រាជធានីភ្នំពេញ ៖ គ្រឹះស្ថានមីក្រូហិរញ្ញវត្ថុ អេ អឹម ខេ ភី អិលស៊ី រៀបចំកម្មវិធីជួបជុំបុគ្គលិកដ៏ធំប្រចាំឆ្នាំរបស់ខ្លួនដែលមានការចូលរួមពីបុគ្គលិកមកពីគ្រប់ខេត្តក្រុងទាំងអស់ប្រមានជាង២.០០០នាក់
រាជធានីភ្នំពេញ ៖ គ្រឹះស្ថានមីក្រូហិរញ្ញវត្ថុ អេ អឹម ខេ ភី អិលស៊ី រៀបចំកម្មវិធីជួបជុំបុគ្គលិកដ៏ធំប្រចាំឆ្នាំរបស់ខ្លួនដែលមានការចូលរួមពីបុគ្គលិកមកពីគ្រប់ខេត្តក្រុងទាំងអស់ប្រមានជាង២.០០០នាក់ ក្នុងគោលបំណងបង្ហាញអំពីសមិទ្ធផលដែល អេ អឹម ខេ សម្រេចបាន និងថ្លែងអំណរគុណដល់បុគ្គលិកគ្រប់ជាន់ថ្នាក់ទាំងអស់ដែលបានខិតខំប្រឹងប្រែងបំពេញការងារយ៉ាងសកម្មក្នុងការរួមចំណែកសម្រេចបានទិសដៅសង្គមរបស់ អេ អឹម ខេ ក្នុងរយៈពេលពេញមួយឆ្នាំកន្លងមក ក៏ដូចជាផ្តល់ឱកាសដល់បុគ្គលិកទាំងអស់បានជួបសំណេះសំណាល ផ្លាស់ប្តូរបទពិសោធន៍ និងរឹតចំណងមិត្តភាពរវាងគ្នាទៅវិញទៅមកផងដែរ។ សិក្ខាសាលានៃការជួបជុំមហាគ្រួសារ អេ អឹម ខេ នេះ រៀបចំឡើងនៅថ្ងៃទី២៤ តុលា ២០១៥ នៅមណ្ឌលសន្និបាត និងពិព័រណ៍កោះពេជ្រ។
ថ្លែងទៅកាន់បុគ្គលិកទាំងអស់ដែលមានវត្តមាននៅក្នុងសិក្ខាសាលាជួបជុំនេះ លោកគា បូរាណ ប្រធាននាយកប្រតិបត្តិរបស់គ្រឹះស្ថានបានមានប្រសាសន៍ថា លោកមានសេចក្តីសោមនស្សរីករាយណាស់ ដោយមើលឃើញថា មហាគ្រួសារ អេ អឹម ខេ កាន់តែរីកចម្រើនជាលំដាប់ តាមរយៈកំណើនបុគ្គលិក ការពង្រីកតំបន់ប្រតិបត្តិការទូទាំងប្រទេស ការបង្កើនផលិតផល និងសេវាមីក្រូហិរញ្ញវត្ថុបន្ថែម និងកំពុងតែដើរនៅលើមាគ៌ាមួយដ៏ត្រឹមត្រូវក្នុងការសម្រេចឲ្យបាននូវបេសកកម្ម និងទស្សនវិស័យរបស់ខ្លួនក្នុងការជួយជ្រោមជ្រែងដល់ប្រជាពលរដ្ឋក្រីក្រឲ្យមានជីវភាពប្រសើរឡើង តាមរយៈការផ្តល់សេវាមីក្រូហិរញ្ញវត្ថុដ៏សម្បូរបែបរបស់ខ្លួន។
លោកប្រធាននាយកប្រតិបត្តិបានគូសបញ្ជាក់ថា សិក្ខាសាលានេះ រៀបចំឡើងក្នុងគោលបំណងធំៗចំនួនបួន គឺ ទី១-ជាការជួបជុំបុគ្គលិកទាំងអស់ទូទាំងប្រទេស ដើម្បីរឹតចំណងសាមគ្គីភាព មិត្តភាពនឹងគ្នាឲ្យកាន់តែប្រសើរថែមទៀត ទី២-ដើម្បីបង្ហាញពីសមិទ្ធផលដែលគ្រឹះស្ថានសម្រេចបានក្នុងឆ្នាំ២០១៥ នេះ ទី៣-ជាឱកាសដ៏ពិសេសមួយដែលបុគ្គលិកទាំងអស់អាចលើកឡើងនូវឧបសគ្គ ឬបញ្ហាដែលជួបប្រទះនៅក្នុងឆ្នាំនេះ និងសំណូមពរផ្សេងៗមកកាន់គណៈកម្មាធិការប្រតិបត្តិ ដើម្បីចូលរួមមតិដោះស្រាយ និងទី៤-ដើម្បីផ្លាស់ប្តូរមតិយោបល់រវាងបុគ្គលិកទាំងអស់ក្នុងការរកយុទ្ធសាស្ត្រសម្រាប់អនុវត្តន៍នាឆ្នាំថ្មី ឆ្នាំ២០១៥ ខាងមុខនេះ។
ក្នុងឱកាសដ៏មហោឡារិកនេះ គណៈកម្មាធិការរៀបចំសិក្ខាសាលា ក៏បានរៀបចំកម្មវិធីពិសេសៗមួយចំនួន ដូចជា ការប្រគល់ពានរង្វាន់ជូនសាខាឆ្នើមក្នុងការអនុវត្តន៍សេវាអតិថិជនល្អបំផុតប្រចាំឆ្នាំ២០១៥ ការប្រគល់លិខិតសរសើរដល់បុគ្គលិកដែលបានបម្រើការងារជាមួយគ្រឹះស្ថានបានជាង១០ឆ្នាំ ការប្រកួតបាត់ទាត់ កម្មវិធីចាប់រង្វាន់ និងពិសារភោជនីយអាហារជាដើម។
សូមបញ្ជាក់ថា គ្រឹះស្ថានមីក្រូហិរញ្ញវត្ថុ អេ អឹម ខេ ភី អិលស៊ី គឺជាគ្រឹះស្ថានមីក្រូហិញ្ញវត្ថុឈានមុខគេលើចំនួនអតិថិជន។ បើគិតមកត្រឹមខែសីហា ឆ្នាំ២០១៥ នេះ អេ អឹម ខេ មានអតិថិជនសរុបជាងសែសិបម៉ឺននាក់ ដែលមាន១៤៣ការិយាល័យ និងភ្នាក់ងារជាង២.៥០០កន្លែង ធ្វើប្រតិបត្តិការគ្របដណ្តប់៨៨% នៃចំនួនភូមិទាំងអស់ទូទាំងប្រទេស។ អេ អឹម ខេ មានផលិតផល និងសេវាកម្មជាច្រើនដាក់ឲ្យអតិថិជនប្រើប្រាស់ ដូចជាផលិតផលកម្ចី ប្រាក់សន្សំ ផ្ទេរប្រាក់ សេវាទូទាត់វិក័យបត្រ ធានារ៉ាប់រងខ្នាតតូច ធនាគារចល័ត បើកប្រាក់បៀវត្សរ៍ ម៉ាស៊ីនដក និងដាក់ប្រាក់ដោយស្វ័យប្រវត្តិ (ATM& CDM)៕
ចែករំលែកព័តមាននេះ