ប្រទេសឥណ្ឌូណេស៊ី ៖ អ្នកទទួលខុសត្រូវម្នាក់នៃកងទ័ពឥណ្ឌូណេស៊ី បានគូសបញ្ជាក់នាថ្ងៃទី១០ ខែមករា ឆ្នាំ២០២១នេះថា នាវាមួយគ្រឿងរបស់កងម៉ារីនឥណ្ឌូណេស៊ី កាលពីថ្ងៃទី១០ មករា ចាប់បានសញ្ញាមួយពីយន្តហោះប៊ូអ៊ីង…
ប្រទេសឥណ្ឌូណេស៊ី ៖ អ្នកទទួលខុសត្រូវម្នាក់នៃកងទ័ពឥណ្ឌូណេស៊ី បានគូសបញ្ជាក់នាថ្ងៃទី
១០ ខែមករា ឆ្នាំ២០២១នេះថា នាវាមួយគ្រឿងរបស់កងម៉ារីនឥណ្ឌូណេស៊ី កាលពីថ្ងៃទី១០ មករា ចាប់បានសញ្ញាមួយពីយន្តហោះប៊ូអ៊ីង 737-500 ដែលធ្លាក់ក្នុងសមុទ្រ នៃដែនទឹករដ្ឋធានីក្រុងហ្សាការតា កាលពីថ្ងៃទី៩ ខែមករា កន្លងទៅ ជាមួយមនុស្សជិះក្នុងនោះ៦២នាក់ ។
ក្រោយចាប់បានសញ្ញានោះ ក្រុមអ្នកមុជទឹក ចាប់ផ្ដើមចុះ និងតាមរកឃើញបំណែកយន្តហោះក៏ដូចជាបំណែកដែលមានចារលេខយន្តហោះ ។ ក្រសួងដឹកជញ្ជូនឥណ្ឌូណេស៊ីក្នុងសេចក្ដីប្រកាសមួយមិនបានបញ្ជាក់ថា តើសញ្ញានោះចេញពីប្រអប់ខ្មៅនៃយន្តហោះឬយ៉ាណាឡើយ?
កាលពីថ្ងៃទី៩ ខែមករា នាវេលាម៉ោង៧ និង៤០នាទីព្រឹកម៉ោងក្នុងស្រុក មានយន្តហោះធុនប៊ូអ៊ីង 737-500 របស់ក្រុមហ៊ុនអាកាសចរណ៍ឥណ្ឌូណេស៊ី SRIWIJAYA AIRS នោះបានបាត់ការទាក់ទងក្រោយហោះចេញបានប្រមាណ៤នាទី ។ យន្តហោះនោះដឹកអ្នកដំណើរ៥៣នាក់ និងសមាជិកក្រុមយានិក១២នាក់ ហើយត្រូវហោះហើរពីក្រុងហ្សាការតាទៅកាន់ក្រុង PONTIANAK ស្ថិតនៅផ្នែកឥណ្ឌូណេស៊ីនៃកោះប័រណេអូ ។
យន្តហោះដែលធ្លាក់នោះជាយន្តហោះដឹកជញ្ជូនក្នុងស្រុក ក្រោយការធ្លាក់បំណែកមនុស្សក៏ដូចជាបំណែកយន្តហោះ ត្រូវបានរកឃើញនាថ្ងៃទី១០ ខែមករា ឆ្នាំ២០២១នេះ ក្នុងដែនទឹកក្រុងហ្សាការតា ។ រហូតមកទល់ពេលនេះ អាជ្ញាធរនៅមិនទាន់ផ្ដល់នៅឡើយពីមូលហេតុនៃគ្រោះថ្នាក់នោះ។ ហើយប្រតិបត្តិការរុករកដ៏ធំមួយនេះត្រូវបានធ្វើ ខណៈគេមិនសង្ឃឹមរកឃើញអ្នកអាចនៅរស់រានមានជីវិតជាយថាហេតុឡើយ ។
អ្នកនាំពាក្យម្នាក់របស់ប៉ូលិសនិយាយថា នាព្រឹកថ្ងៃទី១០ មករា យើងទទួលបានថង់២ ថង់មួយដាក់របស់របរនានាដែលជារបស់អ្នកដំណើរ ហើយថង់មួយទៀតមានបំណែកសាកសពមនុស្ស។
នាវាសង្គ្រោះជាច្រើនគ្រឿងរបស់កងទ័ព ព្រមទាំងបណ្ដាឧទ្ធម្ភាគចក្រ ព្រមទាំងបណ្ដាអ្នកមុជទឹកត្រូវបានដាក់ពង្រាយ ។ នាវាចម្បាំង១០គ្រឿងបានចូលរួមក្នុងប្រតិបត្តិការរុករក ហើយបណ្ដាបំណែកដំបូងៗត្រូវបាននាំមកកាន់កំពង់ផែក្រុងហ្សាការតាឬប៉ុស្តិ៍សង្គ្រោះមួយ ៕ ដកស្រង់ចេញពីវេបសាយ ៖ ouest-france
ចែករំលែកព័តមាននេះ