ខេត្តកំពង់ឆ្នាំង ៖ ជុំវិញការសាងសង់ផ្សារឆ្នុកទ្រូ ស្រុកបរិបូរណ៍ដែលដាក់ឈ្មោះថា៖(ផ្សារសមុទ្រទឹកសាបឆ្នុកទ្រូ) ដែលកន្លងទៅត្រូវបានអាជីវករលើកឡើងថា៖ តូបក្នុងផ្សារនេះ ជួលថ្លៃណាស់ គ្មានលទ្ធភាពចូលទិញ ឬជួលឡើយ សុខចិត្តនៅលក់តាមផ្លូវមាត់ទឹកដូចសព្វដងវិញ។…
ខេត្តកំពង់ឆ្នាំង ៖ ជុំវិញការសាងសង់ផ្សារឆ្នុកទ្រូ ស្រុកបរិបូរណ៍ដែលដាក់ឈ្មោះថា៖(ផ្សារសមុទ្រទឹកសាបឆ្នុកទ្រូ) ដែលកន្លងទៅត្រូវបានអាជីវករលើកឡើងថា៖ តូបក្នុងផ្សារនេះ ជួលថ្លៃណាស់ គ្មានលទ្ធភាពចូលទិញ ឬជួលឡើយ សុខចិត្តនៅលក់តាមផ្លូវមាត់ទឹកដូចសព្វដងវិញ។ ប៉ុន្តែការលើកឡើងបែបនេះ ត្រូវបានអាជ្ញាធរឃុំឆ្នុកទ្រូ បដិសេធថា៖ មិនពិតទេ មានអ្នកចូលទិញប្រមាណ៨០%ហើយក្នុងចំណោមតូបក្នុងផ្សារជាង២០០តូប ហើយនឹងចូលលក់ព្រមគ្នានៅបំណាច់ឆ្នាំ២០២០នេះពេលតូបទាំងអស់បានសាងសង់រួច។
មេឃុំឆ្នុកទ្រូ លោក សាំង គីមស៊ន បានបញ្ជាក់ប្រាប់ឱ្យដឹងថា៖ មកដល់ពេលនេះមានអាជីវករបានចូលមកចុះឈ្មោះជួលតូប លក់ដូរ ក្នុងផ្សារសមុទ្រទឹកសាប ជាង៨០%ហើយ នៅសល់តែប្រមាណ២២ តូបប៉ុណ្ណោះ ដែលអាជីវករមិនព្រមចូលមកចរចាជួល។ អាជីវករដែលមិនទាន់ចូលមកជួលតូប ទាំងនោះបានលើកឡើងថា៖ តូបក្នុងផ្សារមានតម្លៃថ្លៃគ្មានលទ្ធភាពទិញឬជួលឡើយ។ ចំណុចនេះលោកសូមបញ្ជាក់ថា៖ បើបងប្អូនពិតជាខ្វះខាតពិតមែន សូមចូលមកសុំចរចាជាមួយក្រុមហ៊ុន ក្រុមហ៊ុននឹងបន្ធូបន្ថយឲ្យ ហើយឱ្យតែបងប្អូនចូលមកចរចាសុំបញ្ចុះថ្លៃ។ លោក សាំង គីមស៊ន បានបញ្ចាក់ថា៖
កាលដើមឡើយបងប្អូនអាជីវករលក់ដូរតាមមាត់ទឹក ត្រូវរើឡើងចុះរត់តាមទឹក ក្នុង១ឆ្នាំ៦ដង គឺខែទឹកឡើង៣ដងនិងខែទឹកស្រក៣ដង។ ក្នុង១ដងត្រូវចំណាយប្រាក់ពី៣០ទៅ៤០ម៉ឺនរៀល ឬច្រើនជាងនេះ តាមតូបតូចធំ ។ ដោយហេតុនេះហើយ គ្រាដែលមានប្រជាពលរដ្ឋរស់នៅផ្ទះបណ្តែតទឹក ត្រូវបានរៀបចំឱ្យរស់នៅលើគោក ទើបយើងរៀបចំកសាងផ្សារមួយ ឈ្មោះផ្សារសមុទ្រទឹកសាបឆ្នុកទ្រូ ដើម្បីឱ្យអាជីវករទាំងនោះចូលលក់ដូរមានលំនឹង មិនពិបាករត់តាមទឹកទៀតនោះទេ។
ផ្សារថ្មីដែលកំពុងធ្វើតូបលក់ដូរនេះដែរ ធ្វើតាមស្តង់ដា មានខ្យល់ចេញចូល មានផាសុកភាព មានបង្គន់អនាម័យ ដែលសាងសង់ឡើងផុតទឹកទៀតផង។ អាជីរករដែលចូលលក់មុនគេបានបញ្ជាក់ថា៖ តម្លៃដែលពួកគាត់បានជួលក្នុងតូបមួយថ្លៃ៣៥ដុល្លារ ក្នុង១ខែ ។ ប៉ុន្តែត្រូវកក់ចំនួន១៥០០ដុល្លារ សម្រាប់ការជួលតូបក្នុងរយៈពេល៣ឆ្នាំ។
ពេលផុតរយៈពេល៣ឆ្នាំ បើអាជីវករណាមិនជួលបន្តទៀតនោះទេ ក្រុមហ៊ុននឹងសងប្រាក់កក់នោះមកពួកគាត់វិញ តែបើនៅជួលបន្ត ប្រាក់កក់ នឹងតម្កល់រហូតពេលអាជីវករឈប់ជួល គ្រាន់តែត្រូវបង់ថ្លៃជួលតូប១ខែ៣៥ដុល្លារប៉ុណ្ណោះ។ សូមបញ្ជាក់ដែរថា៖ ផ្សារសមុទ្រទឹកសាបឆ្នុកទ្រូនេះ រង់ចាំតែសាងសង់តូបរួចរាល់ អាជីវករនឹងចូលលក់ជាមិនខាន ចំណែកអាជីរករនៅសេសសល់ដែលថាខ្វះលទ្ធភាពក៏ក្រុមហ៊ុនត្រៀមកន្លែងសម្រាប់ឱ្យពួកគាត់ចូលលក់ដូរដែរ ដោយមិនទុកពួកគាត់នៅលក់តាមមាត់ទឹកទៀតឡើយ៕ ដោយ ៖ ពៅ សុខហ៊ាន
ចែករំលែកព័តមាននេះ