ខេត្តតាកែវ៖ កាលពីពេលថ្មីៗនេះ ស្រូវរបស់ប្រជាពលរដ្ឋខ្មែរនៅស្រុកអង្គរបុរី ខេត្តតាកែវ ជួបការលំបាកក្នុងការខ្វះខាតក្រុមឈ្មួញទិញ ហើយស្រូវពលរដ្ឋខ្លះរងការខូចខាត ដោយសាតែខ្វះឈ្មួញចូលទិញ និងពិបាកក្នុងការធ្វើដំណើររឿងដឹកជញ្ជូនយកទៅលក់។
តែក្តីសង្ឃឹមរបស់ពលរដ្ឋនៅស្រុកអង្គរបុរី គឺនៅមានឈ្មួញម្នាក់ឈ្មោះអាត្រឿង ជាជនជាតិវៀតណាម ដែលរស់នៅទឹកដីខ្មែរជាច្រើនឆ្នាំមកហើយដែរ បានចាំទិញស្រូវក្នុងតម្លៃថ្លៃ ដែលធ្វើឱ្យស្រូវពលរដ្ឋរាប់ម៉ឺនហិកតាមានទីផ្សារជាធម្មតាវិញ។ ប៉ុន្តែជាអកុសល កាលពីវេលាម៉ោង៣និង៣០នាទីរសៀល ថ្ងៃទី១១ ខែមេសា ឆ្នាំ២០២១ ស្រាប់តែលោក ផុក សារ៉ុម មន្ត្រីនគរបាលស្រុកអង្គរបុរី បានចុះមកឃាត់ខ្លូនអាត្រឿង យកទៅអធិការដ្ឋានដោយគ្មានមូលហេតុ។
ពាក់ព័ន្ធករណីខាងលើនេះ អាត្រឿង បានរៀបរាប់ប្រាប់ថា នៅវេលាខាងលើ គឺពិតជាមានមន្ត្រីនគរបាលឈ្មោះ ផុក សារ៉ុម បានចុះមកហៅលោកទៅអធិការដ្ឋានពិតមែន ។ ពេលទៅដល់អធិការនគរបាលស្រុកអង្គរបុរី ស្រាប់តែមានឈ្មោះលោក ប៉ែន រដ្ឋា ហៅតោខ្មៅ អធិការរងស្រុកអង្គរបុរី និយាយប្រាប់លោកត្រឿងថា «បើចង់រួចខ្លូន ត្រូវបង់លុយ១០០០ដុល្លារទើបរួចខ្លូន»។
អាត្រឿង បានរៀបរាប់បន្តទៀតថា «លោកបានមកទិញស្រូវពលរដ្ឋខ្មែរ ដោយតម្លៃលើឈ្មួញដទៃទៀត ហើយលោកកំពុងទិញស្រូវរាល់ថ្ងៃពីពលរដ្ឋ ស្រាប់តែក្រុមមន្ត្រីនគរបាលទូរស័ព្ទមកផង និងចុះមកហៅលោកផង ដើម្បីទៅជួបលោកអធិការនិយាយ តែរឿងសុំលុយពីលោកក្នុងតម្លៃច្រើនហួសហេតុ។
ពាក់ព័ន្ធករណីខាងលើ អ្នកយកព័ត៌មានយើងមិនអាចសុំការបំភ្លឺពីលោក យុង ប៊ុនយ៉ុន អធិការស្រុកអង្គរបុរី បានទេ ដោយសារតែលោកមិនទទួលទូរស័ព្ទ។ ចំលោក ឌឹម គឹមសាន្ត អភិបាលស្រុកអង្គរបុរី បានថ្លែងប្រាប់ថា លោកមិនបានដឹងរឿងលោកអធិការចាប់ឃាត់ជនជាតិវៀតណាមខាងលើនោះទេ។
បើតាមការបញ្ជាក់ពីពលរដ្ឋ បានអោយដឹងថា អាត្រឿង ត្រូវបានសមត្ថកិច្ចធ្វើការដោះលែងអោយទិញស្រូវបន្តទៀត ក្រោយឃាត់ខ្លូនជាង១០ម៉ោង ហើយអាត្រឿងមិនបានបង់លុយអោយសមត្ថកិច្ចទេ ព្រោះគ្មានលុយ ព្រោះសមត្ថកិច្ចទារលុយពីអាត្រឿងច្រើនហួសហេតុពេក។
ចែករំលែកព័តមាននេះ