ខេត្តព្រៃវែង ៖ បើទោះបីជាប្រមុខរាជរដ្ឋាភិបាលបានដាក់បទបញ្ជាយ៉ាងតឹងរ៉ឹងអោយកងកំលាំងមានសមត្ថកិច្ចចុះល្បាត និងការពារទាំងថ្ងៃទាំងយប់នៅតាមបន្ទាត់ព្រំដែនទាំងវៀតណាម និងថៃ ដើម្បីទប់ស្កាត់ការឆ្លងរាលដាលជម្ងឺកូវីដ១៩ យ៉ាងណាក្តី ប៉ុន្តែជនឱកាសនិយម ដែលគិតតែពីផលប្រយោជន៌ផ្ទាល់ខ្លួន នៅតែព្យាយាមប៉ុនប៉ងលួចនាំមនុស្សឆ្លងដែនចូលមកកម្ពុជាដដែល…
ខេត្តព្រៃវែង ៖ បើទោះបីជាប្រមុខរាជរដ្ឋាភិបាលបានដាក់បទបញ្ជាយ៉ាងតឹងរ៉ឹងអោយកងកំលាំងមានសមត្ថកិច្ចចុះល្បាត និងការពារទាំងថ្ងៃទាំងយប់នៅតាមបន្ទាត់ព្រំដែនទាំងវៀតណាម និងថៃ ដើម្បីទប់ស្កាត់ការឆ្លងរាលដាលជម្ងឺកូវីដ១៩ យ៉ាងណាក្តី ប៉ុន្តែជនឱកាសនិយម ដែលគិតតែពីផលប្រយោជន៌ផ្ទាល់ខ្លួន នៅតែព្យាយាមប៉ុនប៉ងលួចនាំមនុស្សឆ្លងដែនចូលមកកម្ពុជាដដែល ។
ជាក់ស្តែង កាលពីយប់ថ្ងៃទី១១ ខែមិនា ២០២១កន្លងទៅនេះ កម្លាំងសមត្ថកិច្ចការពារព្រំដែន និងកម្លាំងអធិការដ្ឋាននគរបាលស្រុកកំពង់ត្របែក បានសហការគ្នាបង្ក្រាបឃាត់ចាប់បានមេខ្យល់ប្រុសស្រីចំនួន៥នាក់ ដែលកំពុងលួចនាំជនជាតិចិន១៣នាក់ ឆ្លងដែនពីប្រទេសវៀតណាមចូលមកកម្ពុជា។
ប្រភពពត៌មានពីសមត្ថកិច្ចស្រុកកំពង់ត្របែក បានអោយដឹងថា នៅវេលាម៉ោង៣និង១៥នាទីយប់ទៀបភ្លឺថ្ងៃទី១១ឈានចូលព្រឹកថ្ងៃទី១២ ខែមិនា ២០២១ ខណៈពេលដែលកម្លាំងសមត្ថកិច្ចកំពុងដើរល្បាត ក៏ប្រទះឃើញរថយន្ត០១គ្រឿងម៉ាក(អាលហ្វាត) ពាក់ស្លាកលេខ ភ្នំពេញ BI 7539 បើកបរមកក្នុងទិសដៅពីត្បូងទៅជើងទាំងកណ្តាលយប់ ដោយមានការសង្ស័យសមត្ថកិច្ចក៏បានឃាត់រថយន្តត្រួតពិនិត្យ ក៏ស្រាប់តែឃើញមានជនជាតិចិនចំនួន១៣នាក់ ជិះនៅក្នុងរថយន្តនោះទើបធ្វើការចាប់ឃាត់តែម្តង ។
សមត្ថកិច្ចដដែលនេះបានបន្តទៀតថា រថយន្តខាងលើបើកបរដោយឈ្មោះវ៉ន សុឃុន ភេទប្រុស អាយុ៤១ឆ្នាំ និងប្រពន្ធឈ្មោះឆៃ ចន្ថា អាយុ៣៣ឆ្នាំ អ្នកទាំងពីរមានទីលំនៅក្នុងភូមិកំពង់ពោធិ៍ ឃុំកំពង់ភ្នំ ស្រុកលើកដែក ខេត្តកណ្តាល ត្រូវបានសមត្ថកិច្ចចាប់ឃាត់នៅចំណុចខ្លោងទ្វាចូលវត្តសិរីឧត្តម ហៅវត្តចាម ស្ថិតក្នុងភូមិចាម ឃុំចាម ស្រុកកំពង់ត្របែក ខេត្តព្រៃវែង ហើយនៅក្នុងរថយន្តមានជនជាតិចិនចំនួន១៣នាក់ ស្រី១នាក់ និងមេខ្យល់ម្នាក់ឈ្មោះចេង ពុត ភេទប្រុស អាយុ៣៧ឆ្នាំ មានទីលំនៅក្នុងភូមិរោង ឃុំចាម ស្រុកកំពង់ត្របែក ។
