ខេត្តស្ទឹងត្រែង ៖ វត្តមានសត្វផ្សោតមួយក្បាលត្រូវគេប្រទះឃើញងាប់អណ្តែតទឹក ស្ថិតនៅភូមិអន្លង់ស្វាយ ឃុំព្រះរំកិល ស្រុកបូរីអូរ ស្វាយសែនជ័យ ។ ក្រុមល្បាតបានទទួលព័ត៌មានពីប្រជាពលរដ្ឋ កាលពីព្រឹក…
ខេត្តស្ទឹងត្រែង ៖ វត្តមានសត្វផ្សោតមួយក្បាលត្រូវគេប្រទះឃើញងាប់អណ្តែតទឹក ស្ថិតនៅភូមិអន្លង់ស្វាយ ឃុំព្រះរំកិល ស្រុកបូរីអូរ ស្វាយសែនជ័យ ។
ក្រុមល្បាតបានទទួលព័ត៌មានពីប្រជាពលរដ្ឋ កាលពីព្រឹក ថ្ងៃ២២ខែមេសា ២០២១ ខណៈឆ្មាំប៉ុស្ដិ៍អន្លង់ឈើទាលចុះល្បាត ។
លោក ស្រី សំវិចិត្រ ប្រធានស្តីទីខណ្ឌរដ្ឋបាលជលផល អោយដឹងថា បន្ទាប់ទទួលបានព័ត៌មានស្តីពីសត្វផ្សោតស្លាប់ មន្ត្រីជលផលបានសហការជាមួយអង្គការអភិរក្សសត្វផ្សោត wwf ចុះទៅពិនិត្យដល់គោលដៅ ។
លោកបន្តថា យោងតាមការសន្និដ្ឋានបឋមដោយអ្នកជំនាញពិនិត្យឃើញសត្វផ្សោតនោះអាចស្លាប់ក្នុងក្នុងរយៈពេល៥ទៅ៧ថ្ងៃ ហើយ តាមការពិនិត្យលើរាងកាយមិនមានស្នាមជាប់ម៉ងរបស់អ្នកនេសាទទេ ។
លោកបន្តថា តាមការប៉ាន់ស្មានសត្វផ្សោតនេះ មានវ័យចំណាស់អាយុប្រហែលជាង២០ឆ្នាំទៅហើយ ហើយធ្មេញរបស់វាសឹករិចរិលអស់ហើយដែរ ។ លោកថា អ្នកជំនាញផ្នែកវិទ្យាសាស្ត្របានយកកូដដែលកិបលើព្រុយរបស់វា រួម និងសំណាកបន្ថែមទៀតដើម្បីពិនិត្យអោយបានជាក់លាក់ ។
ក្រោយការពិនិត្យនោះដែរ គេសង្កេតឃើញមាឌរបស់វារាងស្គមទម្ងន់រហូតដល់១០០គីឡូក្រាម ចំណែកប្រវែង២ ម៉ែត្រ២តឹក៧ហ៊ុន ។ សាកសពរបស់វាមានសភាពស្អុយរលួយបន្តិចទៅហើយ ។
អ្នកវិទ្យាសាស្ត្រក៏ដូចជា ជំនាញខាងអង្គការ wwf មិនអាចកំណត់ថាផ្សោតនោះជាផ្សោតញី ឬផ្សោតឈ្មោលបានឡើយ ។ គេអាចត្រឹមសន្និដ្ឋានវ័យរបស់វា ប្រហែលជាង២០ឆ្នាំ ដោយសារបានដាក់លេខកូដនៅជាប់នឹងខ្លួនផ្សោត ។ ហើយមូលហេតុដែលបណ្តាលអោយសត្វផ្សោតមួយក្បាលបានងាប់នោះអាចបណ្ដាលមកពីវ័យចំណាស់ និងមានជំងឺផង ៕
ចែករំលែកព័តមាននេះ