កងកម្លាំងសន្តិសុខ បោសសម្អាតមីន និងកាកសំណល់សង្គ្រាម (កងកម្លាំងមួកខៀវ) ប្រមាណជាង២០០នាក់ បានចូលរួមកម្មវិធីបរិច្ចាគឈាមដោយស្ម័គ្រចិត្តដែលរៀបចំឡើងនៅក្នុងបរិវេណសាលាហ្វឹកហ្វឺនបណ្តុះបណ្តាល
កងកម្លាំងសន្តិសុខ បោសសម្អាតមីន និងកាកសំណល់សង្គ្រាម (កងកម្លាំងមួកខៀវ) ប្រមាណជាង២០០នាក់ បានចូលរួមកម្មវិធីបរិច្ចាគឈាមដោយស្ម័គ្រចិត្តដែលរៀបចំឡើងនៅក្នុងបរិវេណសាលាហ្វឹកហ្វឺនបណ្តុះបណ្តាលកងកម្លាំងរក្សាសន្តិភាពពហុជាតិ ស្ថិតនៅស្រុកភ្នំស្រួច ខេត្តកំពង់ស្ពឺ ។ ការបរិច្ចាគឈាមបានប្រារព្ធឡើងរយៈពេលពេញមួយថ្ងៃ គឺនៅថ្ងៃទី២៥ កញ្ញា ២០១៥ ដោយរំពឹងថា នឹងទទួលបានឈាមសប្បុរសយ៉ាងតិច១៥០ប្លោក ដើម្បីបំពេញបន្ថែមដល់ស្តុកឈាមបម្រុងដែលកំពុងតែមានការខ្វះខាត។
លោកមេបញ្ជាការ ហួត គឹមសាន បានមានប្រសាសន៍ថា ការបរិច្ចាគឈាមនេះ គឺធ្វើឡើង ដើម្បីជាកិច្ចអបអរសាទរដល់កងកម្លាំងមួកខៀវរបស់យើងមុននឹងចាកចេញទៅបំពេញបេសកកម្មនៅក្រៅប្រទេស ក្រោមគម្រោងរបស់យូអិន (UN)។ នេះគឺជាលើកទី២ហើយ ក្នុងឆ្នាំ២០១៥ ដែលកងកម្លាំងមួកខៀវបានរៀបចំកម្មវិធីបរិច្ចាគឈាមនេះឡើង ការប្រារព្ធពិធីនេះ គឺដើម្បីឆ្លើយតបទៅនឹងកង្វះឈាមក្នុងប្រទេស និងបង្ហាញពីភាពមោះមុតស្នេហាជាតិរបស់ពលទាហានយើង។
បុគ្គលិកមជ្ឈមណ្ឌលជាតិបានឲ្យដឹងថា បច្ចុប្បន្នស្តុកឈាមបម្រុង គឺមានចំនួនកាន់តែតិចទៅៗ ដែលមានប្រភេទឈាមខ្លះ គឺបានដាច់ស្តុកទៀតផង។ ការធ្លាក់ចុះខ្លាំងនេះ ដោយសារតែអត្រាអ្នកផ្តល់ឈាមស្ម័គ្រចិត្តមានការធ្លាក់ចុះ រីឯតម្រូវការ គឺមានការកើនឡើងពីមួយថ្ងៃទៅមួយថ្ងៃដែលជាការព្រួយបារម្ភមួយចំពោះតុល្យភាពស្តុកឈាមនៅកម្ពុជាទាំងមូល។
ឆ្លៀតក្នុងឱកាសនេះ មជ្ឈមណ្ឌលជាតិផ្តល់ឈាមក៏បានសម្តែងការសាទរ និងអំណរគុណយ៉ាងជ្រាលជ្រៅចំពោះកងកម្លាំងកំចាត់មីន និងសម្អាតកាកសំណល់សង្គ្រាមដែលបានអនុញ្ញាតឲ្យមជ្ឈមណ្ឌលមកទទួលយកអំណោយឈាម ដោយសង្ឃឹមផងដែរថា ឈាមសប្បុរសទាំងនេះ នឹងអាចជួយបំពេញតម្រូវការឈាមបណ្តោះអាសន្នមួយគ្រាដែរ។ មជ្ឈមណ្ឌលជាតិផ្តល់ឈាម ក៏បានអំពាវនាវផងដែរ ចំពោះប្រជាពលរដ្ឋខ្មែរទាំងឡាយឲ្យចូលរួមផ្តល់ឈាមទាំងអស់គ្នាកាន់តែច្រើន ដើម្បីការផ្តល់ឈាមមិនប៉ះពាល់សុខភាពទេ តែគឺជាអំពើសប្បុរសសង្គ្រោះជីវិតដែលជាកុសលដ៏ថ្លៃថ្លា។ ដោយឈរលើឆន្ទៈ២៥៛ ដើម្បីអំពើសប្បុរសធម៌ វីតាល់បានឧបត្ថម្ភដល់អ្នកស្ម័គ្រចិត្តទាំងឡាយនូវទឹកវីតាល់៦ដប និងថង់យួរដ៏ស្រស់ស្អាតបន្ថែមលើការទឹកប្រើប្រាស់ក្នុងកម្មវិធីទាំងមូល។
លោក អ៊ុំ វណ្ណៈ មន្ត្រីទំនាក់ទំនងនៃក្រុមហ៊ុនទឹកពិសាវីតាល់បានលើកឡើងថា លោកពិតជាមានមោទនភាពកងកម្លាំងបោសសម្អាតមីន ដោយត្រូវអង្គការអន្តរជាតិទទួលស្គាល់ពីសមត្ថភាព ហើយស្នើសុំឲ្យមានការជួយជ្រុមជ្រែងដល់ប្រទេសដទៃ។ លោកបន្តថា តាមការអង្កេតរបស់លោកនាយទាហានទាំងឡាយមានភាពស្វាហាប់ និងទឹកចិត្តសប្បាយរីករាយក្នុងការបរិច្ចាគឈាមលើកនេះ ដែលទង្វើនេះ បានបង្ហាញឲ្យឃើញកាន់តែច្បាស់ថា កងកម្លាំងកម្ចាត់មីនរបស់យើងពិតជាទទួលបានការហ្វឹកហ្វាត់បានយ៉ាងមានប្រសិទ្ធភាព។
គួរបញ្ជាក់ផងដែរថា ជារឿយៗក្រុមហ៊ុនអិន វី ស៊ី ខបភើរេសិន វីតាល់ តែងតែសហការជាមួយនឹងមជ្ឈមណ្ឌលជាតិផ្តល់ឈាម និងសកម្មភាពមនុស្សធម៌ក្នុងសង្គមជាច្រើនរូបភាពទៀតដើម្បីបង្ហាញពីតម្លាភាពមូលនិធិ២៥៛ នៃការលក់ទឹកក្នុងមួយដបរបស់យើង។ ក្រុមហ៊ុន វីតាល់ក៏សន្យាផងដែរថា នឹងបន្តគាំទ្រដល់អគ្គបញ្ជាការដ្ឋានបញ្ជូនសារ ចំពោះសកម្មភាពមនុស្សធម៌ដទៃទៀតនាពេលអនាគតខាងមុខ។
ចែករំលែកព័តមាននេះ