រាជធានីភ្នំពេញ ៖ កញ្ញាថន ស្រីណៃ ដែលទើបតែហក់ឡើងក្នុងតួនាទីជាតារាសម្តែងក្រោយប្រឡងជាប់ចំណាត់ថ្នាក់លេខ១ កញ្ញាឯកទេសចរណ៍មក ពេលនេះមិននៅទំនេរសម្រាប់ឱ្យបុរសណាលែបខាយឡើយ ។ តារាស្រស់ស្រអែមរូបនេះបានភ្ជាប់ចំណងស្នេហ៍ជាមួយបុរសនៅអាមេរិក ។
កញ្ញាថន ស្រីណៃ សារភាពថា នាងមានគូស្នេហ៍វ័យជាង៣០ឆ្នាំ រស់នៅអាមេរិកប្រកបមុខជំនួញយូរមកហើយ ។ រវាងស្រណៃ និងបុរសរស់នៅលើទឹកដីមហាអំណាចនោះ កំពុងមើលចិត្តគ្នាដោយមិនទាន់ឈានដល់អាពាហ៍ពិពាហ៍នៅឡើយទេ ដោយសារតែ ម្នាក់ៗចង់នៅប្រកបការងារ រៀងៗខ្លួនរកប្រាក់ឱ្យបានច្រើនសិន ។
ស្រីណៃ និយាយថា «គូស្នេហ៍ខ្ញុំជាអ្នកប្រកបមុខជំនួញនៅអាមេរិកនោះ បើនិយាយពីរឿងប្រចណ្ឌអ្នកណាក៏ចេះប្រចណ្ឌដែរ ប៉ុន្តែគាត់ក៏គិតពិចារណាដែរ ។ ជាធម្មតាគាត់យល់ ស្រឡាញ់នារីជាអ្នកសិល្បៈគឺពិតជាត្រូវចិត្តធ្ងន់បន្តិច បើឆេវឆាវមិនបានឡើយ ព្រោះអ្នកសិល្បៈត្រូវតែសម្តែងឈុត ផ្សេងៗដែលចៀសមិនផុតពីការប៉ះដៃជើង ។ យា៉ងណាក៏ដោយ ក៏នាងខ្ញុំមិនទាន់ពិចារណាពេលចូលរោងការទេ ទុកឱ្យបានយូរជាងនេះសម្រាប់មើលចិត្តគ្នាមិនរហន់ពេកឡើយ ។ស្នេហាស្មោះត្រង់មិនបែកគ្នាទេ គូព្រេងមិនព្រាត់ឡើយ សំខាន់ការរក្សាចិត្តស្មោះទុកជូនគ្នាជារឿងសំខាន់ ។ ម្យា៉ងទៀតរវាងនាងខ្ញុំ និងគាត់តែងតែជួបសំណេះសំណាលគ្នាតាមប្រព័ន្ធអេឡិចត្រូនិកដើម្បីបំបាត់ការនឹកគ្នាជាបន្តបន្ទាប់ អាចរក្សាគោលជំហរបានបន្តទៀត ព្រោះអ្វីក៏ដោយពួកយើងតែងតែប្រាប់គ្នាទៅវិញទៅមកដើម្បីបានគិត និងពិចារណារាល់ការងារ នីមួយៗ» ។
ចំពោះអាជីពសិល្បៈថន ស្រីណៃ ទើបតែបញ្ចប់ថតភាពយន្ត២រឿងព្រមគ្នាកាលពីពេល ថ្មីៗនេះ ។ ក្នុងខ្សែរឿងមួយស្រីណៃបានសម្តែងជាមួយតារាហ្វ៊ីលីពីន ។ ខ្សែរឿងដែលស្រណៃថតចំនួន២រឿងនោះជារបស់ផលិតកម្មភូមិពេជ្ររឿង «ខ្មោចទឹកកក» និងរឿងភាគចាក់នៅទូរទស្សន៍មា៉យធីវីរឿង «សង្គ្រាមបងប្អូន» សម្តែងជាមួយតារាហ្វ៊ីលីពីន និងមានលោកទេព រិនដារ៉ូ ចូលរួមដែរ ។
ស្រីណៃ ត្រៀមខ្លួនចូលរួមសម្តែងភាពយន្តជូនផលិតកម្ម ផ្សេងៗទាំងអស់ ព្រមទាំងការថតចម្រៀងខារា៉អូខេផងដែរ ។ ពេលនេះសម្រាប់អាជីពសិល្បៈស្រីណៃ ប្រឹងប្រែងជាងមុន ។ ស្រណៃចាប់យកការងារទាំងអស់មិនថាការសម្តែង ដើរម៉ូដ ឬច្រៀងតាមទូរទស្សន៍ទេ ។
កញ្ញាថន ស្រីណៃ និយាយថា សម្តែងភាពយន្តមានការលំបាកណាស់ ហើយបើថ្ងៃណាអារម្មណ៍មិនល្អរឹតតែពិបាកសម្តែង ។ ឈុតឆាកខ្លះអត់ដែលបានជួបប្រទះទេ តែត្រូវសម្តែងឱ្យបានសមតាមអ្នកដឹកនាំរឿងចង់បាន ។ អីុចឹងហើយទើបស្រីណៃតែងតែគិតដល់រៀមច្បងមានបទពិសោធន៍ពួកគាត់ពិតជាមានទេព្យកោសល្យ និងការខិតខំខ្លាំងណាស់ បូកទាំងការអំណត់ត្រូវខ្យល់ត្រូវភ្លៀង ទម្រាំសម្រេចបានផ្លែផ្កាក្នុងរឿងនីមួយៗ ។ ជីវិតអ្នកសម្តែងភាពយន្តពិតជាតស៊ូសម្បើមណាស់ទម្រាំតែល្បីឈ្មោះ ។
ថន ស្រីណៃ ជាអ្នកខេត្តកណ្តាល នៅតំបន់អ្នកលឿង និងជាកូនអាជីវករ ។ បងប្អូនរបស់ស្រីណៃសុទ្ធតែជាអ្នកស្រឡាញ់សិល្បៈ និងគាំទ្រភាពយន្តខ្មែរ ។ ម្ល៉ោះហើយនៅពេលឃើញស្រីណៃទទួលបានផលល្អក្នុងអាជីពសិល្បៈ ឪពុកម្តាយ និងបងប្អូននាងជួយជំរុញ និងលើកទឹកចិត្តនាងឱ្យខិតខំថែមទៀត ៕
ចែករំលែកព័តមាននេះ