រាជធានីភ្នំពេញ ៖ ក្រុមហ៊ុនហ្វដម៉ូទ័រ (Ford Motor) កំពុងធ្វើការស្វែងរកនូវអ្នកច្នៃម៉ូដដែលមានថ្វីដៃល្អក្នុងការច្នៃប្រឌិតនូវសម្ភារៈប្រើប្រាស់ច្នៃចេញពីសំណល់ផ្លាស្ទិច ដើម្បីប្រកួតយកពានរង្វាន់អ្នកច្នៃម៉ូដរបស់ក្រុមហ៊ុនហ្វដ (Ford) ។ កម្មវិធីនេះ នឹងផ្តល់រង្វាន់ដល់សិស្ស និស្សិត៣នាក់ ដែលមានគំនិតច្នៃប្រឌិតខ្ពស់ មកពីបណ្តាប្រទេសក្នុងទ្វីបអាស៊ី និងអ៊ឺរ៉ុប ដោយក្រុមហ៊ុននឹងផ្តល់ជូននូវវត្ថុធាតុដើម ដែលនៅសេសសល់ពីការផលិតរថយន្តហ្វដ (Ford) ព្រមទាំងទឹកប្រាក់១.០០០ដុល្លារសហរដ្ឋអាមេរិក សម្រាប់ជាទុនប្រើប្រាស់ក្នុងការប្រកួតនេះ។
គួរបញ្ជាក់ផងដែរថា ជ័យលាភីទាំង៣នាក់នោះ នឹងមានឱកាសក្នុងការបង្ហាញនូវគំនិតច្នៃប្រឌិតរបស់ខ្លួន តាមរយៈការតម្រូវឱ្យច្នៃប្រឌិតនូវសម្លៀកបំពាក់ដែលបង្កើតឡើងពីក្រណាត់កៅអីឡានដែលផ្តល់ដោយក្រុមហ៊ុនហ្វដ ក្នុងគោលបំណងជម្រុញឱ្យមនុស្សជាតិយល់ដឹង និងចូលរួមកាត់បន្ថយផលប៉ះពាល់បរិស្ថាន។ ទន្ទឹមនឹងនេះ ក្រុមហ៊ុនហ្វដនឹងផ្តល់ជូនស្រោមកៅអីឡានដែលផលិតពីសំណល់ដបផ្លាស្ទិចដល់បេក្ខជនដែលចូលរួមប្រកួតសម្រាប់យកទៅច្នៃម៉ូដសម្លៀកបំពាក់ផងដែរ។
កញ្ញា ឈែល ស៊ីលីវ ប្រធានផ្នែកច្នៃម៉ូដរបស់ក្រុមហ៊ុនហ្វដ បាននិយាយថា ក្នុងនាមយើងជាអ្នកផលិតរថយន្ត យើងខិតខំរិះរកគ្រប់មធ្យោបាយ ដើម្បីចូលរួមកាត់បន្ថយនូវផលប៉ះពាល់បរិស្ថាន ជាពិសេសកាត់បន្ថយការកើនឡើងនូវឧស្ម័នកាបូនិកនៅក្នុងបរិយាកាស។ ជាច្រើនឆ្នាំកន្លងមក យើងទទួលបានជោគជ័យក្នុងការផលិតរថយន្តហ្វដ ដែលមិនប៉ះពាល់ដល់បរិស្ថាន ដោយប្រើប្រាស់វត្ថុធាតុដើមកែច្នៃចេញពីសំណល់ដបផ្លាស្ទិច កប្បាស ក្រចៅ ចំបើង គ្រាប់សណ្តែក និងប្រេងល្ហុងខ្វងជាដើម។
កញ្ញាបន្តថា កម្មវិធីនេះ បង្កើតឡើងក្នុងគោលបំណងផ្តល់ឱកាសដល់បេក្ខជនដែលមានគំនិតច្នៃប្រឌិតខ្ពស់បានបញ្ចេញនូវទេពកោសល្យរបស់ខ្លួនតាមរយៈការប្រើប្រាស់កាកសំណល់យកមកកែច្នៃរចនាជាម៉ូដសម្លៀកបំពាក់ ។ លើសពីនេះទៅទៀត ក្រុមហ៊ុនហ្វដ ចង់ជំរុញឱ្យមានការកែច្នៃនូវសម្ភារៈដែលប្រើប្រាស់រួចទុកជាសម្ភារៈដែលមានប្រយោជន៍ និងរួមគ្នាការពារបរិស្ថាន ។
កញ្ញា លីវ បន្ថែមថា តាមរយៈកម្មវិធីនេះ យើងបានជំរុញឱ្យបេក្ខជនខិតខំបង្កើត និងច្នៃប្រឌិតបន្ថែមទៀត ដើម្បីទទួលបាននូវបទពិសោធន៍ល្អៗក្នុងការកែច្នៃនូវក្រណាត់ និងម៉ូដដែលទាន់សម័យ។ ការផ្តល់ជូននូវវត្ថុធាតុដើមសម្រាប់ការរចនានូវសម្ភារៈប្រើប្រាស់នេះ យើងជឿជាក់ថា នៅថ្ងៃអនាគត អ្នកច្នៃម៉ូដទាំងអស់នឹងនៅតែបន្តគំនិតថ្មីៗ និងល្អៗ ក្នុងការបង្កើតសម្ភារៈប្រើប្រាស់ដែលច្នៃចេញពីកាកសំណល់នានា។
ក្រុមហ៊ុនហ្វដនឹងនៅតែបន្តសហការជាមួយនឹងអង្គការ Redress ជាអង្គការមួយដែលបង្កើតឡើងដើម្បីទប់ស្កាត់នូវផលប៉ះពាល់ទៅលើបរិស្ថាន ដោយផ្តួចផ្តើមចេញពីវិស័យច្នៃប្រឌិតសម្ភារៈប្រើប្រាស់ពីកាកសំណល់ ដើម្បីបង្កើតឱ្យមានការប្រកួតនូវការច្នៃម៉ូដរបស់ហ្វដឆ្នាំ២០១៦ នេះ។ នៅក្នុងកម្មវិធីនេះ បេក្ខជនទាំង១០នាក់ ដែលត្រូវបានជ្រើសរើសសម្រាប់ការប្រកួតនេះ នឹងតម្រូវឱ្យប្រើប្រាស់ស្រោមកៅអីរថយន្តហ្វដ ដើម្បីកែច្នៃឱ្យចេញជាម៉ូដសម្លៀកបំពាក់។
សម្លៀកបំពាក់ដែលមានការច្នៃប្រឌិតខ្ពស់ជាងគេ នឹងត្រូវដាក់បង្ហាញនៅក្នុងកម្មវិធីបង្ហាញម៉ូដ Hong Kong Fashion Week ដែលជាផ្នែកមួយនៃកម្មវិធីប្រកួតច្នៃម៉ូដរបស់ហ្វដ (Ford) ។ ការប្រកួតច្នៃម៉ូដរបស់ក្រុមហ៊ុនហ្វដ (Ford) នឹងចាប់ផ្តើមទទួលពាក្យចាប់ពីថ្ងៃទី២១ ខែកញ្ញា ឆ្នាំ២០១៥ ហើយបេក្ខជនអាចចាប់ផ្តើមចុះឈ្មោះចូលរួមប្រកួតចាប់ពីថ្ងៃនេះតទៅ នៅលើគេហទំព័ររបស់ក្រុមហ៊ុនហ្វដ (Ford) www.digitalsnippets.ford.com/fordgrant ។
ចែករំលែកព័តមាននេះ