សហរដ្ឋអាមេរិក-តៃវ៉ាន់ ៖ សហរដ្ឋអាមេរិកប្រកាសកាលពីថ្ងៃទី៣ វិច្ឆិកាថា បានយល់ព្រមលក់ឲ្យតៃវ៉ាន់ នូវដ្រូនវាយប្រហារហៅដ្រូនពិឃាតធុន MQ-9 REAPER ចំនួន៤គ្រឿងមានទឹកប្រាក់៦០០លានដុល្លារ ដើម្បីការពារដែនកោះនោះដែលកំពុងមានភាពតានតឹងខ្លាំងជាមួយចិនដីគោក ។
ការលក់នោះនឹងអាចឲ្យតៃវ៉ាន់ធ្វើឲ្យទំនើបដល់កងទ័ពរបស់ខ្លួននិងរក្សាសមត្ថភាពការពារគូរឲ្យជឿទុកចិត្ត ។ នេះជាការអះអាងរបស់ក្រសួងការបរទេសអាមេរិកក្នុងសេចក្ដីប្រកាសមួយ ។
សេចក្ដីប្រកាសនោះគូសបញ្ជាក់ថា ការលក់នេះនឹងអាចកែលម្អសមត្ថភាពរបស់តៃវ៉ាន់ក្នុងការឆ្លើយតបចំពោះការគំរាមកំហែងបច្ចុប្បន្ន និងនាពេលអនាគតដោយផ្ដល់ដល់ដែនកោះនោះ នូវសមត្ថភាពស៊ើបការណ៍ ត្រួតពិនិត្យ និងវាយប្រហារនៅលើដីលើផ្ទៃសមុទ្រនិងក្នុងទឹក ។
នេះជាការលក់អាវុធដុំកំភួនលើកទី៣របស់រដ្ឋការលោកដូណាល់ ត្រាំ ឲ្យកោះតៃវ៉ាន់ដែលអនុម័តក្នុងអំឡុងពេលមិនដល់៣សប្ដាហ៍ផងនាំឲ្យទឹកប្រាក់សរុបនៃការលក់អាវុធទាំងនោះឲ្យតៃវ៉ាន់មានដល់៤,៨ពាន់លានដុល្លារ ។ ការលក់អាវុធលើកចុងក្រោយនេះផ្ដោតលើយន្តហោះគ្មានមនុស្សបើកធុន MQ-9 REAPER ៤គ្រឿង ស្ថានីយត្រួតពិនិត្យតាំងនៅលើដី២ និងស្ថានីយត្រួតពិនិត្យចល័ត២ ប្រព័ន្ធតម្រង់គោលដៅ បណ្ដារ៉ាដានិងប្រព័ន្ធចាប់រូបភាពសម្រាប់បណ្ដាបេសកកម្មស៊ើបការណ៍ ។
ក្រសូងការបរទេសតៃវ៉ាន់គូសបញ្ជាក់ក្នុងសេចក្ដីប្រកាសមួយពីសារសំខាន់នៃការលក់អាវុធទាំងនេះរបស់អាមេរិកឲ្យតៃវ៉ាន់ក្នុងអាណត្តិរបស់លោកដូណាល់ ត្រាំ ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