រាជធានីភ្នំពេញ ៖ គិតមកត្រឹមព្រឹកថ្ងៃទី១៨ ខែតុលា ឆ្នាំ២០២០ ថ្វីដ្បិតតែភូមិឋាននានារួមជាមួយផ្ទះសម្បែងរាប់ពាន់ខ្នងនៅក្នុងភូមិសាស្ត្រខណ្ឌដង្កោ នៅតែត្រូវទឹកជន់លិចបន្តក្ដី ប៉ុន្តែទឹកស្ទឹងព្រែកត្នោតឯណោះវិញបានបន្តស្រកចុះ១,២ម៉ែត្រហើយ ប្រសិនបើគ្មានភ្លៀងធ្លាក់បន្តទៀតទេ និងវិលទៅរកស្ថានភាពដើមវិញ…
រាជធានីភ្នំពេញ ៖ គិតមកត្រឹមព្រឹកថ្ងៃទី១៨ ខែតុលា ឆ្នាំ២០២០ ថ្វីដ្បិតតែភូមិឋាននានារួមជាមួយផ្ទះសម្បែងរាប់ពាន់ខ្នងនៅក្នុងភូមិសាស្ត្រខណ្ឌដង្កោ នៅតែត្រូវទឹកជន់លិចបន្តក្ដី ប៉ុន្តែទឹកស្ទឹងព្រែកត្នោតឯណោះវិញបានបន្តស្រកចុះ១,២ម៉ែត្រហើយ ប្រសិនបើគ្មានភ្លៀងធ្លាក់បន្តទៀតទេ និងវិលទៅរកស្ថានភាពដើមវិញ ជាក់ជាមិនខានឡើយ។
ចំណែកប្រជាពលរដ្ឋដែលរស់នៅឆ្ងាយបន្តិចពីស្ទឹង និងត្រូវអាជ្ញាធរជម្លៀសចេញកាលពីថ្ងៃមុននោះក៏បានវិលត្រឡប់ទៅកាន់លំនៅដ្ឋានរៀងៗខ្លួនវិញខ្លះៗហើយ លើកលែងតែអ្នកនៅកៀកនឹងមាត់ស្ទឹង និងអ្នកដែលរស់នៅក្នុងបុរីនានាដែលស្ថិតនៅតាមផ្លូវលេខ២១៧ និងតំបន់ជុំវិញនោះប៉ុណ្ណោះដែលមិនទាន់អាចត្រឡប់ទៅវិញបានល្គឹកណាតែទឹកស្រកអស់ទាំងស្រុងទើបអាចត្រឡប់ទៅផ្ទះវិញបាន។
មន្ត្រីក្រសួងធនធានទឹកនិងឧតុនិយមដែលប្រចាំការនៅឯស្ថានីយ៍ទំនប់៧មករា ភូមិទឹកថ្លា សង្កាត់ក្រាំងពង្រ ខណ្ឌដង្កោ បានប្រាប់ថា ខណៈនេះកម្រិតទឹកស្ទឹងព្រែកត្នោតកំពុងបន្តស្រកចុះច្រើនហើយ ដោយទឹកកំពុងស្ថិតនៅក្នុងកម្ពស់ជា៥ម៉ែត្រ និងស្រកចុះ១ម៉ែត្រ២តឹកហើយ ។ ប្រសិនបើគ្មានភ្លៀងធ្លាក់បន្តទៀតនោះទឹកសបទឹងនេះអាចនិងស្រកបន្តទៀត ហើយបើស្រកត្រឹម៦ឬ៧តឹកទៀត នឹងវិលទៅរកស្ថានភាពធម្មតាវិញហើយ ហើយប្រទេសកម្ពុជាយើងទទួលរងឥទ្ធិពលព្យុះចំនួន២១ ប៉ុន្តែបានឆ្លងកាត់ព្យុះចំនួន១៧រួចមកហើយ នៅសល់៤ព្យុះទៀត។
ប្រភពដដែលបានបន្តថា តាមការព្យាករណ៍បានមើលឃើញថាអាចនឹងមានភ្លៀងធ្លាក់ខ្លាំងនៅតំបន់ខេត្តជាប់មាត់សមុទ្រដូចជាខេត្កោះកុង ខេត្តព្រះសីហនុ និងខេត្តកំពត ហើយក្រៅពីនេះអាចធ្លាក់ដល់ខេត្តតាកែវនិងខេត្តស្វាយរៀងផង បើឆ្លងផុតរយៈពេល៣ថ្ងៃទៀតមិនអីនោះគឺផុតហើយ។
ទោះបីជាបែបណា នៅក្នុងឆ្នាំ២០២០នេះដោយសារតែកម្រិតទឹកភ្លៀងច្រើនទើបបណ្ដាលឲ្យមានទឹកជំនន់ ប៉ុន្តែយើងមានសំណាងផងដែរដោយសារតែនីវូទឹកទន្លេទាបជាទឹកស្ទឹងទើបទឹលឆាប់ស្រកទៅវិញលឿន ប្រសិនបើនីវូទឹកទន្លេនិងស្ទឹងមានកម្ពស់ស្មើរគ្នាវិញប្រាកដជាលំបាកខ្លាំងហើយ ព្រោះនិងធ្វើឲ្យទឹកជន់លិចគ្រប់កន្លែងមិនឡើយ។
សូមបញ្ជាក់ផងដែរថា ខណ្ឌដង្កោបានទទួលរងនូវការលិចលង់ជាពិសេសសង្កាត់ចំនួន៤របស់ខណ្ឌរួមមានសង្កាត់ទៀន សង្កាត់ស្ពានថ្ម សង្កាត់សាក់សំពៅ និងសង្កាត់គងនយ បានទទួលរងការលិចលង់ខ្លាំងជាងគេ ហើយដែលមានលំនៅដ្ឋានរាប់ពាន់ខ្នងនិងប្រជាពលរដ្ឋជាង៥ពាន់គ្រួសារដែលត្រូវបានអាជ្ញាធរនិងកងកម្លាំងប្រដាប់អាវុធគ្រប់ប្រភេទជួយសង្គ្រោះនិងជម្លៀសចេញទៅរកទីទួលសុវត្ថិភាពជាបន្តបន្ទាប់។
គិតមកត្រឹមព្រឹកថ្ងៃទី១៨ ខែតុលា ឆ្នាំ២០២០ ក្រុមប្រតិបត្តិការចម្រុះនៅតែបន្តជួយសង្គ្រោះដល់ប្រជាពលរដ្ឋនៅឡើយ ហើយក៏មមាញឹកក្នុងការដឹកជញ្ជូនប្រជាពលរដ្ឋដែលត្រូវបានជម្លៀសរួចពីទីទួលសុវត្ថិភាពតាមទូកនិងអូប័រទៅកាន់ផ្ទះសម្បែងនានាដែលកំពុងលិចទឹក ដើម្បីយកសម្ភារៈផ្សេងៗដែលនៅក្នុងផ្ទះរបស់ពួកគាត់ត្រឡប់មកកាន់ដីគោជាបន្តបន្ទាប់នៅឡើយ ។ ចំណែកទឹកដែលជន់លិចកំណាត់ផ្លូវលេខ២១៧ ហៅផ្លូវចំការដូង ក៏នៅបន្តលិចដដែលប៉ុន្តែបានស្រកចុះបន្តិចដែរហើយនិងសង្ឃឹមថានិងស្រកច្រើនបន្តទៀតឈានទៅរកការគោកទាំងស្រុង៕ (កែសម្រួលដោយ ៖ ធីតា)
ចែករំលែកព័តមាននេះ