រាជធានីភ្នំពេញ ៖ ស្ត្រីមួយរូបបានចេញមកប្រកាសអះអាងជាសាធារណៈ ដោយបានចោទប្រកាន់តារាសម្តែងនាង ឈិន សុធារី ថា បានដណ្តើមស្វាមីរបស់ខ្លួនដែលបានរៀបការអស់រយៈពេលប្រមាណ១០ឆ្នាំមកហើយ ខណៈពេលទំនាក់ទងស្វាមីរបស់ខ្លួនបានចាប់ផ្តើមជាមួយតារារូបនេះទាំងមិនទាន់លែងលះដាច់ស្រេច។
ស្ត្រីដែលមានគណនេយ្យហ្វេសប៊ុកថា Somrith Ya Nuth បានបង្ហោះសារកាលពីថ្ងៃទី២៤ ខែតុលា ឆ្នាំ២០២០ នេះថា ក្នុងនាមខ្ញុំជាម្តាយ ជាប្រពន្ធស្របច្បាប់ក្រាបក្បាលដល់កន្ទេលជាមួយលោករយៈពេលដប់ឆ្នាំ លំបាកវេទនាតាំងពីបាតដៃទទេរ មកដល់លូវលោកតបស្នងនៅការឈឺចាប់ឱ្យខ្ញុំនិងកូន ដែលចុះចេញពីផ្ទះរយៈពេលជិតមួយឆ្នាំទៅរស់នៅដើរបណ្តើរគ្នាចេញមុខ ដោយមិនខ្លាចញញើតខ្ញុំជាប្រពន្ធដើម ទាំងមិនទាន់លែងលះគ្នាចប់សព្វគ្រប់នេះ ហើយក៏ចង់សួរថា លោក កែវ ពិសិដ្ឋ និងនាង ឈិន ចាន់សុធារី តារាសម្តែងស្រែកក្តែងៗគេយកប្តីនាងពីមុនដើរតួរកំសត់ នេះយល់អារម្មណ៍គេជាប្រពន្ធទេនាង។
ស្ត្រីខាងលើបង្ហោះសារបន្តថា ហើយខ្ញុំមិនបន្ទោសនាងទេ ប្រុសម្នាក់នេះខ្ញុំស្គាល់ចរិតច្បាស់ ហ៊ានអះអាងណាស់ តែបើនាងជាមនុស្សស្រីមានក្រមសីលធម៌ នាងក៏មិនត្រូវចូលមកពាក់ព័ន្ធក្នុងកំឡុងពេលនេះដែរ មានបញ្ហាមិនទាន់បានលែងលះ មិនទាន់ចេញសាលក្រមដែរនាង ហើយខ្ញុំក៏មិនដែលចង់បានមនុស្សម្នាក់នឹងមកវិញដែរ សំខាន់ដោះស្រាយបញ្ចប់ឱ្យខ្ញុំ ដែលបានសន្យា ហើយខ្ញុំទុកពេលឱ្យរយៈមួយឆ្នាំនេះហើយ នៅតែមិនទាន់បញ្ចប់ ដោយរកលះគ្រប់យ៉ាង ។
ស្ត្រីកូនពីរខាងលើនេះ បានបញ្ជាក់ថា មកដល់ចំណុចនេះ ខ្ញុំទ្រាំលែងបានហើយ ព្រោះខ្ញុំបានទ្រាំឱ្យអ្នកទាំងពីរយកគ្នាលើក្បាលខ្ញុំយូរមកហើយ លូវដល់ពេលហើយ បើខ្ញុំមិនបញ្ចេញ ខ្ញុំអាចនឹងដាច់ខ្យល់ ដូចជាអាត្មានិយមពេកហើយសំរាប់ខ្ញុំ របស់ទ្រព្យកូនខ្ញុំវារលាយបណ្តើរៗហើយ ហើយខ្ញុំអរគុណលោកឪពុកម្តាយក្មេកខ្ញុំ និងសាច់ថ្លៃទាំងអស់ដែលពួកគាត់មានក្រមសីលធម៌ដែរ តែងតែនៅក្បែរខ្ញុំ និងកូនៗលើកទឹកចិត្តខ្ញុំ។
ស្ត្រីកូនពីរខាងលើបញ្ជាក់បន្តថា ជាចុងបញ្ចប់ដោះស្រាយតាមខ្ញុំស្នើរសុំឱ្យឆាប់ ហើយអញ្ជើញយកគ្នាចុះ ព្រោះខ្ញុំក្រណាស់ គ្មានលុយដូចស្រីលោកទេ យកចុះ ខ្ញុំតែប៉ុណ្ណឹងទុកសំរាប់កូនៗខ្ញុំ មិនមែនខ្ញុំមិនដឹងសិទ្ធិប្រពន្ធស្របច្បាប់ទេណាលោក ព្រោះទ្រព្យសម្បត្តិទាំងអស់សុទ្ធតែក្រោយការទាំងអស់។
ពាក់ព័ន្ធទៅនឹងការចោទប្រកាន់ពីស្ត្រីខាងលើនេះ តារាសម្តែងនាង ឈិន សុធារី បានអះអាងប្រាប់កោះសន្តិភាពតាមសារអេឡិចត្រូនិចកាលពីថ្ងៃទី២៦ ខែតុលា ឆ្នាំ២០២០នេះថា ការចោទប្រកាន់របស់ស្ត្រីខាងលើនេះ គឺមិនមែនជាការពិតឡើយ ហើយនាងក៏មិនចង់បកស្រាយអំពីរឿងនេះឲ្យវែងឆ្ងាយនោះដែរ។
