ភ្នំពេញ៖ រយៈពេល ៤ខែ ក្នុងឆ្នាំ២០២១ នេះ បាតុភូតខ្យល់កន្ត្រាក់ និងរន្ទះបាញ់ បានបណ្តាលឲ្យមនុស្សបាត់បង់ជីវិត ២០នាក់ និងរបួស ១០នាក់ ព្រមទាំងខូចខាតអគារ និងផ្ទះរាប់ពាន់ខ្នងផងដែរ។ នេះបើយោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះ មហន្តរាយ។
របាយការណ៍ដដែល បានឲ្យដឹងថា បាតុភូតខ្យល់កន្ត្រាក់ និងរន្ទះបាញ់ ក្នុងរយៈពេល ៤ ខែដើមឆ្នាំ២០២១ ភាគច្រើន បានកើតឡើង នៅតាមបណ្ដាខេត្តជាប់ព្រំដែន។ ក្នុងចំណោមមនុស្ស បាត់បង់ជីវិត និងរងរបួសសរុប ៣០ នាក់នោះ មាន ២៤ នាក់ បានរងគ្រោះ ដោយករណីរន្ទះបាញ់ និង ៦ នាក់ទៀត រងគ្រោះដោយខ្យល់កន្ត្រាក់។ ខេត្ត ដែលមានករណីរងគ្រោះថ្នាក់ដោយសារបាតុភូតរន្ទះបាញ់នេះ ភាគច្រើន កើតមាននៅតាមបណ្ដាខេត្ត ក្នុងតំបន់វាលទំនាបកណ្ដាលភាគពាយព្យ និងខេត្តជាប់ជួរភ្នំដងរែក។ ក្នុងនោះ ខេត្តបាត់ដំបង ត្រូវបានគេកត់ត្រាមានស្លាប់ រហូតដល់ ៦ នាក់ និងរបួស ២ នាក់ ដោយករណីរន្ទះបាញ់ គឺច្រើនជាងបណ្ដាខេត្តផ្សេងៗ។
របាយការណ៍ដដែល បានបញ្ជាក់ថា បាតុភូតខ្យល់កន្ត្រាក់ ក្នុងរយៈពេល ៤ ខែដើមឆ្នាំនេះ បានកើតឡើង ចំនួន ៦០ លើក ប៉ះពាល់ខេត្ត ចំនួន ២០ រួមមាន ខេត្តកណ្ដាល កំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ ព្រះវិហារ ក្រចេះ មណ្ឌលគិរី រតនគិរី កំពង់ចាម ត្បូងឃ្មុំ ស្វាយរៀង តាកែវ ក្រុងព្រះសីហនុ កោះកុង កំពង់ស្ពឺ កំពង់ធំ និងខេត្តសៀមរាប។ ក្នុងចំណោមខេត្ត ទាំង ២០ នេះ ខេត្ត បន្ទាយមានជ័យ រងការខូចខាតច្រើនជាងគេ និងបានបង្កឲ្យកុមារាម្នាក់ បាត់បង់ជីវិត និង ៥ នាក់ទៀត រងរបួសធ្ងន់ និងស្រាល ដោយករណីរលំផ្ទះ សង្កត់លើ។ គ្រោះមហន្តរាយនេះ បង្កផលប៉ះពាល់ផ្ទះប្រជាពលរដ្ឋ សរុប ១ ២៥៩ ខ្នង ក្នុងនោះ ផ្ទះតូចធំ ចំនួន ២០៩ ខ្នង បានដួលរលំ រង ការខូចខាតទាំងស្រុង និង ១ ០៥០ ខ្នងទៀត បានប៉ើងរបើកដំបូល ខូចខាតមធ្យម។ លើសពីនេះ បាន បង្កការខូចខាតដំបូលអគារសាលារៀន ចំនួន ១០ អគារ និងអគាររដ្ឋបាលសាធារណៈ ចំនួន ១០ អគារ ផ្សារចំនួន ២ និងតូបលក់ដូរ សរុបជាង ១០០ តូប៕ ទុយ ប៊ុនរី
ចែករំលែកព័តមាននេះ