ខេត្តសៀមរាប ៖ កាលពីព្រឹកថ្ងៃព្រហស្បតិ៍ ទី២២ តុលា ក្រុមហ៊ុនប្រេង Ptt បានរៀបចំធ្វើពិធីបើកសម្ពោពសាខាថ្មីដែលមានទីតាំងនៅភូមិសាលាកន្សែង ឃុំស្វាយង្គំ ក្រុងសៀមរាប។ ពិធីនេះ មានការអញ្ជើញចូលរួមពីលោកឃឹម ប៊ុនសុង អភិបាលខេត្តសៀមរាប និងថ្នាក់ដឹកនាំក្រុមហ៊ុន Ptt ជាច្រើនរូបទៀត។
នេះគឺជាសាខាទី៤ ហើយ សម្រាប់ទីតាំង Ptt ខេត្តសៀមរាប។ តាមការឱ្យដឹង Ptt បានចូលមកបណ្ដាក់ទុនរកស៊ីនៅក្នុងព្រះរាជាណាចក្រកម្ពុជា តាំងពីឆ្នាំ១៩៩៣ មកម្ល៉េះ។ ដោយឈរលើគោលនយោបាយទីផ្សាររបស់រាជរដ្ឋាភិបាលកម្ពុជា បានធ្វើឱ្យក្រុមហ៊ុន Ptt មានឱ្យកាសពង្រីកខ្លួនកាន់តែធំឡើង។ បច្ចុប្បន្ន Ptt បានពង្រីកសាខារបស់ខ្លួនចំនួន២២កន្លែងនៅទូទាំងព្រះរាជាណាចក្រកម្ពុជា ហើយ Ptt នឹងខិតខំពង្រីកសាខារបស់ខ្លួនឱ្យបានដល់ទៅ៧០សាខា នៅក្នុងឆ្នាំ២០២០។ Ptt ជាក្រុមហ៊ុនប្រេងដែលនាំមុខគេនៅក្នុងតំបន់ប្រទេសអាស៊ាន ដែលមានសាខារហូតដល់ទៅ១៥០នៅលើបណ្ដាប្រទេសចំនួន៤ ដែលមានកម្ពុជា ហ្វ៊ីលីពីន ឡាវនិងមីយ៉ានម៉ា។ ដោយសាតែមានការទទួលខុសត្រូវខ្ពស់ និងមានទស្សនៈវិស័យច្បាស់លាស់ និងគោរពបានការណែនាំរបស់រាជរដ្ឋាភិបាលកម្ពុជា បានធ្វើឱ្យក្រុមហ៊ុន Ptt កាន់តែមានភាពរឹងមាំក្នុងរយៈពេល១៥ឆ្នាំមកនេះ។
លោកអភិបាលខេត្តបានមានប្រសាសន៍ឱ្យដឹងថា ខេត្តសៀមរាប គឺជាខេត្តប៉ូលសេដ្ឋកិច្ចដ៏សំខាន់របស់ប្រទេស ដោយផ្អែកលើសក្ដានុពលនៃវិស័យទេសចរណ៍ ព្រោះតែភាពសម្បូរបែបនៃសម្បត្តិ វប្បធម៌ រមណីយដ្ឋាន ប្រវត្តិសាស្ត្រធម្មជាតិ ជាពិសេសប្រាង្គប្រាសាទ អង្គរវត្ត ដែលជាសម្បត្តិវបេតិកភ័ណ្ឌពិភពលោក ព្រមទាំងកេរមរតក វប្បធម៌ដ៍សម្បូរបែបផ្សេងៗទៀតហើយអ្វីដែលក្ដីមោទនៈថែមទៀតសម្រាប់ប្រជាពលរដ្ឋខ្មែរទាំងអស់ គឺរមណីយដ្ឋាន តំបន់អង្គរបានក្លាយជាគោលដៅដែលមានភាពទាក់ទាញសម្រាប់ភ្ញៀវទេសចរពីគ្រប់មជ្ឈដ្ឋាន ដោយទទួលបានចំណាត់ថ្នាក់លេខ១ នៅលើពិភពលោក តាមរយៈនៃការវាយតម្លៃនៅដើមខែមិថុនា ឆ្នាំ២១៥ នេះ ដោយការបោះឆ្នោតតាមអនឡាញនៅស្ថាប័ន ទ្រីបអេតវ៉ាយហ្ស័រ (Trip Adviser) ដែលជាភ្នាក់ងារប្រឹក្សាយោបល់ធ្វើដំណើរទេសចរណ៍ដ៏មានឥទិ្ធពល និងជំនឿទុកចិត្តរបស់ភ្ញៀវទេសចរ ក្នុងការសម្រេចធ្វើដំណើរទៅតាមគោលដៅទេសចរណ៍ពិភពលោកដែលមានគេហទំព័រធំជាងគេ និងមានអ្នកអានចំនួន៣១៥លាននាក់។ ជាក់ស្ដែរយៈពេល៨ខែក្នុងឆ្នាំ២០១៥ ភ្ញៀវទេសចរមកទស្សនាខេត្តសៀមរាបចំនួន៣,៥៥១.១៥១នាក់ ក្នុងនោះភ្ញៀវទេសចរអន្តរជាតិមានចំនួន១,៤២៦,៤២០នាក់។ កំណើនទៅលើវិស័យទេសចរណ៍បានជួយបង្កើនការងារប្រជាពលរដ្ឋក្នុងខេត្តប្រមាណ២០០.០០០នាក់ ដោយក្នុងនោះផ្ដល់ការងារដោយផ្ទាល់៥០.០០០នាក់ និងដោយប្រយោល១៥០.០០០នាក់។
លោកបានមានប្រសាសន៍ឱ្យបានដឹងទៀតថា តាមរយៈការសម្ពោធស្ថានីយប្រេង Ptt ថ្ងៃនេះលោកសង្ឃឹមថា ក្រុមហ៊ុននឹងចូលរួមប្រកួតប្រជែងនៅលើតម្លៃ ដោយសមធម៌ និងផ្ដល់នូវសេវាកម្មជាច្រើនដូចជា គុណភាព និងសីលធម៌ទៅតាមអ្នកប្រើប្រាស់។ លោកក៏បានលើកឡើងតាមប្រសាសន៍របស់សម្ដេចតេជោ ហ៊ុន សែន ដែលសំណូមពរដល់បណ្ដាក្រុមហ៊ុន រកស៊ីលក់ប្រេងទាំងអស់ត្រូវគោរពឱ្យបាននូវគោលការណ៍ច្បាប់អន្តរជាតិ គឺកាលណាតម្លៃប្រេង នៅលើទីផ្សាអន្តរជាតិចុះ ត្រូវតែចុះកុំយកលេសថា លក់តម្លៃចាស់ឱ្យអស់សិន ទើបបញ្ចុះតម្លៃថ្មី៕
ចែករំលែកព័តមាននេះ