នាងបញ្ជាក់ថា ខ្ញុំមិនខុសព្រោះរឿងគំនុំ លុយសោះ បែរជាមករឿងខ្ញុំ ខ្ញុំនឹងប្តឹងពីករណីបរិហារកេរ្តិ៍ ព្រោះបើរឿងវាមិនពិត។ យ៉ាងណា បើតាម ឈិន សុធារី បុរសដែលស្ត្រីខាងលើចោទប្រកាន់ដោយភ្ជាប់ទំនាក់ទំនងជាមួយនាងនោះ គឺជាមនុស្សដែលស្គាល់គ្នា និងជាមិត្ត ជាដៃគូររកស៊ីតែប៉ុណ្ណោះ មិនមានអ្វីលើសនឹងឡើយ។
ជាការកត់សម្គាល់ បន្ទាប់ពីទទួលបានសរសេរព្រមានប្តឹងពី ឈិន សុធារី នេះរួចមក ស្ត្រីខាងលើក៏បានបង្ហោះសារឆ្លើយតបវិញថា «ខ្ញុំភ័យណាស់នាងអើយខ្លាចចូលគុក ព្រោះគ្មានលុយតបទៅនាង គ្មានភស្តុតាងខ្ញុំស្វាគមន៍ណានាង ជនរងគ្រោះចឹងរាល់ថ្ងៃនឹងអត់បានទាក់ទងគ្នាមែនទេនាង ខ្ញុំគ្មានលុយសូម្បីតែប្តឹងនាង និងប្តីដែលជាសាហាយស្មន់គ្នា ព្រោះខ្ញុំក្រគ្មានខ្សែដូចនាង ភ័យណាស់»។
នាងបន្ថែមថា សូមជំរាបទៅនាង ឈិន ចាន់សុធារី ខ្ញុំមិនខ្លាចទទួលការពិតទេនាង ហើយចង់យ៉ាងមិចខ្ញុំស្វាគមន៍ណា អរគុណបញ្ហាគ្រប់យ៉ាងដែរ ចូលមកក្នុងជីវិតខ្ញុំ ហើយខ្ញុំជឿជាក់លើច្បាប់ និងអំពើល្អផលបុណ្យដែរបានសាង និងទាមទារកយុត្តិធម៌មកឱ្យខ្ញុំនឹងកូន ខ្ញុំស្វាមគមន៍ចំពោះសាហាយស្មន់ទាំងពីរ ។
ចំណែកបុរសដែលត្រូវបានចោទប្រកាន់ថាមានទំនាក់ទំនងជាមួយ ឈិន សុធារី ដែលមានឈ្មោះគណនេយ្យហ្វេសប៊ុកថា Keo Piseth ក៏បានបង្ហោះសារបកស្រាយពីបញ្ហាខាងលើនេះ ក្នុងនោះក្រៅពីការបកស្រាយពីការកាត់ផ្តាច់ចំណងជាប្តីប្រពន្ធជាស្ត្រីខាលើនេះ បុរសរូបនេះក៏បានបញ្ជាក់ថា ពីទំនាក់ទំនងរវាងលោក និង ឈិន សុធារី ផងដែរ។
លោកថា ម៉េចមកបរិហារកេរ្ត៍ខ្ញុំ និងអ្នកនាង សុធារីទៅវិញ? ការបញ្ចប់កិច្ចសន្យាមាត់ជាមួយគ្នារយៈពេលជិត៣ឆ្នាំហើយ ខ្ញុំទើបតែបានជួបអ្នកនាង សុធារី រយៈពេល១ឆ្នាំចុងក្រោយនេះទេ។ គាត់ជាអ្នករងគ្រោះមិនបានដឹងអ្វីទាល់តែសោះ មកចោទប្រកាន់គេឯង ហើយក៏បានជេរគេផុសបរិហាកេរ្ត៍គាត់មិនពិត។
លោកបន្តទៀតថា តាមពិតគាត់ គឺក៏ជាដៃគូររកស៊ីជាមួយខ្ញុំទេ បើនិយាយពីការរាប់អានវិញ គឺការពិតខ្ញុំព្រមទទួលស្គាល់ថា ហាក់បីដូចជាសិទ្ធិស្នាលមែន តែបើចំពោះថា រឿងស្នេហា គឺមើលគាត់ បើគាត់ល្អក៏គិតគូរថ្ងៃអនាគត បើមិនល្អក៏មិនយក ព្រោះដើម្បីកុំឲ្យខុសដូចអ្នកមុនទៀត។ ហើយអ្នកដែលមិនដឹងរឿង គឺឈប់តែស្ករទៅ ជាចុងក្រោយខ្ញុំបាទ សុំធ្វើការសុំទោសជាសាធារណៈទៅដល់អ្នកនាង សុធារី ដែលមិនធ្លាប់ពាក់ព័ន្ធរវាងខ្ញុំ និងអ្នកជាអតិតបន្តិចសោះ។
យ៉ាងណាក៏ដោយ បើទោះបីជាមានការចេញមុខបកស្រាយពីបុរសខាងលើនេះក៏ដោយ រហូតមកទល់ពេលនេះ ឈិន សុធារី នៅតែប្រកាន់ជំហរនៅក្នុងការប្តឹងស្ត្រីខាងលើនេះដដែល៕
ចែករំលែកព័តមាននេះ