ខេត្តស្វាយរៀង៖ នាព្រឹកថ្ងៃព្រហស្បតិ៍ ទី២៩ ខែមេសា ឆ្នាំ២០២១ ឯកឧត្តម ម៉ែន វិបុល អភិបាលនៃគណៈអភិបាលខេត្តស្វាយរៀង បានអញ្ជើញចុះពិនិត្យសំណង់អាគារប៉ុស្តិ៍នគរបាលរដ្ឋបាល សង្កាត់គយត្របែក ព្រមទាំងរបង ប្រព័ន្ធលូបង្ហូរទឹក និងហេដ្ឋារចនាសម្ព័ន្ធនានា ក្នុងបរិវេណសាលាសង្កាត់ និងប៉ុស្តិ៍រដ្ឋបាល ដែលបានស្ថាបនារួចរាល់។ ជាមួយគ្នានោះ ឯកឧត្តមអភិបាលខេត្ត ក៏បានពិនិត្យសំណង់ឈាបនដ្ឋាន សម្រាប់បូជាអ្នកទទួលមរណភាព ដោយជំងឺកូវីដ១៩ កំឡុងពេល ដែលកំពុងសម្រាកព្យាបាលក្នុងខេត្តជាប់ព្រំដែនវៀតណាមមួយនេះ។ ឈាបនដ្ឋាននោះ ស្ថិតនៅបរិវេណវត្តកោះជុំ សង្កាត់គយត្របែក ក្រុងស្វាយរៀង ខេត្តស្វាយរៀង។
ក្រៅពីនោះ ឯកឧត្តមអភិបាលខេត្ត ក៏បានអញ្ជើញពិនិត្យផ្លូវក្រាលក្រួសក្រហម ១ខ្សែ ប្រវែង ១០៥០ម៉ែត្រ ទទឹង៥ម៉ែត្រ បានស្ថាបនារួចរាល់ ១០០% និងការរៀបចំដាក់បង្គោលភ្លើង ជូនបងប្អូនប្រជាពលរដ្ឋ ដែលជាអំណោយក្នុងគម្រោងអភិវឌ្ឍន៍របស់រដ្ឋបាលខេត្ត។
សូមជម្រាបជូនថា ផ្លូវមួយខ្សែនេះ កន្លងមក ក្រោមការដឹកនាំនឹងសម្របសម្រួលរបស់ឯកឧត្តម ម៉ែន វិបុល អភិបាលខេត្ត ឯកឧត្តមបានដោះស្រាយបញ្ចប់នូវករណីទំនាស់រវាងប្រជាពលរដ្ឋ និងប្រជាពលរដ្ឋរួចរាល់តាមបណ្តោយផ្លូវមួយខ្សែនេះ ដោយអនុវត្តតាមយុទ្ធសាស្ត្រ ឈ្នះ ឈ្នះ របស់សម្តេចតេជោ។ ឯកឧត្តម ក៏បានសម្រេចធ្វើផ្លូវមួយខ្សែនេះ ជូនបងប្អូនប្រជាពលរដ្ឋ ដើម្បីងាយស្រួលក្នុងការដំណើរផងដែរ ស្ថិតនៅភូមិបាយ៉ាប ឃុំបាសាក់ ស្រុកស្វាយជ្រំ ខេត្តស្វាយរៀង។
សូមរំលឹកថា ខេត្តស្វាយរៀង ចាប់តាំងពីមានការឆ្លងរាលដាលវីរុសកូវីដ១៩ សហគមន៍២០កុម្ភៈ មកដល់ពេលនេះ ខេត្តស្វាយរៀង មានអ្នកស្លាប់ដោយជំងឺកូវីដ១៩ ចំនួន ០៤នាក់ ហើយក្នុងនោះ មានស្ត្រី ម្នាក់ និងបុរស ៣នាក់។ ក្នុងរយៈពេល ០៤ថ្ងៃចុងក្រោយមកហើយ ដែលខេត្តស្វាយរៀង មិនមានអ្នកឆ្លងថ្មីទេ គឺមានតែអ្នកជាសះស្បើយ៕ វ៉ាន់ ប៊ុនធឿន
ចែករំលែកព័តមាននេះ