ខេត្តសៀមរាប ៖ ក្រុមកសិករនៃគម្រោងកសិទេសចរណ៍បានសាកល្បងដាំឪឡឹកលឿងនៅក្នុងស្រុកបន្ទាយស្រីកន្លះហិកតាកំពុងតែប្រមូលផលពីការខិតខំប្រឹងប្រែងរបស់ខ្លួនបណ្តើរៗហើយ ឈានដល់ដីមួយហិកតា ព្រោះកំពុងមានការជួយជ្រោមជ្រែងពីអាជ្ញាធរស្រុក ក៏ដូចជាប្រជាពលរដ្ឋនៅទូទាំងខេត្តសៀមរាប បានគាំទ្រដល់ពួកគាត់ផងដែរ។ សូមបញ្ជាក់ថា ទីតាំងដាំឪឡឹកលឿងនោះមានចម្ងាយពីទីប្រជុំជនក្រុងសៀមរាបប្រមាណ២៥ គីឡូម៉ែត្រ ដែលមានទីតាំងនៅក្រោយសាលាឃុំព្រះដាក់។
ក្រុមគ្រួសារដាំឪឡឹក (ប្តី)ឈ្មោះ ប៉ែត អាន អាយុ៥៧ឆ្នាំ ប្រពន្ធ មីង ឡាយ អាយុ៥៥ឆ្នាំ មានទីមុខរបរកសិករ លំនៅក្នុងភូមិអូរទទឹង ឃុំព្រះដាក់ ស្រុកបន្ទាយស្រី ខេត្តសៀមរាប បានរៀបរាប់ប្រាប់ភ្នាក់ងារកោះសន្តិភាពថា ការដាំឪឡឹកមុនដំបូង ពួកខ្ញុំដាំតែឪឡឹកក្រហមទេ ហើយចប់ពីដាំឪឡឹកមកធ្វើស្រែចម្ការ ដោយមិនសូវបានផល ក៏ងាកមកសាកល្បងដាំឪឡឹកលឿង នៅលើផ្ទៃដីកន្លះហិកតា បានរយៈពេល៧០ថ្ងៃ ក៏បានប្រមូលផលយកមកលក់ ប៉ុន្តែមិនទាន់មានទីផ្សារ។
ក្រោយមកបានលឮដំណឹងដល់អាជ្ញាធរស្រុក ពេលនោះក៏ឃើញមានវត្តមាន លោក ឃឹម ហ្វីណង់ អភិបាលស្រុកបន្ទាយស្រី ដឹកនាំក្រុមការងារ ចុះមកដល់ចម្ការឪឡឹករបស់គាត់តែម្តង ហើយលោកក៏បានធ្វើការផ្សព្វផ្សាយ ព្រមទាំងបានជួយបង្ហោះនៅលើផេកហ្វេកបុករបស់ លោកទៀតផង ធ្វើឱ្យពួកគាត់មានចំណូលកាន់តែច្រើន។ ដូច្នេះលោក បានជួយឱ្យពួកខ្ញុំទិញដីបន្ថែមកន្លះហិកតាទៀត។ លោកបានរៀបរាប់បន្ថែមថា គ្រាប់ពូជឪឡឹកលឿង ដែលពួកខ្ញុំ ទិញយកមកធ្វើពូជនេះពីក្នុងក្រុងសៀមរាប យកមកសាកល្បងដាំនោះរបស់មុនដំបូងប្រើគ្រាប់ពូជ៧ ខាំ តម្លៃជាង២០ម៉ឺនរៀល ក្នុងផ្ទៃដីកន្លះហិកតា ក្រោយពីបានផល ពួកគាត់លក់ទៅឱ្យអតិថិជន ក្នុង១គីឡូ៤០០០រៀល វិញ។
លោក ឃឹម ហ្វីណង់ អភិបាលស្រុកបន្ទាយស្រី បានមានប្រសាសន៍ប្រាប់ភ្នាក់ងារកោះសន្តិភាពនៅរសៀលថ្ងៃទី១៣ ខែធ្នូ ឆ្នាំ២០២០នេះថា បើទោះជាពួកគាត់ ទើបតែដាំបានក្នុងទំហំជាលក្ខណៈគ្រួសារនៅឡើយក៏ដោយ ហើយនៅមានកត្តាបច្ចេកទេសខ្លះទៀតត្រូវកែលម្អបន្ថែម ឪឡឹកទាំងអស់នេះទទួលបានការពេញចិត្ត និងចាប់អារម្មណ៍ខ្លាំងពីសំណាក់អ្នកពិសារ ព្រមទាំងបានឆ្លុះបញ្ចាំងពីសក្តានុពលដ៏ធំនៃការធ្វើកសិទេសចរណ៍នៅក្នុងស្រុកបន្ទាយស្រី និងកាលានុវត្តភាពសម្រាប់អ្នកវិនិយោគផងដែរ។
