ខេត្តបន្ទាយមានជ័យ ៖ លោកឧត្តមសេនីយ៍ត្រីសិទ្ធិ ឡោះ ស្នងការនគរបាលខេត្តបន្ទាយមានជ័យ បានអញ្ជើញជាអធិបតីក្នុងពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរស័ក្តិជូនដល់មន្ត្រីនគរបាលជាតិនៃស្នងការដ្ឋាននគរបាលខេត្តបន្ទាយមានជ័យសរុបចំនួន៩៥រូប ក្នុងនោះមាននគរបាលនៃវរសេនាតូចការពារព្រំដែនគោកលេខ៩១១-៨៩១និង៨១៥។ ដែលពិធីនេះបានប្រារព្ធធ្វើឡើងនៅបញ្ជាការដ្ឋាននគរ…
ខេត្តបន្ទាយមានជ័យ ៖ លោកឧត្តមសេនីយ៍ត្រីសិទ្ធិ ឡោះ ស្នងការនគរបាលខេត្តបន្ទាយមានជ័យ បានអញ្ជើញជាអធិបតីក្នុងពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរស័ក្តិជូនដល់មន្ត្រីនគរបាលជាតិនៃស្នងការដ្ឋាននគរបាលខេត្តបន្ទាយមានជ័យសរុបចំនួន៩៥រូប ក្នុងនោះមាននគរបាលនៃវរសេនាតូចការពារព្រំដែនគោកលេខ៩១១-៨៩១និង៨១៥។ ដែលពិធីនេះបានប្រារព្ធធ្វើឡើងនៅបញ្ជាការដ្ឋាននគរ បាលវរសេនាតូចលេខ៩១១ ថ្ងៃទី២៩ ខែកញ្ញា ឆ្នាំ២០២០ ។
តាមសេចក្តីប្រកាសរបស់អគ្គស្នងការដ្ឋាននគរបាលជាតិ ដែលអានដោយលោកវរសេនីយ៍ឯកយី ប៊ុនរឿង នាយការិយាល័យបុគ្គលិក សម្រេចផ្ទេរភារកិច្ចតែងតាំងមុខតំណែងមន្ត្រីនគរបាលចំនួន៤៤រូប ក្នុងនោះ ថ្នាក់នាយផ្នែងចំនួន១០រូប,នាយរងផ្នែកចំនួន១០រូប,នាយប៉ុស្តិ៍ការពារព្រំដែនចំនួន០៦រូបនិងនាយរងប៉ុស្តិ៍ការពារព្រំដែនចំនួន១៨រូបនិង ត្រូវបានបំពាក់ឋានន្តរស័ក្តិចំនួន៥១រូប ក្នុងនោះ ថ្នាក់អនុសេនីយ៍ឯកចំនួន២០រូប,ថ្នាក់អនុសេនីយ៍ទោ២៣រូប,ថ្នាក់អនុសេនីយ៍ត្រីចំនួន៤រូប និងថ្នាក់ព្រិន្ទបាលឯកចំនួន៤រូប ។
មានមតិសំណេះសំណាលនាឱកាសនោះ លោកឧត្តមសេនីយ៍ត្រី សិទ្ធិ ឡោះ ស្នងការនគរបាលខេត្តបន្ទាយមានជ័យ បានសំដែងនូវការអបអរសាទរដល់មន្ត្រីនគរបាលនៃវរសេនាតូចការពារព្រំដែនគោកលេខ៩១១-៨៩១និង៨១៥ ដែលត្រូវបានអគ្គស្នងការនគរបាលជាតិ សម្រេចតម្លើងមុខតំណែងនិងបំពាក់ឋានន្តរស័ក្តិនាពេលនេះ សបញ្ជាក់ឲ្យឃើញពីការយកចិត្តទុកដាក់របស់ថ្នាក់ដឹកនាំអគ្គស្នងការនគរ បាលជាតិ មកលើការខិតខំប្រឹងប្រែងរបស់បងប្អូនកន្លងមក ក្នុងតួនាទីបំរើសេវាសន្តិសុខ ជូនប្រជាពលរដ្ឋ រស់នៅតាមបន្ទាត់ព្រំដែន និងការពារបូរណភាពទឹកដី ។
