រាជធានីភ្នំពេញ ៖ ខ្សែភាពយន្តរឿង «បងទុំ អូនទាវ ២០១៥» ដែលជាស្នាដៃផលិតរបស់ផលិតកម្មរ៉ក់ បានប្រកាសសម្ពោធដាក់បញ្ចាំងនៅតាមរោងភាពយន្តនានា ចាប់ពីថ្ងៃទី២១ ឧសភា ២០១៥តទៅ ព្រមទាំងបានបកស្រាយពីមតិរិះគន់មួយចំនួនរបស់ទស្ស
រាជធានីភ្នំពេញ ៖ ខ្សែភាពយន្តរឿង «បងទុំ អូនទាវ ២០១៥» ដែលជាស្នាដៃផលិតរបស់ផលិតកម្មរ៉ក់ បានប្រកាសសម្ពោធដាក់បញ្ចាំងនៅតាមរោងភាពយន្តនានា ចាប់ពីថ្ងៃទី២១ ឧសភា ២០១៥តទៅ ព្រមទាំងបានបកស្រាយពីមតិរិះគន់មួយចំនួនរបស់ទស្សនិកជន ។
នៅព្រឹកថ្ងៃទី ១៨ ឧសភា ២០១៥ ផលិតកម្មរ៉ក់បានរៀបចំធ្វើសន្និសីទសារព័ត៌មានមួយនៅរោងភាពយន្ត Major Cineplex ដោយមានការចូលរួមពីលោកស៊ិន ច័ន្ទសាយ៉ា ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌នៃក្រសួងវប្បធម៌និងវិចិត្រសិល្បៈ លោកយឹម សុសត្យា ជំនួយការអគ្គនាយក និងជាប្រធានគ្រប់គ្រងផលិតកម្មរ៉ក់ និងលោកសៅ សុខនី តំណាងរោងភាពយន្ត Major Cineplex ។
លោកយឹម សុសត្យា មានប្រសាសន៍ថា រឿង«បងទុំ អូនទាវ ២០១៥»មិនមែនយកតាមលំនាំដើមមកសម្ដែងនោះទេ គឺយកគោលគំនិតមួយ គឺភាពស្មោះស្ម័គ្រ ព្រោះតួអង្គទាំងពីរ បងទុំ អូនទាវ បានស្រឡាញ់គ្នា រហូតដល់តួស្រីស្លាប់ហើយ ក៏នៅតែស្រឡាញ់គ្នាទាំងម្នាក់ជាខ្មោច និងម្នាក់ទៀតជាមនុស្ស ។ ចំពោះសាច់រឿងផ្សេងទៀត លោកសត្យាថាសម្លឹងមើលទីផ្សារសព្វថ្ងៃដោយបានបញ្ចូលឈុតឆាកកំប្លែង និងមានខ្មោចជាដើម ដោយមិនមានចេតនានិពន្ធរឿងនេះបំផ្លាញរឿង«ទុំទាវ» ចាស់ទេ ។
លោកយឹម សុសត្យា ឱ្យដឹងថា មានឈុតឆាកមួយទៀតមានការរិះគន់ នោះគឺឈុតឆាកលោកសង្ឃជាប់លើចុងឫស្សី ។ តាមរយៈឈុតឆាកនេះ លោកបានទៅជួបសម្ភាសន៍ជាមួយសម្ដេចព្រះសង្ឃរាជ និងចៅអធិការជាច្រើនវត្ត ព្រមទាំងគ្រូសូត្រឆ្វេង-ស្ដាំផងដែរ ថាតើវាប៉ះពាល់ដល់ព្រះពុទ្ធសាសនាដែរទេ ។ ចំពោះសម្ដេចព្រះសង្ឃរាជ ប៊ួរ គ្រី មានព្រះរាជបន្ទូលថា ឈុតឆាកនេះ មិនមានអ្វីប៉ះពាល់ដល់ព្រះពុទ្ធសាសនាទេ ។ ចំពោះសម្តេចព្រះមហាសុមេធាធិបតីនន្ទ ង៉ែត ក៏មានសង្ឃដីកាដែរថាឈុតនេះមិនប៉ះពាល់សាសនាព្រះពុទ្ធទេ ។
លោកស៊ិន ច័ន្ទសាយ៉ា មានប្រសាសន៍ថា រឿង«បងទុំ អូនទាវ២០១៥»ក្រសួងវប្បធម៌និងវិចិត្រសិល្បៈបានទទួល និងបានព្យួរទុកមួយរយៈរង់ចាំមើលមតិរិះគន់ តែដូចលោកសត្យាលើកឡើងហើយថា រឿងនេះមិនមែនយកតាមរឿងដើមទេ វាគ្រាន់តែយកគោលគំនិតភាពស្មោះស្ម័គ្រប៉ុណ្ណោះ ។ ដោយឡែកចំពោះបញ្ហាប៉ះពាល់ដល់ព្រះពុទ្ធសាសនា ឬមិនប៉ះពាល់ត្រង់ចំណុចព្រះសង្ឃជាប់លើចុងឫស្សី ដោយសារមហិទ្ធិឫទ្ធិខ្មោចនោះ ព្រះសង្ឃដែលមានឋានៈ ខ្ពស់ៗ បានបញ្ជាក់ហើយថាវាមិនប៉ះពាល់ទេ ព្រោះរឿងខ្មោចមានមែន ឬមិនមែននោះ សូម្បីអ្នកប្រាជ្ញពិភពលោកមួយចំនួនក៏មិនទាន់សន្និដ្ឋានច្បាស់លាស់នៅឡើយ ។ អ្នកខ្លះថាមានខ្មោចមែន និងអ្នកខ្លះទៀតថាមិនមាននោះទេ ។
ខ្សែភាពយន្តរឿង «បងទុំ អូនទាវ ២០១៥» ចំណាយសរុបអស់ជាង៤ម៉ឺនដុល្លារទាំងបច្ចេកទេស និងតម្លៃខ្លួនតួសម្ដែង និងត្រូវចំណាយពេលថតជិតកន្លះឆ្នាំ ៕
សុវណ្ណណែត
RA 201505019_029_27016
Savanneth 201505018(4-7)
កែ ១
កែ
ឦ ព៌៌ា
ចែករំលែកព័តមាននេះ