រាជធានីភ្នំពេញ ៖ មហាជនជាពិសេសបណ្តាអ្នកគាំទ្របានសម្តែងការភ្ញាក់ផ្អើលយ៉ាងខ្លាំង ក្នុងពេលដែលតារាសម្តែងនាង អាង សុជាតា បានបង្ហោះរូបភាពភ្ជាប់ពាក្យរបស់ខ្លួន ជាមួយតារាចម្រៀងចំណូលថ្មីលោក សំ សុវណ្ណារ៉ាក់ តាមបណ្តាញសង្គមហ្វេសប៊ុក ខណៈពេលដែលតារារូបនេះកំពុងតែមានទីផ្សារខ្ពស់នៅក្នុងអាជីពសម្តែងរយៈពេលប៉ុន្មានឆ្នាំចុងក្រោយនេះ។
រូបភាពដែល អាង សុជាតា បានបង្ហោះនោះត្រូវបានគេចែកចាយពេញបណ្តាញសង្គមហ្វេសប៊ុក ជាមួយនឹងការភ្ញាក់ផ្អើល និងនាំគ្នាជជីកសួរជាបន្តបន្ទាប់ ជុំវិញការភ្ជាប់ពាក្យរបស់តារារូបនេះថា តើវាជាការពិតឬយ៉ាងណា? ក្នុងពេលដែល អាង សុជាតា ហាក់មិនទាន់លេចលឺពីដំណឹងស្នេហាជាមួយអ្នកណាម្នាក់នៅឡើយនោះ។
យ៉ាងណា ការសាកសារពីមហាជន ជាពិសេសបណ្តាលអ្នកលេងហ្វេសប៊ុកទាំងអស់នោះ ហាក់មិនទទួលបានការឆ្លើយតបជាវិជ្ជមានណាមួយពីសាម៉ីខ្លួននោះឡើយ ក្នុងពេលដែលទាំង អាង សុជាតា និងលោក សំ សុវណ្ណារ៉ាក់ បានភ្ជាប់សារជាមួយរូបថតនោះច្បាស់ស្រដៀងគ្នាថា «អរគុណសម្រាប់ថ្ងៃនេះ លាហើយភាពនៅលីវ 12.01.2021 ល្ងាចនេះ គឺជាថ្ងៃពិសេសរបស់យើងខ្ញុំទាំងពីនាក់សុំពាក្យជូនពរ ពីបងប្អូនម្នាក់មួយមក»។
តាមរយៈសារមួយនេះ បានធ្វើឲ្យមហាជនមួយចំនួនកាន់តែមានភាពជឿជាក់ថា តារាទាំងពីរពិតជាបានភ្ជាប់ពាក្យជាមួយគ្នាពិតមែន ដោយសារពួកគេទាំងពីរពិតជាមានភាពសាកសមនឹងគ្នា ព្រោះនៅវ័យក្មេងដូចគ្នា និងជាអ្នកសិល្បៈដូចគ្នា ។ ប៉ុន្តែក៏មានមហាជនខ្លះក៏មានការយល់ឃើញខុសគ្នាដែរថា រូបភាពសកម្មភាពទាំងអស់នោះ គឺមិនមែនជាការភ្ជាប់ពាក្យពិតប្រាកដនោះឡើយ ពោលគឺគ្រាន់តែជាការសម្តែងនៅក្នុងបទចម្រៀង ឬក៏សាច់រឿងណាមួយប៉ុណ្ណោះ ព្រោះសកម្មភាពនេះ មិនមែនជារឿងថ្មីនោះឡើយ សម្រាប់អ្នកសិល្បៈដែលចូលចិត្តបង្អើលទស្សនិកជន។
យ៉ាងណាជុំវិញបញ្ហាខាងលើនេះ ម្តាយរបស់ អាង សុជាតា គឺអ្នកនាង ផាន់ ផាភួង បានអះអាងប្រាប់កោះសន្តិភាពតាមសារអេឡិចត្រូនិចថា អ្វីដែលកូនស្រីរបស់នាងបានបង្ហោះរូបភាពភ្ជាប់ពាក្យជាមួយនឹងតារាចម្រៀងលោក សំ សុវណ្ណារ៉ាក់ នោះគឺជាការសម្តែងនៅក្នុងរឿងប៉ុណ្ណោះ ពោលគឺមិនមែនជារឿងពិតនោះឡើយ។
អ្នកនាងបញ្ជាក់ថា រូបភាពដែលបានឃើញនេះ គឺជាឈុតភ្ជាប់ពាក្យរបស់ អាង សុជាតា ដែលបានសម្តែងរឿងភាគមួយឲ្យស្ថានីយទូរទស្សន៍ហង្សមាស ដែលនាងជាតួឯក ចំណែកតួឯកប្រុសមានពីរ គឺលោក សំ សុវណ្ណារ៉ាក់ និងតារាចម្រៀងលោក ដួង វីរៈសិទ្ធ។
អ្នកនាងថា រឿងនេះ អាង សុជាតា ត្រូវដើរតួពីរ គឺតួស្លូតផង និងតួកាចផង ចំណែកចំណងជើងរឿងអ្វីនោះអ្នកនាងមិនអាចបញ្ជាក់បានឡើយ ដោយសារខាងក្រុមហ៊ុនគេរក្សាសិទ្ធិមិនទាន់ឲ្យបញ្ចេញនាពេលនេះឡើយ។
យ៉ាងណាក៏ដោយ បើតាម អ្នកនាង ផាន់ ផាភួង អ្វីដែល អាង សុជាតា និងលោក សំ សុវណ្ណារ៉ាក់ បានបង្ហោះដោយភ្ជាប់ជាមួយសារនោះ គឺជាការនិយាយលេងប៉ុណ្ណោះ ដោយសារតែទាំង អាង សុជាតា និង សំ សុវណ្ណារ៉ាក់ ឃើញរូបភាពនោះមានភាពស្រស់ស្អាតក៏នាំគ្នាលេងសើចបែបនេះតែម្តង សូមកុំមានការយល់ច្រឡំ។
ជាការកត់សម្គាល់ អាង សុជាតា ហៅឈូឈូ ត្រូវបានគេមើលឃើញថា នាងគឺជាតារាជើងថ្មីមួយរូបដែលកំពុងទទួលបានទីផ្សារខ្ពស់នៅក្នុងអាជីពសម្តែងនៅក្នុងរយៈពេលចុងក្រោយនេះ បន្ទាប់ពីនាងត្រូវបានផលិតករផ្តល់ឱកាសឲ្យសម្តែងតាំងពីកុមារភាព។ រហូតមកទល់ពេលនេះ អាង សុជាតា បានចម្រើនវ័យកាន់តែពេញក្រមុំ និងមានភាពស្រស់ស្អាតយ៉ាងខ្លាំង ហើយនាងក៏មានឱកាសជាបន្តបន្ទាប់ ដណ្តើមទីផ្សារជាតួឯងនៅក្នុងខ្សែភាពយន្ត និងការសម្តែងក្នុងបទចម្រៀងជាបន្តបន្ទាប់ មិនចាញ់តារាមួយចំនួនដែលកំពុងមានទីផ្សារខ្ពស់ដូចគ្នានោះឡើយ៕
ចែករំលែកព័តមាននេះ