ខេត្តព្រះសីហនុ ៖ កាំភ្លើងAK០១ដើមមានបង់ចំនួន៣ និងគ្រាប់ចំនួន៣៤គ្រាប់ ត្រូវបានបុគ្គលិកក្រុមហ៊ុនស៊ិនទ្រី ប្រទះឃើញនៅក្នុងបាវពណ៌ខៀវក្បែរគំនរសំរាមមុខផ្ទះប្រជាពលរដ្ឋ ស្ថិតក្នុងក្រុម១៧ ភូមិ៣ សង្កាត់
ខេត្តព្រះសីហនុ ៖ កាំភ្លើងAK០១ដើមមានបង់ចំនួន៣ និងគ្រាប់ចំនួន៣៤គ្រាប់ ត្រូវបានបុគ្គលិកក្រុមហ៊ុនស៊ិនទ្រី ប្រទះឃើញនៅក្នុងបាវពណ៌ខៀវក្បែរគំនរសំរាមមុខផ្ទះប្រជាពលរដ្ឋ ស្ថិតក្នុងក្រុម១៧ ភូមិ៣ សង្កាត់៤ ក្រុងព្រះសីហនុ ខណៈពេលរថយន្តដើរប្រមូលសំរាមកាលពីវេលាម៉ោង៦ និង១៥ព្រឹក ថ្ងៃទី២២ មីនា ២០១៥។
យោងតាមប្រភពពីឈ្មោះ អ៊ុន សាន ភេទប្រុស អាយុ២៦ឆ្នាំ មុខរបរកម្មករកើបសំរាមបានបញ្ជាក់ឱ្យដឹងថា នៅវេលាម៉ោងប្រមាណជាង៦ព្រឹក ខណៈពេលក្រុមរបស់ខ្លួន រួមជាមួយរថយន្តមួយគ្រឿងដើរប្រមូលសំរាមនៅម្តុំចំណុចកើតហេតុបានប្រទះឃើញបាវពណ៌ខៀវមួយមានសភាពធ្ងន់ខុសពីធម្មតា ទើបខ្លួនបានហែកបាវមើលថាតើក្នុងបាវមានអ្វីបានជាធ្ងន់ម្ល៉េះ នៅពេលខ្លួនហែកមើលបានស្រាប់តែបានឃើញកាំភ្លើងមួយដើមម៉ាកAK រួមជាមួយបង់ចំនួន៣ និងគ្រាប់ចំនួន៣៤គ្រាប់ នៅក្នុងបាវ ខ្លួនបានស្រែកប្រាប់មិត្តរួមការងារឱ្យមកមើល ទើបធ្វើឱ្យភ្ញាក់ផ្អើលដល់ប្រជាពលរដ្ឋ និងបានរាយការណ៍ទៅនគរបាលប៉ុស្តិ៍រដ្ឋបាលសង្កាត់លេខ៤ មួយសន្ទុះទើបសមត្ថកិច្ចមកដល់ហើយបានយកកាំភ្លើងចេញបាត់ទៅ។
ជុំវិញករណីប្រទះឃើញកាំភ្លើង AKនេះ ប្រជាពលរដ្ឋដែលរស់នៅជុំវិញកន្លែងកើតហេតុបានសន្និដ្ឋានថា កាំភ្លើងនេះគេសង្ស័យថា មានជនមិនស្គាល់មុខយកមកប្លុងចោលនៅចន្លោះម៉ោងពាក់កណ្តាលអាធ្រាត្រព្រោះកាលពីព្រលប់គេពុំបានឃើញបាវពណ៌ខៀវនេះនៅកន្លែងនោះទេ ហើយគេពុំដឹងថា មូលហេតុអ្វីបានជាជនមិនស្គាល់អត្តសញ្ញាណនោះយកកាំភ្លើងមកប្លុងចោលតាមផ្លូវសាធារណៈ ខណៈពេលខេត្តព្រះសីហនុកំពុងមានបញ្ហាសន្តិសុខកើតឡើងផ្ទួនៗគ្នានៅដើមឆ្នាំ២០១៥នេះ។
ដោយឡែក លោកអនុសេនីយ៍ទោ លុយ ហាង នាយប៉ុស្តិ៍នគបាលរដ្ឋបាលសង្កាត់លេខ៤ បានគូសបញ្ជាក់ថា ចំពោះកាំភ្លើងម៉ាកAK រួមជាមួយបង់ចំនួន៣ និងគ្រាប់ចំនួន៣៤គ្រាប់នេះ កំពុងរក្សាទុកនៅប៉ុសិ៍្តនគរបាលសង្កាត់លេខ៤ រង់ចាំធ្វើកំណត់ហេតុប្រគល់ជូនស្នងនគរបាលខេត្តព្រះសីហនុយកទៅចាត់ចែងបន្តចំពោះថា កាំភ្លើងនោះមកពីណានោះសមត្ថកិច្ចនៅពុំទាន់ស្រាវជ្រាវដឹងនៅឡើយទេ៕
ចែករំលែកព័តមាននេះ