ខេត្តឧត្តរមានជ័យ៖ តំបន់ទេសចរណ៍ធម្មជាតិទឹកធ្លាក់ក្បាលទន្សោង ត្រូវបានក្រុមការងារយុវជនគណបក្សប្រជាជនកម្ពុជា ស្រុកអន្លង់វែង បានយកចិត្តទុក្ខដាក់អភិវឌ្ឍន៍ក្នុងតំបន់នេះ ដែលស្ថិតនៅចំណុចក្បែរតំបន់ទេសចរណ៍ផ្ទះប៉ុលពត មេដឹកនាំក្នុងរបបកម្ពុជាប្រជាធិបតេយ្យ ឱ្យប្រែក្លាយទៅជាតំបន់រមណីយដ្ឋានទេសចរណ៍ថ្មីមួយដ៏ស្រស់ស្អាត ដើម្បីទាក់ទាញភ្ញៀវជាតិ និងភ្ញៀវអន្តរជាតិ ចូលទស្សនាកម្សាន្តផងដែរ។
លោក ងួន ទ្ធីរិទ្ធ ប្រធានក្រុមការងារយុវជនបក្សស្រុកអន្លង់វែង បានប្រាប់កោះសន្តិភាពថា ស្រុកនេះ ជាស្រុកមួយ ទើបតែបញ្ចប់នូវសង្គ្រាមដ៏រ៉ាំរ៉ៃក្រោយគេបង្អស់ ក្នុងឆ្នាំ១៩៩៨ ដោយមានគោលនយោបាយឈ្នះឈ្នះរបស់សម្តេចអគ្គមហាសេនាបតីតេជោ ហ៊ុន សែន នៃព្រះរាជាណាចក្រកម្ពុជា។
ក្រោយពីបានបញ្ចប់សង្គ្រាមស៊ីវិលក្នុងស្រុក គេបានសង្កេតឃើញកន្លែងទីតាំងមេដឹកនាំធំៗ ក្នុងរបបកម្ពុជាប្រជាធិបតេយ្យ ទីតាំងទាំងនេះ ត្រូវបានប្រជាពលរដ្ឋខ្មែរ និងរាជរដ្ឋាភិបាល ចាត់ទុកថា ជាតំបន់ទេសចរណ៍ប្រវត្តិសាស្ត្រជាច្រើនកន្លែង ក្នុងរបប ៣ឆ្នាំ ៨ខែ ២០ថ្ងៃ ដែលកាប់សម្លាប់ពូជសាសន៍ខ្លួនឯងអស់ជាង ៣លាននាក់។ តំបន់ទេសចរណ៍នេះ ត្រូវបានរក្សាទុកឱ្យកូនខ្មែរជំនាន់ក្រោយ ចងចាំផងដែរ។
លោក ងួន ទី្ធរិទ្ធ បានបញ្ជាក់ថា ទោះក្នុងស្រុកអន្លង់វែង មានតំបន់ទេសចរណ៍ប្រវត្តិសាស្ត្រជាច្រើនកន្លែង ក៏ពិតមែន លោកបានដឹកនាំកំលាំងយុវជន ធ្វើការអភិវឌ្ឍន៍រមណីយដ្ឋានទឹកធ្លាក់ក្បាលទន្សោង ដែលស្ថិតនៅចង្កេះភ្នំដងរែក ក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ឱ្យប្រែក្លាយទៅជាតំបន់ទេសចរណ៍ធម្មជាតិដ៏ស្រស់ស្អាត សម្រាប់ភ្ញៀវជាតិ និងភ្ញៀវអន្តរជាតិ ចូលទស្សនាកម្សាន្ត។ បើយើងធ្វើដំណើរចេញពីទីប្រជុំជនស្រុកអន្លង់វែង មានចម្ងាយ ១៥គីឡូម៉ែត្រ ឆ្ពោះទៅតំបន់រមណីយដ្ឋាននេះ។
ក្នុងការអភិវឌ្ឍន៍តំបន់ទេសចរណ៍រមណីយដ្ឋានទឹកធ្លាក់ក្បាលទន្សោងនេះ ដោយមានការចូលរួមពីទេសរដ្ឋមន្ត្រី គន់ គីម ប្រធានក្រុមការងារបក្ស ចុះជួយខេត្តឧត្តរមានជ័យ ឧបត្ថម្ភ ៤០លានរៀល លោក ព្រហ្ម ផេង ប្រធានកិត្តយស ចុះជួយពង្រឹងស្រុកអន្លង់វែង ៥លានរៀល លោក ប៉ែន កុសល្យ ប្រធានគណៈកម្មាធិការបក្សខេត្ត និងជាអភិបាលនៃគណៈអភិបាលខេត្តឧត្តរមានជ័យ ៥លានរៀល ព្រះតេជគុណ ឡាច លាង អនុគណក្រុងសៀមរាប ៣ពាន់ដុល្លារអាមេរិច លោក ប៉ែន វូយ គណៈកម្មាធិការបក្សខេត្ត ៥លានរៀល និងថវិកាក្រុមការងារយុវជនបក្សស្រុក ៥០លានរៀល រួមទាំងថវិកាយុវជនបក្សឃុំទាំង៥ បានចូលរួមផងដែរ។
ការអភិវឌ្ឍន៍រមណីយដ្ឋាននេះ ចាប់ផ្តើម កាលពីដើមខែកុម្ភៈ ឆ្នាំ២០២១ ដោយបានកសាងកញ្ចុះ សម្រាប់ភ្ញៀវអង្គុយលេងកម្សាន្ត ចំនួន ៦ ធ្វើអំពីឈើដំបូលប្រកក្បឿង និងស្ពានសាងសងអំពីឈើទទឹង ១ម៉ែត្រ ៨តឹក បានប្រវែងចំនួន ៥០០ម៉ែត្រ បានរួចរាល់ផងដែរ ហើយបន្តសាងសង់ រហូតទៅដល់ខែកុម្ភៈ ឆ្នាំ២០២២ ទើបបញ្ចប់ការសាងសង់៕ ឱម សារឿន
ចែករំលែកព័តមាននេះ