សហរដ្ឋអាមេរិក ៖ ស្តេចប្រដាល់អាមេរិក Floyd Mayweather បានអះអាងថាការប្រកួតរបស់គេទល់នឹងកំពូលតារាយូធូបអាមេរិក Logan Paul ដែលត្រូវបានពន្យារពេល ដោយសារតែគេចង់ឱ្យជំនួបនេះធ្វើឡើងដោយមានអ្នកទស្សនា៨ម៉ឺននាក់ នៅឯកីឡដ្ឋាន Allegiant ក្នុងទីក្រុងឡាសវេហ្គាស (Las Vegas)។
ដើមឡើយជំនួបដ៏ធំដែលមិនមែនអាជីពមួយនេះ ត្រូវធ្វើឡើងកាលពីថ្ងៃទី២០ ខែកុម្ភៈ ឆ្នាំ២០២១ ប៉ុន្តែដោយសារតែការរឹតត្បិតវិធានការកូវីដ១៩ ការប្រកួតនេះត្រូវធ្វើឡើងដោយគ្មានអ្នកទស្សនា។ ភាគីទាំងសងខាងបានសម្រេចពន្យារពេល ដោយសារតែពួកគេចង់ឱ្យជំនួបនេះធ្វើឡើងដោយមានអ្នកទស្សនា។ ហើយបច្ចុប្បន្ននៅមិនទាន់មានការអះអាងណាមួយជុំវិញ កាលបរិច្ឆេទការប្រកួតថ្មីនៅឡើយទេ។
កំពូលអ្នកប្រដាល់មិនទាន់ស្គាល់ចាញ់ Floyd Mayweather បាននិយាយថា «យើងត្រូវធ្វើការប្រកួតជាមួយ Logan Paul ប៉ុន្តែវាត្រូវបានពន្យារពេលទៅវិញ។ ដោយសារតែយើងចង់បានទស្សនិកជន៨ម៉ឺននាក់មកមើលការប្រកួតនេះ។ ហើយយើងកំពុងព្យាយាមធ្វើវានៅឯកីឡដ្ឋាន Allegiant ដែលមានសមត្ថភាពផ្ទុកអ្នកទស្សនា៨ម៉ឺននាក់»៕ (ដកស្រង់ចេញពី The Sun)
ចែករំលែកព័តមាននេះ