រាជធានីភ្នំពេញ ៖ ប្រភពព័ត៌មានពីមេធាវីការពារក្តីឱ្យអ្នកស្រី តាំង គឹមឆេង ភរិយាសពលោកឧកញ៉ា អ៊ឹង ម៉េងជឺ ជនរងគ្រោះក្នុងអំពើឃាតក.ម្មយ៉ាងឃោរឃៅ បានប្រាប់ឱ្យដឹងថា កាលពីសប្តាហ៍មុននេះអ្នកស្រី តាំង គឹមឆេង
រាជធានីភ្នំពេញ ៖ ប្រភពព័ត៌មានពីមេធាវីការពារក្តីឱ្យអ្នកស្រី តាំង គឹមឆេង ភរិយាសពលោកឧកញ៉ា អ៊ឹង ម៉េងជឺ ជនរងគ្រោះក្នុងអំពើឃាតកម្មយ៉ាងឃោរឃៅ បានប្រាប់ឱ្យដឹងថា កាលពីសប្តាហ៍មុននេះអ្នកស្រី តាំង គឹមឆេង បានដាក់ពាក្យសុំចេញដីការក្សាការពារ ហាមឃាត់ទ្រព្យសម្បត្តិ និងផ្ទះសម្បែងជាកម្មសិទ្ធិស្របច្បាប់ទាំងប៉ុន្មានរបស់ឧកញ៉ា ថោង សារ៉ាត់ ដែលកំពុងជាប់ឃុំនៅពន្ធនាគារ ដើម្បីទុកទូទាត់សំណងរដ្ឋប្បវេណីលើជនរងគ្រោះ ទោះបីរឿងក្តីនេះរកស-ខ្មៅមិនទាន់ដល់ការប្រកាសសាលក្រមក៏ដោយ ។
ប្រភពព័ត៌មានបន្តថា បណ្តឹងរបស់ភាគីជនរងគ្រោះសុំចេញដីការក្សាការពារដាក់ចូលសាលាដំបូងរាជធានីភ្នំពេញ បានដល់ដៃលោកស្រី ពេជ្រ ម៉ារ៉ែន ចៅក្រមស៊ើបសួរហើយហើយទំនងមិនយូរទេ លោកស្រីចៅក្រមនឹងចេញដីការក្សាការពារនោះទៅឱ្យសមត្ថកិច្ចពាក់ព័ន្ធអនុវត្ត ។
សូមរំឭកថា លោកឧកញ៉ា អ៊ឹង ម៉េងជឺ ត្រូវបានឃាតករបាញ់ប្រហារយ៉ាងសាហាវព្រៃផ្សៃបំផុត បណ្តាលឱ្យស្លាប់ភ្លាមនៅកន្លែងលក់ផ្លែឈើ ក្បែរង្វង់មូលពហុកីឡដ្ឋានជាតិអូឡាំពិក ក្នុងសង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ កាលពីវេលាម៉ោងជាង៧យប់ថ្ងៃទី២២ វិច្ឆិកា ឆ្នាំ២០១៤ ។ សំណុំរឿងព្រហ្មទណ្ឌមួយនេះសម្រាប់អ្នកស្រី តាំង គឹមឆេង ជាភាគីជនរងគ្រោះក្រោយពីស្វាមីអ្នកស្រីបាត់បង់អាយុជីវិតទៅ បានប្តឹងរឿងរដ្ឋប្បវេណីទាមទារសំណងជំងឺចិត្តពីក្រុមឃាតករ ក្នុងនោះជនជាមេខ្លោង ទឹកប្រាក់ចំនួន៥០លានដុល្លារអាមេរិក ។ ឯជនដៃដល់ និងអ្នកសមគំនិតក្នុងម្នាក់១០លានដុល្លារអាមរិក ព្រមទាំងសំណូមពរឱ្យតុលាការចាត់ការលើឧក្រិដ្ឋជនតាមផ្លូវច្បាប់ ។
បន្ទាប់ពីដាក់ពាក្យបណ្តឹងរដ្ឋប្បវេណីនោះហើយ អ្នកស្រី តាំង គឹមឆេង រួមជាមួយមេធាវីការពារក្តី បានដាក់ពាក្យសុំចេញដីការក្សាការពារមួយថ្មីទៀត ដើម្បីហាមឃាត់ទ្រព្យសម្បត្តិឧកញ៉ា ថោង សារ៉ាត់ មិនឱ្យមានការលក់ដូរ ជួល បញ្ចាំ ឬផ្ទេរទៅអ្នកដទៃ ក្នុងគោលបំណងគេចវេះពីសំណងរដ្ឋប្បវេណីនេះ ។
ប្រភពព័ត៌មានដាច់ដោយឡែកមួយទៀតពីមេធាវីការពារក្តីឱ្យជនត្រូវចោទ ថោង ចំរើន និងប្រពន្ធឈ្មោះ កែវ សារី ដែលជាឪពុកម្តាយឧកញ៉ា ថោង សារ៉ាត់ បានបង្ហើបឱ្យដឹងដែរថា សាលាដំបូងរាជធានីភ្នំពេញ គ្រោងបើកសវនាការជំនុំជម្រះក្តីលើសំណុំរឿងកាន់កាប់ និងរក្សាទុកអាវុធដោយខុសច្បាប់ នៅថ្ងៃទី២០ ឧសភា ខាងមុខ ។ មេធាវីការពារក្តីឱ្យជនត្រូវចោទបន្តថា កូនក្តីរបស់លោក គឺលោក ថោង ចំរើន និងអ្នកស្រី កែវ សារី បានបដិសេធថា អាវុធប្រមាណជិត១០ដើមដែលមានការចោទប្រកាន់នោះជាកម្មសិទ្ធិស្របច្បាប់របស់កូន (ឧកញ៉ា ថោង សារ៉ាត់) ដែលគេជាមន្ត្រីជាន់ខ្ពស់នៃកងយោធពលខេមរភូមិន្ទ មានឋានន្តរស័ក្តិផ្កាយ២ (ឧត្តមសេនីយ៍ទោ) ។ ដូច្នេះរូបគាត់ ថោង ចំរើន និង កែវ សារី មិនជាប់ពាក់ព័ន្ធនឹងអាវុធនោះទេ ។
មេធាវីការពារក្តីឱ្យជនត្រូវចោទនៅតែមានជំនឿថា អង្គសវនាការដែលនឹងប្រព្រឹត្តទៅនៅថ្ងៃទី២០ឧសភា ខាងមុខ ប្រធានក្រុមប្រឹក្សាអង្គជំនុំជម្រះពិតជានឹងផ្តល់យុត្តិធម៌ដល់កូនក្តីរបស់លោក ហើយនឹងដោះលែងពួកគាត់ទាំង២នាក់ប្តីប្រពន្ធឱ្យមានសេរីភាពវិញ ។
សូមបញ្ជាក់ថា ជនត្រូវចោទឈ្មោះ ថោង ចំរើន និងអ្នកស្រី កែវ សារី ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនដាក់ពន្ធនាគារជាបណ្តោះអាសន្ន ៕
ចែករំលែកព័តមាននេះ