ជាផ្នែកមួយនៃយុទ្ធសាស្ត្រប្រែក្លាយកសិកម្មនៅក្នុងស្រុកបន្ទាយស្រីឱ្យទៅជាដែនដីកសិទេសចរណ៍ដ៏គួរឱ្យទាក់ទាញមួយនេះ។ គម្រោងសាកល្បង របស់ពួកគាត់ មុនដំបូងប្រើគ្រាប់ពូជឪឡឹកលឿង ចំនួន ៧ខាំ តម្លៃជាង២០ម៉ឺនរៀល ពីផ្សារក្នុងក្រុងសៀមរាប ក្នុងផ្ទៃដីកន្លះហិកតា ស្ថិតនៅក្នុងចង្កោមនៃគំនិតផ្តួចផ្តើមជាច្រើនទៀតដែលរដ្ឋបាលស្រុកបានសហការជាមួយអង្គការដៃគូ និងអ្នកបច្ចេកទេសកសិកម្ម ដើម្បីតម្រង់ទិស និងផ្តល់ជំនួយគាំទ្រទាំងផ្នែកបច្ចេកទេស និងផ្នែកទីផ្សារ សំដៅធ្វើយ៉ាងណាឱ្យសហគមន៍កសិករនៅក្នុងស្រុកមានភាពជឿជាក់ និងអាចឈោងចាប់យកសក្តានុពលនៃការធ្វើកសិកម្មសម្រាប់បម្រើឱ្យវិស័យទេសចរណ៍បាន។
គួរបញ្ជាក់ថា កសិទេសចរណ៍ពាក់ព័ន្ធនឹងការដាំកសិផលទាំងឡាយណាដែលមានភាពទាក់ទាញសម្រាប់អ្នកទេសចរណ៍ ដូចជាប្រភេទបន្លែផ្លែឈើ ឬការចិញ្ចឹមសត្វដែលមានភាពប្លែកប្រចាំតំបន់ និងតាមបែបធម្មជាតិជាដើម។ ភាគច្រើនតែងលក់បានក្នុងតម្លៃថ្លៃតែក៏តម្រូវឱ្យមានការចំណាយទុនខ្ពស់ជាងកសិកម្មប្រភេទដទៃទៀតផងដែរ ដែលជាហេតុទាមទារឱ្យមានការតម្រង់ទិស ការលើកទឹកចិត្តការផ្សព្វផ្សាយ និងការគាំទ្រដល់ប្រជាកសិករនៅក្នុងស្រុក ព្រោះការផ្លាស់ប្តូរទម្លាប់ និងការព្រមទទួលយកហានិភ័យពីភាពស្រពេចស្រពិលនៃទម្រង់កសិកម្មថ្មី មិនមែនជាភាពងាយស្រួលនោះឡើយ។
តួយ៉ាង ដូចជាការប្តូរពីការដាំឪឡឹកចម្ការដែលពិបាករកទីផ្សារ(មានទំហំតូច គ្រាប់ច្រើន និងពណ៌ផ្កាឈូកស្លេកៗ) មកដាំឪឡឹកពូជ ដែលមានតម្រូវការខ្ពស់សម្រាប់វិស័យទេសចរណ៍ជាដើម(ធំជាង ផ្អែមជាង ពណ៌ដិតជាង និងមានគ្រាប់តិច)។ ក្រៅពីឪឡឹកលឿង នៅមានឪឡឹកពូជប្រភេទផ្សេងៗទៀត ដែលកំពុងស្ថិតក្នុងដំណាក់កាលសាកល្បងផងដែរ។ កន្លងមក គំនិតផ្តួចផ្តើមជាច្រើនត្រូវបានបង្កើតឡើងក្នុងគោលបំណងជំរុញ និងផ្សព្វផ្សាយពីចក្ខុវិស័យកសិទេសចរណ៍ និងបង្កើតឱ្យមានផ្លែឈើតំបន់ និងម្ហូបអាហារតំបន់ ដូចជាការចែក និងដាំដើមឈើហូបផ្លែ(ត្រសក់ផ្អែម ទុរេន សាវម៉ៅ ឪឡឹកពូជ ក្រូចឆៃវ៉ាន់ តាង៉ែន ល្ហុងហូល្លង់ លម៉ើ ខ្នុរការ៉ុត) ការដាំបន្លែធម្មជាតិ និងការចិញ្ចឹមសត្វ (ជ្រូកកណ្តុរ ពពែ មាន់ស្រែ មាន់ព្រៃ ឃ្មុំ)ជាដើម៕ ដោយ ៖ ច័ន្ទ រស្មី
ចែករំលែកព័តមាននេះ