រាជធានីភ្នំពេញ ៖ណូម័រ មិនទាន់ដាក់អារម្មណ៍គិតទៅលើបុរសណាជាថ្មីទៀតទេតាំងពីចែកផ្លូវគូអាពាហ៍ពិពាហ៍រួចមក ។ ពេលនេះនាងមានកម្លាំងចិត្តពីម្តាយ ធ្វើឲ្យនាងមានជំហរយកចិត្តទុកដាក់បំពេញការងារកាន់តែខ្លាំង ។
ណូម័រ ថា នឹកឃើញម្តាយពេលណា នាងខំបំពេញការងារលើសដើម ដោយសារតែចង់ស្តែងឲ្យឃើញថា ធ្វើអ្វីៗគ្រប់យ៉ាងដើម្បីតបស្នងដល់ម្តាយជាធំ ។ នេះជាទឹកចិត្តមួយក្នុងនាមនាងជាកូនស្រី ។
តារាសម្តែង និងជាពិធីការិនីណូម័រ បានព្យាយាមពង្រឹងការងារផ្នែកពិធីការិនីខ្លាំងជាងមុន ដោយសារតែពេលនេះនាងបានបង្ហាញការងារស្ទើរតែគ្រប់ខេត្តក្រុង ។ ទទួលបានការងារច្រើន ព្រោះនាងមានទេពកោសល្យ ដូច្នេះហើយម្ចាស់ក្រុមហ៊ុនផ្តល់តម្លៃការងារឲ្យនាងរហូត ។
ថ្មីៗនេះណូម័រ និយាយថា «មួយរយៈនេះហាក់ប្លែកចិត្ត នៅពេលដែលតួនាទីពិធីការិនីរបស់ខ្ញុំស្រាប់តែទទួលបានការអញ្ជើញគ្រប់ការច្រៀងលើវេទិកានានានៅតាមខេត្ត ។ ទទួលបានការងារច្រើនរហូតដល់ថ្នាក់ខកខានចូលរួមកម្មវិធីនានារបស់មិត្តភក្តិ ដូចជាខួបកំណើតឡើងផ្ទះជាដើម ។ យ៉ាងណាខ្ញុំមានតែព្យាយាមបំពេញតួនាទីនេះឲ្យបានល្អ ព្រោះខ្ញុំពេញចិត្តខាងជំនាញពិធីករនេះណាស់ បើទោះជាអាចសម្តែងបានបែបណាក្ដី»។
គួរបញ្ជាក់ថា ណូម័រ បានលែងលះស្វាមី ក្រោយពេលរៀបការមួយរយៈពេលខ្លីប៉ុណ្ណោះធ្វើឲ្យគេឯងភ្ញាក់ផ្អើល ជាពិសេសអ្នកក្នុងពិភពសិល្បៈ ។ ពេលនេះនាងមិនទាន់បើកបេះដូងទទួលយកបុរសណាទៀតទេ ។ អ្វីដែលសំខាន់ចង់ចំណាយពេលសន្សំលុយទុកចាត់ចែងជីវភាពរាល់ថ្ងៃ និងមុខរបរថ្មីៗតាមផែនការ ជាជាងយកចិត្តលើបុរសណានាំខាតពេលវេលា ។ ក្រៅនេះនាងឆ្លៀតពេលបង្កើនសមត្ថភាពច្រៀងឲ្យបានប្រសើរដើម្បីឲ្យមូលទីផ្សារសិល្បៈតែម្តង ។
ណូម័រនិយាយថា «ពេលនេះមានតែពាក្យការងារ ហើយកិច្ចការដែលនាងខ្ញុំធ្វើឡើងនេះ គឺដើម្បីម្តាយ ។ នាងខ្ញុំមិនបានយកមុខមាត់ដាក់អ្នកណាទេ គ្រាន់តែបញ្ជាក់ថា ការបង្ហាញនេះចង់ឲ្យម្តាយមានសេចក្តីសុខ និងមើលឃើញថា កូនស្រីគាត់ពិតជាធ្វើអ្វីៗដើម្បីគាត់ ។ មិនថា លំបាកបែបណានោះទេ នាងខ្ញុំស៊ូបានទាំងអស់ ។ ម្ល៉ោះហើយរឹតតែមិនអាចនិយាយរឿងស្នេហ៍បានទេពេលនេះ ។ ទុកឲ្យវាសនាជាអ្នកកំណត់ ព្រោះជីវិតស្នេហានាងខ្ញុំដើរខុសម្តង ។ មូលហេតុបែបនេះទើបមិនចង់និយាយរឿងផ្លូវចិត្តច្រើនក្រៅពីការងារ»៕
ចែករំលែកព័តមាននេះ