រាជធានីភ្នំពេញ ៖ ក្រោយបែកធ្លាយនូវសារសំឡេងអាណាមិក របស់ជនមិនស្គាល់អត្តសញ្ញាណដែលបាន និយាយថា មានការបិទខណ្ឌមានជ័យទាំងមូល មិនឲ្យមានការចេញចូលក្នុងរយៈពេល៣ម៉ោងរួចមក នៅវេលាល្ងាចថ្ងៃទី៩ ខែមេសា ឆ្នាំ២០២១…
រាជធានីភ្នំពេញ ៖ ក្រោយបែកធ្លាយនូវសារសំឡេងអាណាមិក របស់ជនមិនស្គាល់អត្តសញ្ញាណដែលបាន និយាយថា មានការបិទខណ្ឌមានជ័យទាំងមូល មិនឲ្យមានការចេញចូលក្នុងរយៈពេល៣ម៉ោងរួចមក នៅវេលាល្ងាចថ្ងៃទី៩ ខែមេសា ឆ្នាំ២០២១ លោក ម៉េត មាសភក្តី អ្នកនាំពាក្យ រដ្ឋបាលរាជធានីភ្នំពេញបានឱ្យកោះសន្តិភាពដឹងថា ពុំមានការបិទខណ្ឌមានជ័យនោះទេ។ ចំណែកឯអាជ្ញាធរខណ្ឌមានជ័យ ក៏បានធ្វើការបដិសេធ និងច្រានចោលថាជាព័ត៌មានមិនពិតនេះដែរ។
លោក ឌី រ័ត្នខេមរុណ អភិបាលរងខណ្ឌមានជ័យ បានបញ្ជាក់ ប្រាប់តាមរយៈទូរស័ព្ទថា ៖ សារសំឡេងដែលបានចែកចាយតគ្នាថា មានការបិទខណ្ឌមានជ័យ គឺជាព័ត៌មានមិនពិតឡើយ ពោលគឺពុំមានការបិទខណ្ឌ ឬសង្កាត់នោះទេ មានតែការបិទផ្ទះរបស់អ្នកវិជ្ជមានកូវីដ-១៩ ឬផ្លូវ ឬតំបន់មួយចំនួនដែលរកឃើញថា មានការផ្ទុះជំងឺកូវីដ-១៩ខ្លាំងប៉ុណ្ណោះ។ ក្រៅពីនោះ គឺពុំមានការបិទទ្រង់ទ្រាយធំ ដូចសារសំឡេងអាណាមិកនោះឡើយ។
គួរបញ្ជាក់ថា តាមរយៈសារសំឡេង ដែលបានចែកចាយតគ្នា នៅលើបណ្តាញប្រព័ន្ធអេឡិចត្រូនិចផ្សេងៗជាច្រើន ដូចជា ប្រព័ន្ធតេឡេក្រាម , WhatsApp និង Messenger ជាដើម ដោយបាននិយាយថា ៖ នៅក្នុងរយៈពេល៣ម៉ោងទៀត អាជ្ញាធរនឹងមានការបិទចរាចរណ៍មិនឲ្យមានការចេញចូលក្នុងខណ្ឌមានជ័យឡើយ ដោយសារមានការផ្ទុះជំងឺកូវីដខ្លាំងពីសំណាក់បងប្អូនកម្មកររោងចក្រ។ សំឡេងសារអាណាមិកដដែលនោះ បានអំពាវនាវឲ្យបងប្អូនក្នុងខណ្ឌមានជ័យ សូមចាកចេញពីលំនៅឋានជាបន្ទាន់ បើពុំដូចនោះគេនឹងបិទខណ្ឌលែងឲ្យចេញហើយ៕ ដោយ ៖ ម៉ម លីហេង+ចន ណារិទ្ធ
ចែករំលែកព័តមាននេះ