រាជធានីភ្នំពេញ៖ ជនសង្ស័យសកម្មម្នាក់ ត្រូវបានកម្លាំងសមត្ថកិច្ចជំនាញនៃអធិការដ្ឋាននបាលខណ្ឌច្បារអំពៅ ធ្វើការស្រាវជ្រាវឃាត់ខ្លួនបានយ៉ាងទាន់ពេលវេលា ក្រោយពីបានធ្វើសកម្មភាពលួចប្រើដែកព្យួរខោអាវឆ្កឹះគន្លឹះទ្វារបន្ទប់ ចូលលួចយកទ្រព្យសម្បត្តិ និងគ្រឿងអលង្ការដ៏មានតម្លៃជាច្រើនពីបន្ទប់ជួលរបស់ជនរងគ្រោះ ។
ហេតុការណ៍នេះ បានកើតឡើងកាលពីថ្ងៃទី០៦ ខែវិច្ឆិកា ឆ្នាំ២០២៦ វេលាម៉ោង ០១និង០០នាទីរំលងអធ្រាត្រ នៅចំណុចផ្ទះលេខ១២៤ ផ្លូវលេខ៣៦៩ ភូមិកណ្តាល សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ។
ឈ្មោះ ជឹម កែវ ភេទប្រុស អាយុ ២២ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ ។
តាមប្រភពព័ត៌មានពីសមត្ថកិច្ចបានឱ្យដឹងថា នៅមុនពេលកើតហេតុ ជនរងគ្រោះបានបិទទ្វារបន្ទប់ និងចាក់គន្លឹះត្រឹមត្រូវ ប៉ុន្តែពុំបានបំពាក់សោសុវត្ថិភាពបន្ថែមនោះឡើយ រួចក៏ចូលសម្រាក ។ លុះដល់ម៉ោង ០១យប់រំលងអធ្រាត្រថ្ងៃដដែល ជនរងគ្រោះបានក្រោកពីដំណេកដើម្បីស្វែងរកទូរស័ព្ទសម្រាប់បើកពិលចូលបន្ទប់ទឹក តែរកមិនឃើញ ក៏សម្រេចចិត្តបើកភ្លើងពិនិត្យមើល ស្រាប់តែភ្ញាក់ផ្អើលឃើញបាត់បង់ទ្រព្យសម្បត្តិជាច្រើន រួមមាន កាបូបដៃចំនួន ០២ (ពណ៌ទឹកប៊ិច ចំនួន ១ និងពណ៌ស្វាយលាយស ចំនួន ១) ទូរស័ព្ទដៃចំនួន ០៣គ្រឿង , ម៉ាក iPhone 17 Pro Max ចំនួន ១គ្រឿង , ម៉ាក iPhone 13 Pro Max ពណ៌ខៀវ ចំនួន ១គ្រឿង , ម៉ាក iPhone 15 Pro Max ពណ៌ខ្មៅ ចំនួន ១គ្រឿង , គ្រឿងអលង្ការ និងវត្ថុមានតម្លៃផ្សេងទៀត , ខ្សែកអង្កាំចំនួន ០១ខ្សែ , នាឡិកាដៃពណ៌ទឹកប្រាក់ ដាំត្បូងពណ៌សតូចៗចំនួន ០១ , ក្រវិលលោហៈធាតុដាំត្បូងចំនួន ០៥ (ពណ៌ទឹកមាសចំនួន ២ និងពណ៌ទឹកប្រាក់ចំនួន ៣) , ខ្សែកលោហៈធាតុពណ៌ទឹកប្រាក់ចំនួន ០១ខ្សែ មានបន្តោងរូបមេសោ និងកូនសោពណ៌ទឹកមាស , កន្លាស់អាវលោហៈធាតុពណ៌ទឹកមាស ដាំត្បូងតូចៗចំនួន ០១ , បន្តោងខ្សែករូបព្រះ លោហៈពណ៌លឿងទុំចំនួន ០១ ។
ក្រោយពេលកើតហេតុ ជនរងគ្រោះបានដាក់ពាក្យបណ្តឹងនៅប៉ុស្តិ៍នបាលរដ្ឋបាល ដើម្បីឱ្យជួយអន្តរាគមន៍និងស្រាវជ្រាវ ។ ដោយមានការយកចិត្តទុកដាក់ពីសមត្ថកិច្ចជំនាញ ឈានដល់ម៉ោង ១៥និង៣០នាទី ថ្ងៃទី០៦ ខែវិច្ឆិកា ឆ្នាំ២០២៦ ដដែល សមត្ថកិច្ចបានបើកប្រតិបត្តិការស្រាវជ្រាវយ៉ាងសកម្មរហូតឃាត់ខ្លួនបានជនសង្ស័យម្នាក់នៅចំណុចមុខយឿត្រី ផ្លូវបេតុង ភូមិដើមចាន់ សង្កាត់ច្បារអំពៅទី២ រួមទាំងដកហូតបានវត្ថុតាងសព្វគ្រប់ទាំងអស់ខាងលើមកវិញ និងបញ្ជូនមកទីស្នាក់ការប៉ុស្តិ៍ដើម្បីសាកសួរតាមនីតិវិធី ។
បច្ចុប្បន្ន ជនសង្ស័យខាងលើ រួមទាំងវត្ថុតាង ត្រូវបានសមត្ថកិច្ចជំនាញកសាងសំណុំរឿងបញ្ជូនបន្តទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