រាជធានីភ្នំពេញ ៖ ផលិតកម្មហនុមាន បានប្រកាសដល់សាធារណជនថា ខ្សែភាពយន្តរឿង «ដុំហ្វ៊ីលចុងក្រោយ» នឹងត្រៀមខ្លួនចាក់បញ្ចាំងនៅតាមរោងភាពយន្តក្នុងប្រទេសកម្ពុជានៅខែសីហា ឆ្នាំ២០១៥ ។
រាជធានីភ្នំពេញ ៖ ផលិតកម្មហនុមាន បានប្រកាសដល់សាធារណជនថា ខ្សែភាពយន្តរឿង «ដុំហ្វ៊ីលចុងក្រោយ» នឹងត្រៀមខ្លួនចាក់បញ្ចាំងនៅតាមរោងភាពយន្តក្នុងប្រទេសកម្ពុជានៅខែសីហា ឆ្នាំ២០១៥ ។
លើសពីនេះ ខ្សែភាពយន្ត «ដុំហ្វ៊ីលចុងក្រោយ» នឹងចូលរួមក្នុងមហោស្រពភាពយន្តអន្តរជាតិនៅក្នុងប្រទេសនានានៅជុំវិញពិភពលោក រួមមានមហោស្រពភាពយន្តអន្តរជាតិ ឡូសអេនចឺឡេស និងអាស៊ីប៉ាស៊ីហ្វិក ចាប់ពីថ្ងៃទី២៣ដល់ថ្ងៃទី៣០ ខែមេសា ឆ្នាំ២០១៥ ។ មហោស្រពភាពយន្តអន្តរជាតិអាស៊ីខាងកើត នៅទីក្រុង Udine ប្រទេសអីុតាលី ចាប់ពីថ្ងៃទី២៣ មេសា ដល់ថ្ងៃទី២ ខែឧសភា ឆ្នាំ២០១៥ មុននឹងត្រៀមខ្លួនបន្តដំណើរទៅចូលរួមមហោស្រពភាពយន្តអន្តរជាតិ Bentonville នៅសហរដ្ឋអាមេរិក ចាប់ពីថ្ងៃទី៥ ដល់ថ្ងៃទី៩ ខែឧសភា ឆ្នាំ២០១៥ ។
ខ្សែភាពយន្ត «ដុំហ្វ៊ីលចុងក្រោយ» ធ្លាប់ទទួលបានពានរង្វាន់ចំនួន២ ទីមួយគឺ ពានរង្វាន់ Spirit of Asia ដល់អ្នកដឹកនាំរឿង សុទ្ធោ គុល្លិការនៅប្រទេសជប៉ុន កាលពីខែតុលា ឆ្នាំ២០១៤ និងពានរង្វាន់តួរងល្អបំផុតដល់លោកសុខ សុធន ពីមហោស្រពភាពយន្តអន្តរជាតិអាសា៊ន នៅប្រទេសម៉ាឡេស៊ី កាលពីខែមេសា ឆ្នាំ២០១៥ ។
ដោយសារមានវត្តមានរឿង «ដុំហ្វ៊ីលចុងក្រោយ» បានធ្វើឱ្យវិស័យខ្សែភាពយន្តរបស់ប្រទេសកម្ពុជា ងើបមុខឡើងវិញ និងបន្តខ្លួនឱ្យកាន់តែរីកចម្រើន ។ សុទ្ធោ គុល្លិការ បានប្រើទេពកោសល្យរបស់ខ្លួនបង្កើតឱ្យមានលទ្ធផលផ្លែផ្កាគួរឱ្យកត់សម្គាល់ក្នុងការឆ្លុះបញ្ចាំងពីប្រវត្តិដ៏ជូរចត់នៃការបែកបាក់គ្នារបស់ប្រជាជនខ្មែរ តាមរយៈការប្រៀបធៀបជីវិតរបស់ក្រុមគ្រួសារមួយនៅក្នុងរឿងនេះ ។
កំណត់ត្រាដែលធ្វើឱ្យរំជួលអារម្មណ៍នៅក្នុងវិស័យខ្សែភាពយន្តនៅសម័យយុគមាសរបស់ប្រទេសកម្ពុជាដែលធ្លាប់តែពង្វក់ចិត្តអ្នកទស្សនា តែចុងក្រោយត្រូវបានបំផ្លាញទាំងស្រុង ដោយពួកខ្មែរក្រហមក្នុងឆ្នាំ១៩៧៩ គឺត្រូវលេចឡើងនៅក្នុងរឿង «ដុំហ្វ៊ីលចុងក្រោយ» របស់សុទ្ធោ គុល្លិការ ។
«ដុំហ្វ៊ីលចុងក្រោយ» ជាខ្សែភាពយន្តឆ្លុះបញ្ចាំងពីជីវិតផ្ទាល់ខ្លួន ជារឿងនិទានឆ្លងជំនាន់បង្ហាញពីការស្រឡាញ់ និងការស្អប់ ដែលកើតឡើងពីការបាត់បង់បេតិកភណ្ឌ និងអត្តសញ្ញាណ ដោយសារការបំផ្លាញដោយខ្មែរក្រហម ។ នៅក្នុងរឿងនេះផ្ទាល់មានការបង្ហាញទាំងការអប់រំ និងមនោសញ្ចេតនាដ៏ជូរចត់ដែលប្រជាជនខ្មែរធ្លាប់ជួបប្រទះ ។ រឿង «ដុំហ្វ៊ីលចុងក្រោយ» ជាខ្សែភាពយន្តមួយដែលលេចចេញឡើងក្រោមស្នាដៃរបស់អ្នកដឹកនាំរឿងជាស្ត្រីខ្មែរដែលធ្វើឱ្យមានការចាប់អារម្មណ៍ជាខ្លាំងពីអន្តរជាតិ ។ រឿងនេះថតនៅក្នុងប្រទេសកម្ពុជា អំឡុងឆ្នាំ២០១៣ ដោយមានការចូលរួមពីអ្នកសម្តែងដ៏មានទេពកោសល្យជាច្រើនរូប រួមមានកញ្ញាម៉ារីណែត អ្នកស្រីឌី សាវ៉េត លោករស់ មុន្នី និងជាស្នាដៃរបស់ផលិតកម្មហនុមាន ។
រឿងមួយដែលបានកប់ចោលនៅក្នុងវាលពិឃាត គឺត្រូវបានលាតត្រដាងចេញនូវការណ៍ ពិត ។ នៅក្នុងរោងកុនមួយដែលគេបោះបង់ចោល សោភ័ណ្ឌ ដែលជាយុវតី ចចេសរឹងរូស បានរកឃើញរឿងចាស់មួយ ដែលសម្តែងដោយម្តាយរបស់នាង ដែលនេះផ្តល់ឱកាសឱ្យនាងបានដឹងរឿងរ៉ាវជាច្រើន ទាក់ទិននឹងក្រុមគ្រួសាររបស់នាង នៅពេលរស់នៅក្នុងសម័យខ្មែរក្រហម ៕
ចែករំលែកព័តមាននេះ