រាជធានីភ្នំពេញ ៖ បុរីប៉េងហូតដែលជាក្រុមហ៊ុនផ្គត់ផ្គង់លំនៅឋានល្បីឈ្មោះមួយនៅកម្ពុជា បានចុះហត្ថលេខាយោគយល់ក្នុងការសាងសង់សាលារៀនក្នុងទីតាំងបុរីផ្ទាល់តែម្ដង ដែលជំហ៊ានដំបូង
រាជធានីភ្នំពេញ ៖ បុរីប៉េងហូតដែលជាក្រុមហ៊ុនផ្គត់ផ្គង់លំនៅឋានល្បីឈ្មោះមួយនៅកម្ពុជា បានចុះហត្ថលេខាយោគយល់ក្នុងការសាងសង់សាលារៀនក្នុងទីតាំងបុរីផ្ទាល់តែម្ដង ដែលជំហ៊ានដំបូងសាលារៀននេះ សាងសង់នៅបុរីប៉េងហួតដែលមានទីតាំងនៅផ្លូវជាតិលេខ១ ភូមិបឹងឈូក សង្កាត់និរោធន៍ ខណ្ឌច្បារអំពៅ ។ ការសាងសង់សាលារៀននេះគឺបានផ្ដល់ភាពងាយស្រួលមួយដល់អតិថិជនដែលរស់នៅក្នុងបុរីដោយមិនចាំបាច់បញ្ជូនកូនចៅទៅរៀននៅសាលាឆ្ងាយៗ ។ ពិធីចុះហត្ថលេខានេះបានធ្វើឡើងនៅ ការិយាល័យកណ្ដាលរបស់បុរីប៉េងហួត ក្នុងសង្កាត់ភ្នំពេញថ្មី ខណ្ឌសែនសុខ កាលពីព្រឹកថ្ងៃទី២២ ឧសភា ២០១៥ ដោយមានលោកឧកញ៉ាថៃ ជាហួត តំណាងក្រុមហ៊ុនបុរីប៉េងហួត និងអ្នកឧកញ៉ា គិត ម៉េង តំណាងក្រុមហ៊ុនសាលាអន្តរជាតិ South Bridge ។
លោក Simon Lu ទីប្រឹក្សាអគ្គនាយកក្រុមហ៊ុនបុរីប៉េងហួត និងតំណាងអោយលោកឧកញ៉ា ថៃ ជាហួត បានមានប្រសាសន៍ថាអ្វីដែលជំរុញអោយយើងជ្រើសរើសយកដៃគូ សាលាអន្តរជាតិ South Bridge នេះដោយសារតែសាលានេះមានបទពិសោធន៍យូរមកហើយក្នុងការអប់រំ ជាក់ស្ដែងអ្នកឧកញ៉ាគិត ម៉េង ដែលធ្លាប់មានជោគជ័យកន្លងមកដូចជាសាលាអន្តរជាតិ North Bridge ជាដើម ក៏ទទួលស្គាល់ជាសាលាអន្តរជាតិដែលល្បីឈ្មោះ និងអប់រំប្រកបដោយគុណភាពផងដែរ ។
លោកបន្តថា ការសាងសង់សាលានេះ ក៏ដើម្បីឆ្លើយតបទៅនឹងអ្នករស់នៅជុំវិញ បុរី និងក្នុងបុរី ក្នុងការបញ្ជូនកូនៗទៅរៀននៅសាលាដែលមានទីតាំងជិតផ្ទះ ។ ហើយនេះក៏ជាលើកទី១ ដែលបុរីប៉េងហួតបានសហការណ៍ជាមួយសាលាអន្តរជាតិក្នុងការសាងសង់សាលារៀនក្នុងបុរីផ្ទាល់តែម្ដង ។ យើងសង្ឃឹមដែរថាការសាងសង់សាលានេះនឹងទទួលបានជោគជ័យក្នុងអប់រំកូនចៅ របស់អតិថិជនយើងក៏ដូចជាអ្នករស់នៅជុំវិញបុរីប៉េង ហួត ព្រោះថាគ្រាន់តែសំណង់លំនៅឋានបុរីប៉េងហួតទីតាំងនោះមួយ មានប្រជាពលរដ្ឋរស់នៅជាង៦ពាន់គ្រួសារទៅហើយ ។
លោក Ray Mondyager អគ្គនាយកក្រុមហ៊ុន South Bridge International School limited បានអោយដឹងថា សាលារបស់យើងមានបទពិសោធន៍ អប់រំនិងមានសាខានៅប្រទេសជាច្រើន ហើយយើងក៏រីករាយក្នុងការមកវិនិយោគវិស័យអប់រំនៅកម្ពុជា ។ សាលារបស់យើងនៅពេលចាប់ផ្ដើមដំណើរការយើងនឹងមានគ្រូជនជាតិខ្មែរ និងគ្រូជនជាតិបរទេសដើម្បីបណ្ដុះបណ្ដាល និងបង្រៀនសិស្សប្រកបគុណភាពខ្ពស់ ។
គួរបញ្ជាក់ថា ការសាងសង់សាលារៀននេះនឹងត្រូវប្រើដើមទុនប្រមាណ១២លានដុល្លារអាមេរិក លើផ្ទៃដីទំហំជាង ៤ហិកតា ហើយនឹងត្រូវបញ្ចប់ការសាងសង់ និងដំណើរការបង្រៀនតែម្ដងនៅ ចុងឆ្នាំ២០១៦ខាងមុខនេះ ៕
ចែករំលែកព័តមាននេះ