ក្រោយពីត្រូវបានឃាត់ខ្លួន ជនជាតិចិនទាំង១៣នាក់ ត្រូវបានសមត្ថកិច្ចនាំយកទៅទុកនៅទីតាំងធ្វើចត្តាឡីស័កមណ្ឌលវិទ្យាល័យសម្តេចតេជោហ៊ុន សែនកំពង់ត្របែក (កអណ្តើក ) ចំណែកជនសង្ស័យទាំង៣នាក់ ត្រូវបាននាំខ្លួនទៅកាន់អធិការដ្ឋាននគរបាលស្រុកកំពង់ត្របែក ដើម្បីចាត់ការទៅតាមនិតិវិធី ។
ប្រភពព័ត៌មានពីមន្ត្រីនគរបាលស្រុកកំពង់ត្របែកបានលួចបង្ហើបអោយដឹងថា ក្រោយពីសាកសួរជនសង្ស័យ ចេង ពុត បានឆ្លើយសារភាពថា រូបគេ និងបក្សពួកបានលួចនាំជនជាតិចិនឆ្លងដែនពីប្រទេសវៀតណាម ចូលមកកម្ពុជា តាមច្រកស្វាយអាង៉ោងនេះ ម្តងរួចមកហើយ ហើយនេះជាលើកទី២ ដោយក្រុមរបស់គេមានគ្នា៥នាក់ ដោយ២នាក់ផ្សេងទៀត ម្នាក់ឈ្មោះចាន់ ខ្មៅ ភេទប្រុស អាយុ៣១ឆ្នាំនៅភូមិតាបុល ឃុំជាងដែក និងម្នាក់ទៀតឈ្មោះ ទេព ដែន ភេទប្រុស អាយុ២៨ឆ្នាំ នៅភូមិជាមួយគ្នា ។
តាមចម្លើយសារភាពខាងលើនេះទើបនៅព្រឹក ថ្ងៃទី១២ មិនា កម្លាំងនគរបាលស្រុកបានតាមស្រាវជ្រាវរកបក្សពួកមេខ្យល់ទាំង២នាក់ និងចាប់ឃាត់ខ្លួនបាន រួចកសាងសំណុំរឿងបញ្ជូនមេខ្យល់ទាំង៥នាក់ទៅស្នងការដ្ឋាននគរបាលខេត្តព្រៃវែង នៅរសៀលថ្ងៃទី១២ មិនា ដើម្បីចាត់ការបន្តទៅតាមនិតិវិធី ។
ចំពោះជនជាតិចិនទាំង១៣នាក់ខាងលើ លោកចាន់ ថា អភិបាលរងខេត្តព្រៃវែងបានអោយដឹងថា ជនជាតិចិន១៣នាក់នោះ សមត្ថកិច្ចបានចាត់ការទៅតាមនិតិវិធី និងបញ្ជូនទៅមណ្ឌលធ្វើចត្តាឡីស័កវិទ្យាល័យសម្តេចតេជោហ៊ុនសែន កំពង់ត្របែក(កអណ្តើក) ដោយអោយមន្ត្រីជំនាញចុះទៅយកសំណាកដើម្បីពិនិត្យរកមេរោគកូវីដ១៩ ហើយមកដលព្រឹកថ្ងៃទី១៥ មិនា ២០២១នេះ លទ្ធផលការពិនិត្យសំណាករោគវិនិច្ឆ័យលើជនជាតិចិន១៣នាក់នេះ គឺ(អវិជ្ជមានកូវីដ១៩) ដូច្នេះនៅព្រឹក ថ្ងៃទី១៥ មិនានេះ សមត្ថកិច្ចត្រូវបញ្ជូនពួកគាត់ទៅកាន់អគ្គនាយកដ្ឋានអន្តោប្រវេសន៌ ក្រសួងមហាផ្ទៃ នៅរាជធានីភ្នំពេញ ដើម្បីបំពេញលិខិតបណ្តេញចេញពីកម្ពុជាទៅប្រទេសចិនវិញតាមនីតិវិធី ។
ចំណែកមេខ្យល់៣នាក់ និងម្ចាស់រថយន្តប្តីប្រពន្ធតុលាការខេត្តព្រៃវែងបានចោទប្រកាន់ និងចេញដីកាឃុំខ្លួនបណ្តោះអាសន្ននៅពន្ធនាគារខេត្តព្រៃវែងរួចរាល់ហើយ ។ ចំណែកជនជាតិចិន១៣នាក់ ដែលក្រឡាប់រថយន្តនៅក្រុងស្វាយរៀងខេត្តស្វាយរៀងវិញ លទ្ធផលយកសំណាកទៅធ្វើតេស្តរកកូវីដ១៩នោះមិនទាល់ទទួលបានលទ្ធផលនៅឡើយទេ និងកំពុងធ្វើចត្តាឡីស័កបន្ត និងមិនទាន់ដឹងថា ចិនទាំង១៣នាក់នេះ មកពីណាដែរ សមត្ថកិច្ចកំពុងតាមប្រម៉ាញ់អ្នកបើកបររថយន្ត ដើម្បីសាកសួរ ៕
ចែករំលែកព័តមាននេះ