ខេត្តបាត់ដំបង ៖ សេចក្តីរាយការណ៍ឱ្យដឹងថា បុរសម្នាក់ត្រូវគេជួយសង្គ្រោះជីវិតបានទាន់ពេល ក្រោយគាត់លោតទឹកនៅចំណុចស្ពានថ្មខាងមុខសាលាខេត្ត ស្ថិតក្នុងសង្កាត់ស្វាយប៉ោ ក្រុងបាត់ដំបង (ក្បែររីវើរ) ខណៈទឹកកំពុងឡើងខ្លាំងផង បង្កការភ្ញាក់ផ្អើល…
ខេត្តបាត់ដំបង ៖ សេចក្តីរាយការណ៍ឱ្យដឹងថា បុរសម្នាក់ត្រូវគេជួយសង្គ្រោះជីវិតបានទាន់ពេល ក្រោយគាត់លោតទឹកនៅចំណុចស្ពានថ្មខាងមុខសាលាខេត្ត ស្ថិតក្នុងសង្កាត់ស្វាយប៉ោ ក្រុងបាត់ដំបង (ក្បែររីវើរ) ខណៈទឹកកំពុងឡើងខ្លាំងផង បង្កការភ្ញាក់ផ្អើល កាលពីវេលាម៉ោង១១និង៥៥នាទីថ្ងៃត្រង់ទី១៣ តុលា នេះ ។ ក្រោយពេលជួយសង្គ្រោះ បុរសនេះបាននិយាយថា ខ្លួនបានផឹកស្រាបៀរអស់២កំប៉ុង រួចដើរទៅលោតទឹកនៅលើស្ពានខាងមុខសាលាខេត្តតែម្ដង។
សេចក្តីរាយការណ៍បន្តថា ការជួយសង្គ្រោះជីវិតបុរសរូបនេះ គឺបានសហការពីកម្លាំង អន្តរាគមន៍ចម្រុះ ក្នុងនោះមានយោធា, កម្លាំងអាវុធហត្ថ និងប៉ូលិសចរាចរណ៍ដែលកំពុងប្រចាំការនៅទីនោះទៅជួយទាន់ ខណៈជនរងគ្រោះបានហូរតាមខ្សែទឹកទៅទើរដើមឈើមួយកន្លែង ។ ហើយសំណាងដែលគាត់មិនលិចចូលទឹកបាត់នោះ។
បើតាមប្រភពពីកម្លាំងដែលបានជួយសង្គ្រោះយកគាត់មកដាក់លើដីគោកឱ្យដឹងដែរថា គាត់មានឈ្មោះចាន់ រតនៈ ហៅចិន អាយុ៣២ឆ្នាំ មានទីលំនៅរាជធានីភ្នំពេញ ។ ជនរងគ្រោះត្រូវបានកម្លាំងជួយសម្រួលនិងធ្វើចលនាលើខ្លួនគាត់ និងជួយពាក់អាវឱ្យគាត់វិញផងដែរ ។
មនុស្សជាច្រើនបានភ្ញាក់ផ្អើល ពេលឃើញបុរសនេះអណ្ដែតទឹក ខណ:ទឹកជំនន់កំពុងឡើងស្ទើរចាល់ស្ពាន។ ប៉ុន្តែត្រូវកម្លាំងចម្រុះប្រចាំគោលដៅក្បាលស្ពានសម្ដេចតេជោ ហ៊ុន សែន ត្រើយខាងលិច បានប្រឹងប្រែងជួយសង្គ្រោះបានទាន់ពេល។ បុរសនេះបានប្រាប់ថា មូលហេតុដែលខ្លួនលោតទឹកប៉ងសម្លាប់ខ្លួន ដោយសារតូចចិត្តប្រពន្ធយកប្ដីថ្មី ពេលខ្លួនជាប់គុក ហើយខ្លួនទើបចេញពីគុក កាលពីខែកញ្ញា មុននេះ។
ប៉ុន្តែបើតាមមន្ត្រីកងរាជអាវុធហត្ថ ដែលស្គាល់ប្រវត្តិបុរសនេះ បាននិយាយថា បុរសនេះទើបចេញពីគុក តែជននេះក៏ជាអ្នកសេពគ្រឿងញៀនឡើងវ៉ល់ដែរ។ មន្ត្រីដដែលបានប្រាប់ថា ក្រោយចេញពីគុកបុរសនេះបានបង្ករឿង ហើយត្រូវគេវាយដំទៀតផង តែត្រូវកម្លាំងកងរាជអាវុធហត្ថចុះអន្តរាគមន៏ទាន់។ បើនិយាយទៅបុរសនេះ គ្មានកន្លែងស្នាក់នៅទេ ហើយក៏ជាមនុស្សសេពថ្នាំញៀនផងដែរ។
ព័ត៌មានបន្ថែមនឹងមានផ្សាយជូនបន្ត ។
ចែករំលែកព័តមាននេះ