រាជធានីភ្នំពេញ ៖ ណាហ្គាវើលបេះដូងសប្បុរសបានរៀបចំការប្រកួតបាល់ទាត់មិត្តភាពដល់កុមារនៅអង្គការមិត្តសំឡាញ់ និងអង្គការផ្កាយសមុទ្រ ដែលស្ថិតក្នុងខណ្ឌស្ទឹងមានជ័យ កាលពីថ្ងៃទី២៦ កញ្ញា ២០១៥ កន្លងទៅនេះ គោលបំណងដើម្បីចូលរួមចំណែកក្នុងការអភិវឌ្ឍន៍វិស័យកីឡាក្នុងប្រទេសកម្ពុជា។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើល បានមានប្រសាសន៍ថា «ណាហ្គាវើលបេះដូងសប្បុរសមិនត្រឹមតែបានរៀបចំការប្រកួតបាល់ទាត់មិត្តភាពសម្រាប់កុមារកម្ពុជាប៉ុណ្ណោះនោះទេ ប៉ុន្តែថែមទាំងបានផ្តួចផ្តើមបង្កើតកម្មវិធីបណ្តុះបណ្តាលបាល់ទាត់ ដើម្បីជួយអភិវឌ្ឍវិស័យកីឡាក្នុងប្រទេសកម្ពុជា តាមរយៈការផ្តល់កម្មវិធីបណ្តុះបណ្តាលជំនាញមូលដ្ឋានបាល់ទាត់ទៅដល់កីឡាករបាល់ទាត់វ័យក្មេងកម្ពុជាថែមទៀតផង។ លើសពីនេះ ណាហ្គាវើលបេះដូងសប្បុរសបានឧបត្ថម្ភបាល់ទាត់ និងបាល់ទះជាង៦០០បាល់ទៅដល់សាលារៀន និងមជ្ឈមណ្ឌលកុមារកំព្រាមួយចំនួននៅតាមបណ្តាខេត្ត និងរាជធានីភ្នំពេញផងដែរ។ រហូតមកដល់បច្ចុប្បន្ននេះ មានកីឡាករបាល់ទាត់វ័យក្មេងកម្ពុជានៅតាមបណ្តាខេត្ត និងរាជធានីភ្នំពេញជាង៣០០នាក់ បានទទួលផលប្រយោជន៍ពីកម្មវិធីបណ្តុះបណ្តាលបាល់ទាត់នេះ ដោយទទួលបានការបង្ហាត់បង្ហាញពីកីឡាករអាជីពមកពីក្លិបបាល់ទាត់ណាហ្គាវើលដែលជាក្លិបបាល់ទាត់ដ៏ល្បីឈ្មោះមួយ»។
លោកបានបន្ថែមទៀតថា «យើងរំពឹងថា តាមរយៈកម្មវិធីបណ្តុះបណ្តាលបាល់ទាត់នេះ វិស័យកីឡាក្នុងប្រទេសកម្ពុជា នឹងឈានឡើងមួយកម្រិតទៀត ហើយកីឡាករបាល់ទាត់វ័យក្មេងមួយចំនួននឹងអាចក្លាយជាកីឡាករបាល់ទាត់អាជីពនាពេលអនាគត ហើយពួកគេអាចផ្ទេរជំនាញរបស់ពួកគេទៅឲ្យក្មេងជំនាន់ក្រោយទៀតផង»។
កុមារម្នាក់មកពីអង្គការមិត្តសំឡាញ់បាននិយាយថា «ខ្ញុំសប្បាយរីករាយណាស់ដែលបានចូលរួមការប្រកួតបាល់ទាត់មិត្តភាពដែលបានរៀបចំដោយណាហ្គាវើលបេះដូងសប្បុរស។ អត្ថប្រយោជន៍នៃកម្មវិធីប្រកួតបាល់ទាត់មិត្តភាពនេះ ធ្វើឲ្យខ្ញុំទទួលបានជំនាញបច្ចេកទេសក្នុងការលេងបាល់ទាត់។ យើងក៏បានស្គាល់មិត្តភក្តិថ្មីៗជាច្រើននាក់មកពីមជ្ឈមណ្ឌលកុមារកំព្រាផ្សេងៗទៀតផងដែរ។ យើងសូមអរគុណដល់ណាហ្គាវើលបេះដូងសប្បុរស ដែលបានរៀបចំកម្មវិធីប្រកួតបាល់ទាត់មិត្តភាពសម្រាប់យើង»។
លោកសាមឌី បុគ្គលិករបស់អង្គការផ្កាយសមុទ្របានមានប្រសាសន៍ថា «សូមថ្លែងអំណរគុណដល់ណាហ្គាវើលបេះដូងសប្បុរសដែលបានរៀបចំកម្មវិធីប្រកួតបាល់ទាត់មិត្តភាពសម្រាប់កុមាររបស់យើង។ ជាច្រើនលើកមកហើយ ដែលណាហ្គាវើលបេះដូងសប្បុរសបានផ្តល់កម្មវិធីបណ្តុះបណ្តាលបាល់ទាត់សម្រាប់កុមារកម្ពុជា។ វាដល់ពេលដែលកុមារទាំងនេះ ត្រូវអនុវត្តជំនាញរបស់ពួកគេដែលបានរៀនពីក្លិបបាល់ទាត់ណាហ្គាវើលហើយ។ ខ្ញុំគិតថា កម្មវិធីនេះ មានអត្ថប្រយោជន៍ណាស់សម្រាប់កុមារ ដើម្បីអភិវឌ្ឍជំនាញបាល់ទាត់របស់ពួកគេ។ តាំងនាមឲ្យកុមារទាំងនេះ ខ្ញុំសូមថ្លែងអំណរគុណដល់ណាហ្គាវើលបេះដូងសប្បុរសដែលបានផ្តល់ទាំងសម្ភារៈកីឡា និងកម្មវិធីបណ្តុះបណ្តាលដល់កុមារ»៕
ចែករំលែកព័តមាននេះ