ខេត្តកំពង់ឆ្នាំង ៖ ក្នុងឱកាសអញ្ជើញជាអធិបតីភាពក្នុងវគ្គបណ្តុះបណ្តាល និងវេទិការសាធារណៈស្តីពីសកម្មភាព យេនឌ័រ ដែលរៀបចំឡើងដោយអង្គការសាអូរី នៅសួនកុមារមុខសាលាខេត្តកំពង់ឆ្នាំង នាព្រឹកថ្ងៃទី១៦ ខែវិច្ឆិកា ឆ្នាំ២០២០…
ខេត្តកំពង់ឆ្នាំង ៖ ក្នុងឱកាសអញ្ជើញជាអធិបតីភាពក្នុងវគ្គបណ្តុះបណ្តាល និងវេទិការសាធារណៈស្តីពីសកម្មភាព យេនឌ័រ ដែលរៀបចំឡើងដោយអង្គការសាអូរី នៅសួនកុមារមុខសាលាខេត្តកំពង់ឆ្នាំង នាព្រឹកថ្ងៃទី១៦ ខែវិច្ឆិកា ឆ្នាំ២០២០ លោកជំទាវ ប៊ន សុភី អភិបាលរងខេត្តកំពង់ឆ្នាំងបានជំរុញដល់បណ្តាគ្រប់ស្ថាប័ន និងអង្គការជាដៃគូនានា ត្រូវរួមគ្នាបញ្ឈប់អំពើរហិង្សាលើកុមារ និងជនមានពិការភាព។
លោកជំទាវអភិបាលរងខេត្តបានបន្តថា៖ យើងក៏ត្រូវរួមគ្នាយកចិត្តទុកដាក់លើស្ត្រី និងកុមារ ជនមានពិការភាព និងត្រូវបញ្ជ្រាបសមភាពយេនឌ័រឲ្យបានខ្លាំងក្លា។ ដូចដែលយើងទាំងអស់គ្នាដឹងហើយថាកាលពីជំនាន់ដើមបុព្វបុរសរបស់យើងក៏មានស្ត្រីជាអ្នកដឹកនាំដ៏ខ្លាំងកា្លណាស់ដែររហូតដល់ធ្វើស្ដេចដឹកនាំប្រទេសជាតិ ឱ្យការរីកចម្រើន និងល្បីល្បាញដល់សព្វថ្ងៃនេះ។ ដោយសារតែយើងរួមគ្នាធ្វើឱ្យប្រសើរឡើង នូវសិទ្ធិស្ត្រី និងការបញ្ជ្របសកម្មភាពយេនឌ័រ បែបនេះហើយ ទើបនៅគ្រប់បណ្តាស្ថាប័ន មានសភាព្រឹទ្ធសភា ក្រសួង និងថ្នាក់ខេត្តក៏មានស្ត្រីជាអ្នកដឹកនាំដែរ។
ថ្ងៃនេះផងដែរសូមរំឮកដល់បងប្អូនជាជនមានពិការភាពត្រូវមានស្មារតីរឹងមាំ តស៊ូក្នុងជីវិត កុំអស់សង្ឃឹម ព្រោះថាបច្ចុប្បន្នរាជរដ្ឋាភិបាលបានយកចិត្តទុកដាក់លើជនពិការ ដោយបានរៀបចំឲ្យមន្ទីរជំនាញ នៅតាមបណ្តាខេត្ត គិតគូរសុខទុក្ខដល់ជនពិការ។ ក្នុងឱកាសនោះដែរលោកជំទាវ តុង ណារី សមាជិកក្រុមប្រឹក្សាខេត្តកំពង់ឆ្នាំង ក៏បានមានប្រសាសន៍លើកឡើងដែរថា៖ ជាការពិតណាស់ អង្គការសាអូរី គឺជាអង្គការមួយ ដែលបានយកចិត្តទុកដាក់លើជនមានពិការភាព ទាំងមនុស្សចាស់ និងកុមារ ដែលការងារនេះពិតជាពិបាកខ្លាំងណាស់ព្រោះកុមារខ្លះពិការជើងពិការដៃ និងពិការសតិបញ្ញាដែលពិបាកនិយាយស្តាប់គ្នាបាន ប៉ុន្តែអង្គការសាអូរី នៅតែអាចធ្វើបាន។
សូមអរគុណ នាយិកាអង្គការ សាអូរី ដែលបានប្រឹងប្រែង ក្នុងបង្ហាត់បង្រៀន ដល់ជនពិការឱ្យចេះត្បាញក្រមា ដែលការងារនេះពិតជាលំបាកខ្លាំងណាស់។ ចុងក្រោយលោកជំទាវក៏បានផ្ដាំផ្ញើដល់អង្គការសាអូរីសូមផ្ដល់ដំណឹងមកលោកជំទាវនៅការលំបាក និងសេចក្តីត្រូវការនានាដែលអង្គការត្រូវការ ដើម្បីជួយឱ្យអង្គការមួយនេះ មានដំណើរការកាន់តែល្អប្រសើរបន្ថែមទៀត។ នាយិកាអង្គការ សាអូរី លោកស្រី អ៊ុំ អមរារ័ត្ន បានបញ្ជាក់ពីសកម្មភាព និងគោលបំណងពីអង្គការរបស់ខ្លួនថា៖ អង្គការសាអូរី បានបង្កើតឡើង នៅឆ្នាំ២០០៨។
អង្គការសារអូរី បានប្រសូត្រចេញជារូបរាងដោយសារមានការគាំទ្រពីបណ្តាមិត្តជប៉ុន ថៃ និងសហគមន៍អឺរ៉ុប និងបណ្តាអង្គការជាមិត្តមួយចំនួនទៀតនៅកម្ពុជា។ បច្ចុប្បន្នអង្គការ សាអូរី ក៏កំពុងទទួលបានមូលនិធិខ្នាតតូចពីអង្គការជំនួយនៃព្រះវិហាដាណឺម៉ាកផងដែរ។ ចំពោះគោលបំណងរបស់អង្គការ គឺជួយដល់ជនមានពិការភាពឱ្យមានលំនឹងមានក្តីសង្ឃឹម ដោយឱ្យជនពិការមានជំនាញវិជ្ជាជីវៈតាមរយៈការត្បាញ ដើម្បីបង្កើតប្រាក់ចំណួល៕ ដោយ ៖ ពៅ សុខហ៊ាន
ចែករំលែកព័តមាននេះ