ខេត្តកណ្តាល ៖ ចោរស្រីម្នាក់ ក្នុងចំណោម២នាក់ត្រូវបានសមត្ថកិច្ចចាប់ឃាត់ខ្លួន បន្ទាប់ពីធ្វើសកម្មភាពដើរលូកហោប៉ៅអាវយកលុយពីពលរដ្ឋនៅក្នុងផ្សារ។ ហេតុការណ៍នេះបានកើតឡើងនៅថ្ងៃទី១០ ខែមករា ឆ្នាំ២០២០ វេលាម៉ោង០៩និង០០នាទី នៅចំណុចក្នុងផ្សារកំពង់កន្ទួត ស្ថិតក្នុងភូមិស្វាយមីង ឃុំបារគូ ស្រុកកណ្តាលស្ទឹង ខេត្តកណ្តាល។
ជនរងគ្រោះខាងលើឈ្មោះ មាស ស្រីនាង ភេទស្រី អាយុ៣០ឆ្នាំ មានទីលំនៅភូមិរោងគោឃុំទ្រា ស្រុកកណ្តាលស្ទឹង ខេត្តកណ្តាល មុខរបរកម្មការនីរោងចក្រ ចំណែកជនសង្ស័យឈ្មោះ លី ភា ភេទស្រី អាយុ៣៦ឆ្នាំ ស្នាក់នៅផ្ទះជួល ក្នុងភូមិប្រប្រកខាងជើង សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ មុខរបរពុំពិតប្រាកដ។
បើតាមមន្ត្រីនគរបាលស្រុកកណ្តាលស្ទឹង បានអោយដឹងថា៖ មុនកើតហេតុ នៅថ្ងៃទី១០ ខែ មករា វេលាម៉ោង៨និង២០នាទីព្រឹក ជនរងគ្រោះបានជិះម៉ូតូចេញពីផ្ទះមកផ្សារកំពង់កន្ទួត ដើម្បីទិញខោអាវ និងម្ហូបអាហារ ។
ប្រភពដដែលបន្តថា លុះពេលមកដល់ផ្សារជនរងគ្រោះបានទិញខោអាវ ធូប ទៀន និងដើរទិញផ្លែឈើ ស្រាប់តែជនសង្ស័យបានមកលូកដៃ រួចលួចលុយក្នុងហោប៉ៅអាវជនរងគ្រោះ គឺលុយដុល្លារចំនួន២៧០ដុល្លារ និងលុយខ្មែរ ចំនួន១៤២០០០០រៀល។
ប្រភពដដែលបន្តទៀតថា ក្រោយពីជនសង្ស័យរួចបានហើយ ក៏ហុចលុយនេះបន្តឱ្យទៅបក្សពួកម្នាក់ទៀត ឈ្មោះ យួន ភេទស្រី យកទៅ រួចរត់គេចខ្លួនបាត់។ ចំណែកជនសង្ស័យត្រូវបានជនរងគ្រោះចាប់បាន រួចប្រគល់ឱ្យនគរបាលបុស្តិ៍បារគូ ដើម្បីបញ្ជូនមកអធិការដ្ឋាននគរបាលស្រុកកណ្តាលស្ទឹង ចាត់ការតាមនីតិវិធីច្បាប់។
ចែករំលែកព័តមាននេះ