមុន ដែលមានអ្នកចូលរួមប្រមាណ៨ពាន់នាក់មកពី៧៨ប្រទេសជុំវិញពិភពលោក ។
លោកបន្តថា សុខុមាលភាព គឺជាការយកចិត្តទុកដាក់យ៉ាងសំខាន់របស់ក្រុមហ៊ុនមេនូឡាយហ្វ៍ ដូច្នេះការគាំទ្រដល់ការរត់ប្រណាំងដែលជួយផ្សព្វផ្សាយអំពីសារសំខាន់នៃសុខភាព គឺជាឱកាសល្អបំផុតសម្រាប់ក្រុមហ៊ុន មេនូឡាយហ្វ៍ ។ ក្រុមហ៊ុនយើងពិតជាមានមោទនភាពក្នុងការកិច្ចព្រមព្រៀងរយៈពេល៥ឆ្នាំ ជាមួយគណៈកម្មការជាតិអូឡាំពិច កាលពីខែកក្កដា ២០១៥ កន្លងមកនេះ ដើម្បីបន្តគាំទ្រព្រឹតិ្តការណ៍នេះ ក្នុងជាអ្នកឧបត្ថម្ភធំសម្រាប់ឆ្នាំ២០១៥ ,២០១៦ , ២០១៧,២០១៨, និងឆ្នាំ២០១៩ ។
គួរបញ្ជាក់ថា ព្រឹត្តិការណ៍ទិវារត់ប្រណាំងអន្តរជាតិពាក់កណ្ដាលម៉ារ៉ាតុង ដែលរៀបចំឡើងនៅលើទឹកដីអង្គរវត្តឆ្នាំនេះ នឹងធ្វើឡើងនៅថ្ងៃទី០៦ ធ្នូ ២០១៥ ហើយរំពឹងថា អ្នកចូលរួមក្នុងព្រឹត្តិការណ៍រត់ប្រណាំងនាឆ្នាំនេះ នឹងមានចំនួនកើនឡើង ៕
ចែករំលែកព័តមាននេះ