ផ្សារអង្គសិង្ហ ក្នុងខេត្តតាកែវ បើកដំណើរការឡើងវិញនៅថ្ងៃនេះ
- តាកែវ
ខេត្តតាកែវ ៖ លោក ភួន ឈីម អភិបាលស្រុកបាទី ប្រធានគណៈបញ្ជាការឯកភាពរដ្ឋបាលស្រុកបាទី បានដឹកនាំមន្ត្រីក្រោមឱវាទរដ្ឋបាលស្រុក បានអញ្ជើញបើកអោយដំណើរការផ្សារអង្គសិង្ហ លក់ដូរជាធម្មតាឡើងវិញ នៅព្រឹកថ្ងៃទី២១ ខែមីនា ឆ្នាំ២០២១ ក្រោយពីបានសម្រេចបិទកាលពីថ្ងៃទី១៥ ខែមីនា ឆ្នាំ២០២១ កន្លងទៅថ្មីៗនេះ។
លោកអភិបាលស្រុកបាទីបានបញ្ជាក់ថា ជាលទ្ធផល ប្រជាពលរដ្ឋរស់នៅជុំវិញផ្សារ ក៏ដូចអាជីវករនៅផ្សារអង្គសឹង្ហនេះរកពុំឃើញមានករណីវិជ្ជមានជំងឺកូវីដ១៩ឡើយ ទើបគណៈបញ្ជាការឯកភាពស្រុកសម្រេចបើកអោយអាជីវករបានលក់ដូរជាធម្មតាឡើងវិញនៅផ្សារអង្គសឹង្ហនេះ និងបានណែនាំដល់ពួកគាត់ត្រូវអនុវត្តនូវវិធានការ ៣ការពារ ៣កុំ អោយបានជាប្រចាំនិងអនុវត្តទៅតាមការណែនាំរបស់ក្រសួងសុខាភិបាល ដោយមិនអោយធ្វេសប្រហែសឡើយ ។
គួររំលឹកថា ការបិទទីតាំងផ្សារអង្គសិង្ហកាលពីពេលកន្លែងមក គឺដោយសារផ្អែកទៅលើបងប្អូនប្រជាពលរដ្ឋនៅទីតាំងខាងលើជាប់ពាក់ព័ន្ធទៅចូលរួមពិធីមង្គលការមួយ នៅភូមិក្រាំងលាវ ឃុំរវៀង ស្រុកសំរោង ខេត្តតាកែវ កាលពីថ្ងៃទី១១ និង១២ ខែមីនា ឆ្នាំ២០២១ កន្លងទៅ ហើយពិធីមង្គលការខាងលើ គឺបន្ទាប់ពីមានបុរសម្នាក់ឈ្មោះ កក្កដា សោភ័ណ ជាអ្នកកំដរកូនកម្លោះ ក្រោយពេលត្រឡប់ទៅរាជធានីភ្នំពេញវិញ ទទួលលទ្ធផលវិជ្ជមានជំងឺកូវីដ១៩ នៅថ្ងៃបន្ទាប់ ៕
ចែករំលែកព័តមាននេះ