រាជធានីភ្នំពេញ ៖ សាកលវិទ្យាល័យបញ្ញាសាស្ត្រកម្ពុជា កាលពីថ្ងៃទី០៣ តុលា កន្លងទៅនេះ បានរៀបចំពិព័រណ៍បច្ចេកវិទ្យាព័ត៌មានវិទ្យាឆ្នាំ២០១៥ ដោយមានការអញ្ជើញចូលរួមជាកិត្តិយសពីលោកបណ្ឌិត ប៉ក់ ថាវិន សាកលវិទ្យាធិការរងនៃសាកលវិទ្យាល័យបញ្ញាសាស្ត្រកម្ពុជា លោកម៉ូវ ចរិយា ប្រធានបញ្ញាត្តិករទូរគមនាគមន៍កម្ពុជា រួមនឹងភ្ញៀវកិត្តិយសជាច្រើនផ្សេងទៀត។ ពិព័រណ៍នេះ មានគោលបំណងចង់ឲ្យនិស្សិតបង្ហាញពីស្នាដៃនៅក្នុងផ្នែកព័ត៌មាន និងបច្ចេកវិទ្យា។
លោកបណ្ឌិត ប៉ក់ ថាវិន សាកលវិទ្យាធិការងនៃសាកលវិទ្យាល័យបញ្ញាសាស្ត្រកម្ពុជា មានប្រសាសន៍ថា ព័ត៌មានវិទ្យាមានសារសំខាន់ណាស់នៅពេលបច្ចុប្បន្ននេះ ហើយមនុស្សអាចធ្វើការទំនាក់ទំនងគ្នាទៅវិញទៅមកប្រកបដោយភាពងាយស្រួលនៅទូទាំងពិភពលោក ។ ដោយឡែកនៅក្នុងវិស័យធនាគារ លុយអាចដក ឬដាក់បាន២៤ម៉ោង អាចផ្ញើរបានទៅគ្រប់ទីកន្លែងលឿនរហ័សទាន់ចិត្ត។
ការរៀបចំពិព័រណ៍នេះ មានគោលបំណងលើកទឹកចិត្ត និងបង្ហាញស្នាដៃរបស់និស្សិតជំនាញផ្នែកព័ត៌មានវិទ្យាពាណិជ្ជសាស្ត្រដែលបានខិតខំសិក្សាកន្លងមកហើយ ដើម្បីបានជាប់នូវមុខវិជ្ជានីមួយៗ និស្សិតត្រូវបានតម្រូវឲ្យបង្កើតជា Project មួយដែលទាក់ទងនឹងមុខវិជ្ជាកំពុងរៀន ។ ឧទារហរណ៍ចំពោះនិស្សិតដែលកំពុងរៀនមុខវិជ្ជា រចនា និងអភិវឌ្ឍន៍គេហទំព័រ គឺអាចបង្កើតនូវ គេហទំព័រសម្រាប់ធ្វើពាណិជ្ជកម្ម អនឡាញ គេហទំព័រព័ត៌មាន និងប្រព័ន្ធគេហទំព័រជាច្រើនទៀត ។
ចំពោះនិស្សតដែលកំពុងរៀនមុខវិជ្ជាបង្កើតកម្មវិធី គឺអាចបង្កើតស្នាដៃជាច្រើន ដូចជា ប្រព័ន្ធគ្រប់គ្រងសន្និធិ ប្រព័ន្ធគ្រប់គ្រងការលក់ ប្រព័ន្ធគ្រប់គ្រងសណ្ឋាគារ ខុនដូ ប្រព័ន្ធគណនេយ្យកុំព្យូទ័រ ប្រព័ន្ធគ្រប់គ្រងបុគ្គលិក និងបើកប្រាក់បៀវត្ស ។ ដោយឡែកចំពោះនិស្សិតដែលកំពុងរៀនមុខវិជ្ជា Network គឺត្រូវបង្កើតស្នាដៃមួយចំនួន ដូចជា ប្រព័ន្ធបណ្តាញ ប្រព័ន្ធគ្រប់គ្រងអ្នកប្រើប្រាស់ គ្រប់គ្រងឯកសារ និងប្រព័ន្ធសុវត្ថិភាព ។ល។
ចែករំលែកព័តមាននេះ