សហរដ្ឋអាមេរិក ៖ ពិតជារឿងដែលនឹកស្មានមិនដល់ និងចៃដន្យបំផុត ដែលមានឧប្បត្តិហេតុដល់ទៅ២ផ្ទួនៗគ្នា ពេលនាំយកបេះដូងមួយ ទៅវះកាត់បន្ទាន់ប្ដូរឲ្យអ្នកជំងឺម្នាក់។
កាលពីថ្ងៃទី៦ ខែវិច្ឆិកា ឆ្នាំ២០២០ កន្លងមកនេះ បេះដូងមួយ ដែលទទួលបានជាអំណោយសរីរាង្គ ហើយត្រូវនាំមកជាបន្ទាន់តាមឧទ្ធម្ភាគចក្រ១គ្រឿង ទៅកាន់មន្ទីរពេទ្យ KECK HOSPITAL OF USC ដែលជាមន្ទីរពេទ្យសាកលវិទ្យាល័យមួយ ស្ថិតនៅទីក្រុងឡូសអេនចឺឡេស ប៉ុន្តែខណៈពេលហោះទៅដល់មន្ទីរទៅហើយ លុះពេលចុះនោះ បែរជាធ្លាក់លើដំបូលមន្ទីរពេទ្យនោះ។ ពេលចុះឧទ្ធម្ភាគចក្រនេះក៏មានបញ្ហាមួយមិនអាចពន្យល់បាន ហើយក៏ធ្លាក់លើដំបូលមន្ទីរពេទ្យតែម្តង ។
លុះមួយរយៈក្រោយមក បណ្ដាអ្នកសង្គ្រោះអាចយកបានបេះដូងនោះពីរបំណែក ហើយប្រគល់ឲ្យដល់គិលានុប្បដ្ឋាកម្នាក់ ដែលយកវាដាក់លើថាសដែកមួយ តែចៃដន្យអីបេះដូងនោះត្រូវគេធ្វើឲ្យជ្រុះធ្លាក់ទៀត។ តែសំណាងល្អ បេះដូងនោះក៏នៅតែអាចយកទៅប្ដូរឲ្យអ្នកជំងឺបាន។
ដូចការបញ្ជាក់របស់ទូរទស្សន៍ FOX 5 ក្រុងសាន់ឌីយេហ្គោ អ្នកបើកឧទ្ធម្ភាគចក្រនោះរងរបួសស្រាល ចំណែកអ្នកដំណើរ២នាក់ក៏នៅរស់រានមានជីវិត ដោយពុំកើតអីធ្ងន់ធ្ងរ។ មូលហេតុនៃការធ្លាក់ឧទ្ធម្ភាគចក្រនោះ ដែលថតបានដោយសាក្សីម្នាក់ពីផ្លូវជិតខាង នៅតែមិនទាន់ដឹងនៅឡើយ។
ជារឿងគួរឲ្យរីករាយ ទោះបីមានឧប្បត្តិហេតុ២ផ្ទួនៗគ្នា បេះដូងនោះនៅតែអាចយកទៅប្ដូរឲ្យអ្នកជំងឺដែលកំពុងតែរង់ចាំការវះកាត់ដូរឲ្យគេ ប្រកបដោយជោគជ័យ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