រាជធានីភ្នំពេញ ៖ តារាចម្រៀងនាង សួស វីហ្សា បានបង្ហាញតម្រុយថ្មីមួយ ដោយត្រៀមខ្លួនវិលមកកាន់ក្បាលមេក្រូច្រៀងជាថ្មី បន្ទាប់ពីនាងបានសម្ងំសម្រាលកូនស្រីមួយរូប ក្រោយពីបានចូលរោងការជាមួយតារាសម្តែងប្រុសលោកថមមី ដែលរហូតមកទល់ពេលនេះមានរយៈពេលប្រមាណជាងមួយឆ្នាំហើយ។
ក្រោយពីចាប់ដៃគ្នាកសាងគ្រួសារនោះមក សួស វីហ្សា បានសម្រេចព្យួរការងារសិល្បៈរបស់នាងមួយរយៈ ដោយសារតែនាងចង់ទុកពេលសម្រាប់គ្រួសារ និងមើលថែកូនស្រីរបស់ខ្លួនឲ្យបានរឹងមាំជាមុនសិន មុនពេលដែលនាងឈានមករកអាជីពចម្រៀងរបស់នាងឡើងវិញ។
យ៉ាងណា រហូតមកទល់នាពេលនេះ បើទោះបីជាកូនដែលបានចាប់កំណើត និងចម្រើនវ័យកាន់តែធំបន្តិចក្តី ប៉ុន្តែតារាចម្រៀងរូបនេះ នៅមិនទាន់វិលត្រឡប់មកអាជីពសិល្បៈរបស់នាងជាថ្មីឡើងវិញនៅឡើយទេ ខណៈពេលដែលបទចម្រៀងថ្មីៗរបស់នាងក៏នៅមិនទាន់បានចេញនៅលើទីផ្សារនៅឡើយដែរ។
យ៉ាងណា បើតាមការអះអាងរបស់ សួស វីហ្សា អំឡុងពេលនេះនាងនៅមិនទាន់អាចឡើងឆាកច្រៀងរាំបាននៅឡើយទេ ហើយនាងក៏មានការសោកស្តាយផងដែរ ក្នុងពេលដែលនាងបានធ្វើការបដិសេធមិនទាន់ទទួលយកការហៅច្រៀងតាមឆាកតន្ត្រីនានា ដោយឈរលើហេតុផលមួយ។
នាងបញ្ជាក់ថា នាងអាចនឹងបង្ហាញវត្តមានច្រៀងលើឆាកតន្ត្រីនានាជាថ្មីឡើងវិញ នៅក្នុងពេលឆាប់ខាងមុខនេះ ដោយសារតែនាងត្រូវទុកពេលមួយរយៈខ្លីទៀត ដើម្បីធ្វើការបញ្ចុះទម្ងន់ ដោយសារតែពេលនេះនាងមានការឡើងគីឡូខ្លាំងក្រោយសម្រាលកូន។
តារាចម្រៀងនាង សួស វីហ្សា បានបង្ហោះសារតាមគណនេយ្យហ្វេសប៊ុករបស់ខ្លួនថា សុំទោសចំពោះបងៗអ្នករៀបចំកម្មវិធីប្រគំតន្ត្រីនានា ដែលខ្ញុំបដិសេដរាល់ការអញ្ជើញ ព្រោះបើពេលនេះខ្ញុំមានរាងប្រហែលតែក្នុងរូបថតនេះ ខ្ញុំនឹងទទួលឡើងច្រៀង ឡើងរាំមិនប្រកែកទេ តែបើឥឡូវចង្កេះនៅក្លៀក ក្លៀកនៅ.កនៅឡើយ តើឱ្យទៅហក់លោតរាំច្រៀងតាមណាបង? នាងបញ្ជាក់ថា ខ្ញុំសុំពេលកន្លះខែទៀត អូខេ ព្រោះឥឡូវស្រកបាន20គីឡូហើយ សុំ5គីឡូទៀត ឆឺតៗម៉ង ឆឺតៗ ឆឺតៗ។
ជាការកត់សម្គាល់ នេះជាលើកដំបូងហើយសម្រាប់នាង សួស វីហ្សា ដែលបានបង្ហាញតម្រុយពីការត្រៀមវិលចូលអាជីពចម្រៀងរបស់នាងជាថ្មីឡើងវិញ បន្ទាប់ពីនាងបានសម្ងំរួមរស់ជាមួយស្វាមី និងកូនដំបូងរបស់នាងយ៉ាងមានសុភមង្គលដោយមិនបាននឹកនាសិល្បៈនោះឡើយ។
ទោះជាយ៉ាងណា ការប្រកាសពីការវិលត្រឡប់មកកាន់អាជីពសិល្បៈរបស់ សួស វីហ្សា នាពេលនេះ ក៏ទទួលបានការអបអរ និងស្វាគមន៍ពីសំណាក់ប្រិយមិត្តគាំទ្ររបស់នាងជាច្រើនផងដែរ ក្នុងពេលដែលពួកគេកំពុងតែរង់ចាំពីការស្តាប់នូវបទថ្មីៗរបស់នាងបន្ថែមទៀតដែរ។
គេរំពឹងថា ការវិលរកអាជីពសិល្បៈចម្រៀងជាថ្មីឡើងវិញពីសំណាក់នាង សួស វីហ្សា នាពេលនេះ នាងអាចនឹងទទួលបានការគាំទ្រ និងពេញនិយមដដែលពីសំណាក់ទស្សនិកជន ដោយសារតែកន្លងមក បទចម្រៀងរបស់នាងជាច្រើនបានផ្ទុះ និងទទួលការគាំទ្រច្រើននៅលើទីផ្សារ និងទស្សនិកជនអ្នកស្តាប់។
គួរបញ្ជាក់ថា តារាចម្រៀងនាង សួស វីហ្សា បានសម្រេចផ្អាកអាជីពសិល្បៈរបស់នាងទាំងស្រុង បន្ទាប់ពីនាងបានសម្រេចចូលរោងការជាមួយតារាសម្តែងលោក ថមមី កាលពីអំឡុងខែវិច្ឆិកា ឆ្នាំ២០១៩ ដែលមកដល់ពេលនេះអ្នកទាំងពីរទទួលបានកូនស្រីម្នាក់ជាចំណងដៃរួចហើយ៕
ចែករំលែកព័តមាននេះ