លោកឧត្តមសេនីយ៍ស្នងការ បានបញ្ជាក់ថា៖ដើម្បីជាកិច្ចឆ្លើយតបទៅនឹងថ្នាក់ដឹកនាំគ្រប់លំដាប់ សូមឲ្យកងម្លាំងនគរបាលដែលត្រូវបានប្រកាសផ្ទេរភារកិច្ច តែងតាំងមុខតំណែងនិងបំពាក់ឋានន្តរស័ក្តិនាពេលនេះត្រូវខិតខំអនុវត្តនូវតួនាទីភារកិច្ចរបស់ខ្លួន រក្សាសន្តិសុខសណ្តាប់ធ្នាប់ សុវត្ថិភាព ជូនប្រជាពលរដ្ឋរស់នៅតាមបន្ទាត់ព្រំដែន និងការពារបូរណភាពទឹកដីឲ្យបានគង់វង្ស ។ ទប់ស្កាត់នូវបទល្មើសឆ្លងដែន គ្រប់ប្រភេទ ពិសេសគឺអំពើភេរកម្មឆ្លងដែននិងការជួញដូរគ្រឿងញៀនឆ្លងដែន ការលួចនាំទំនិញខូចគុណភាពពីប្រទេសជិតខាង។
ទប់ស្កាត់ការលួចឆ្លងដែនដោយខុសច្បាប់របស់ពលករខ្មែរយើងទៅរកការងារធ្វើនៅប្រទេសថៃ ដែលត្រូវបានជឿតាមការអូសទាញរបស់មេខ្យល់ និងធ្វើការអប់រំណែនាំដល់ប្រជាពលករទាំងនោះកុំឲ្យពួកគាត់ចាញ់បោមេខ្យល់ក្នុងការលួចឆ្លងដែនដោយខុសច្បាប់ទៅរកការងារធ្វើនៅប្រទេសជិតខាង(ប្រទេសថៃ)នាំឲ្យមានគ្រោះថ្នាក់ដោយប្រការផ្សេងៗ ដែលក្នុងខណៈពេលនេះប្រទេសថៃ កំពុងតែមានវិធានការប្រយុទ្ធប្រឆាំងជាមួយជម្ងឺកូវីដ-១៩ ច្រកព្រំដែនត្រូវបានបិទមិនឲ្យមានការឆ្លងកាត់ ។ ជាមួយគ្នានោះត្រូវតែធ្វើស្រាវជ្រាវរកមុខសញ្ញាមេខ្យល់ ដើម្បីចាប់ឃាត់ខ្លួនកសាងសំណុំរឿងបញ្ជូនទៅតុលាការ ចាត់ការតាមច្បាប់។
នាឱកាសនោះដែរ លោកឧត្តមសេនីយ៍ត្រី សិទ្ធិ ឡោះ បានណែនាំផ្តាំផ្ញើដល់កងកម្លាំងនគរបាលការពារព្រំដែនទាំងអស់ត្រូវអនុវត្តតាមតួនាទីភារកិច្ចរបស់ខ្លួន ជាកងកម្លាំងរក្សាការពារសន្តិសុខជូនប្រជាពលរដ្ឋនិងទប់ស្កាត់ឲ្យបានទាន់ពេលវេលានូវសកម្មភាពរបស់ជនអគតិណាមួយដែលញុះញង់ក្នុងបំណងបង្កឲ្យកើតមានភាពអសន្តិសុខក្នុងសង្គម ។ ក្នុងនោះត្រូវមានសាមគ្គីភាពផ្ទៃក្នុងឲ្យបានរឹងមាំ សហការជាមួយកងកម្លាំងសមត្ថកិច្ច និងអាជ្ញាធរគ្រប់លំដាប់ថ្នាក់នៅតាមព្រំដែន និងត្រូវមានកិច្ចសហប្រតិបត្តិការល្អ ជាមួយសមត្ថកិច្ចនៃប្រទេសជិតខាង ដើម្បីរក្សាបាននូវព្រំដែនមានសន្តិភាព សាមគ្គីភាព សហប្រតិបត្តិការនិងការនិងការអភិវឌ្ឍន៍។
បន្ទាប់មកគណៈអធិបតីក៏បានប្រគល់ជូននូវអំណោយជាគ្រឿងឧបភោគ បរិភោគ របស់លោកនាយឧត្តមសេនីយ៍សន្តិបណ្ឌិតនេត សារឿន អគ្គស្នងការនគរបាលជាតិ មាន៖ អង្ករ, នំអន្សម, មី, ត្រីខ, ទឹកស៊ីអ៊ីវ, ទឹកត្រី, ទឹកបរិសុទ្ធ និងអាវភ្លៀងដល់អង្គភាពនគរបាលវរសេនាតូចការពារព្រំដែនគោកលេខ៩១១, ៨៩១ និង៨១៥ និងបន្តទៅពិនិត្យមើលប៉ុស្តីនគរបាលការពារ ព្រៃគប់ និងប៉ុស្តិ៍ការពារព្រំដែនសិលាខ្មែរ នៃអង្គភាពវរសេនាតូចការពារព្រំដែនគោកលេខ៩១១៕ (កែសម្រួលដោយ ៖ ធីតា)
ចែករំលែកព័តមាននេះ