ខេត្តមណ្ឌលគិរី ៖ រូបតំណាង ឃ្លោង សត្វសេះ គង រួមនិងហេដ្ឋារចនាសម្ព័ន្ឋជាច្រើននឹងត្រូវសាងសង់ជាបន្តបន្ទាប់លើអតីតព្រលានយន្តហោះខេត្តមណ្ឌលគិរី ដើម្បីប្រែក្លាយទៅជាសួនច្បារដ៏ធំជាងគេនៅពេលខាងមុខ ។
ឯកឧត្តម ស្វាយ សំអ៊ាង អភិបាលខេត្តមណ្ឌលគិរី នាព្រឹកថ្ងៃទី២៧ មេសា ២០២១ បានឲ្យដឹងថា បើទោះជាបច្ចុប្បន្នប្រទេសកម្ពុជាកំពុងរងនូវវិបត្តិកូវីដ១៩ឆ្លងរីករាលដាលក្នុងសហគមន៏ ហើយខេត្តមណ្ឌលគិរី ក៏បានធ្លាក់ក្នុងវិបត្តិនេះក៏ដោយ ប៉ុន្តែកិច្ចការអភិវឌ្ឍន៏ខេត្តយើងនៅតែបន្តសកម្មភាព ដ្បិតវាមានបញ្ហាប្រឈមចំពោះមុខខ្លះ។
ឯកឧត្តមអភិបាលខេត្តបន្តថា កន្លងមកអាជ្ញាធរនិងមន្ទីរពាក់ព័ន្ឋ បានខិតខំអភិវឌ្ឍន៏អតីតព្រលានយន្តហោះនេះ ចេញជាសមិទ្ឋផលមួយចំនួនហើយ ដូចជា សួនរុក្ខជាតិចម្រុះ សួនហាត់កីឡា វិមានឯករាជ្យ ជាដើម។ហើយបច្ចុប្បន្នក្រុមជាងកំពុងបន្តសាងសង់រូបសំណាក់ជាច្រើនទៀត ដើម្បីកែលម្អសោភ័នភាពសួនច្បារឲ្យកាន់តែមានការទាក់ទាញ។
ក្រោយវិបត្តិជំងឺកូវីដ១៩បិទបញ្ចប់នាពេលខាងមុខ ឯកឧត្តមអភិបាលខេត្តមានក្តីរំពឹងខ្ពស់លើវិស័យទេសចរណ៏ ហើយការរៀបចំសួនច្បារយក្សនេះនិងរឹតតែទាក់ទាញភ្ញៀវទេសចរកាន់តែច្រើនចូលមកលេងកម្សាន្តនៅខេត្តមណ្ឌលគិរី។ សូមបញ្ជាក់ថា សួនច្បារដែលអាជ្ញាធរខេត្តមណ្ឌលគិរី កំពុងបង្កើនសកម្មភាពសាងសង់នេះ មានទំហំជាង២០ហិកតា ដែលអាចចាត់ទុកថា ជានដ៏ធំជាងគេក្នុងប្រទេសកម្ពុជា ហើយត្រូវចំនាយថវិកាអស់ជាច្រើនលានដុល្លារ ក្នុងការសាងសង់ឲ្យបានសម្រេច១០០%៕ ដោយ៖ សាយ ករុណា
ចែករំលែកព័តមាននេះ