រាជធានីភ្នំពេញ ៖ ប្រមាណតែ២០ថ្ងៃទៀតប៉ុណ្ណោះ គូស្វាមី-ភរិយាសិល្បៈសួស វីហ្សា និងថមមី នឹងបានឃើញមុខកូនដំបូងរបស់ពួកគេហើយ ។ ទាំង២នាក់កំពុងតែសប្បាយចិត្ត និងអន្ទះសាចង់ឲ្យឆាប់ដល់ថ្ងៃនោះ ដ្បិតចង់ឃើញមុខកូនស្រីរបស់ខ្លួន ។ ទន្ទឹមនេះវីហ្សា បានផ្គាប់ចិត្តស្វាមីដោយរឿងមួយ តើអ្វី?
ខណៈកូនដំបូងកៀកថ្ងៃសម្រាលហើយនោះ តារាចម្រៀងសួស វីសា បានទិញបន្ថែមថយន្តថ្មីមួយគ្រឿងទៀតជូនស្វាមីលោកថមមី ។ វាជាការបន្ថែមភាពហ៊ឺហាមួយកម្រិតទៀត បន្ទាប់ពីរថយន្ត Lexus 570 ដែលគ្រួសារនាងកំពុងជិះរាល់ថ្ងៃ ។ រថយន្តថ្មីដែលសួស វីសា ទិញនេះគឺជាប្រភេទរថយន្តមួយបាំងកន្លះម៉ាក Tundra តម្លៃរាប់ម៉ឺនដុល្លារ ។ រថយន្តនេះនាងទិញសម្រាប់ទុកឲ្យស្វាមីជិះទៅបំពេញការងារតាមខេត្ត ម្តងៗ ជំនួសឲ្យរថយន្តដែលប្រើសព្វថ្ងៃនេះវិញ ។
ជាមួយនឹងភាពរីករាយការទិញរថយន្តទំនើបថ្មីមួយគ្រឿងបន្ថែមនេះលោកថមមី បានបង្ហោះសារតាមហ្វេសប៊ុករបស់ខ្លួនថា «ស្វាគមន៍សមាជិកថ្មីបន្ថែម អរគុណសន្តិភាព អរគុណការខំប្រឹងប្រែងតស៊ូ អរគុណប្រពន្ធដែលតែងតែឲ្យកម្លាំងចិត្តប្តី សូមឲ្យ ហេងៗ រីកចម្រើនតទៅមុខទៀត។ សមាជិកថ្មីសម្រាប់ទុកទៅតាមខេត្តនិងចម្ការ ហត់ណាស់រាល់ថ្ងៃ តែក៏សប្បាយចិត្តព្រោះបានឃើញការតស៊ូបានដូចបំណង »។
តាមរយៈការបង្ហាញរថយន្តថ្មីមួយនេះមិត្តភក្តិ ជាពិសេសបណ្តាអ្នកគាំទ្រគូស្វាមី-ភរិយានេះជាច្រើនបានសម្ដែងការអបអរសាទរ និងស្ងើចសរសើរចំពោះសុភមង្គលគ្រួសាររបស់សួស វីសា និងលោកថមមី ដែលមានភាពផ្អែមល្ហែម និងសុភមង្គល ។
ប៉ុន្មានថ្ងៃទៀតខាងមុខនេះកូនស្រីសួស វីសា និងលោកថមមី នឹងសម្រាលឃើញពន្លឺថ្ងៃហើយ ក្នុងពេលដែលអ្នកទាំងពីរកំពុងរង់ចាំយ៉ាងអន្ទះសាចង់ឃើញមុខកូនស្រីដំបូងរបស់ពួកគេ ។ ជាមួយនឹងរូបភាពពពោះជិតគ្រប់ខែតារាចម្រៀងផលិតកម្មហង្សមាសសួស វីសា បានបង្ហោះសារថា «ពេលវេលាដែលរង់ចាំជួបមុខកូនស្រីជាទីស្រលាញ់របស់ខ្ញុំកាន់តែកៀកនឹងមកដល់ហលយ នៅសល់តែ២០ថ្ងៃទៀតទេម្តាយបានជួបមុខកូនហើយកែវភ្នែករបស់ម៉ាក់ ។ ម៉ាក់ៗពពោះបាន៣៤សប្តាហ៍៤ថ្ងៃហើយ ដើមខែ១០បានជួបមុខអូនជេននីហើយណាអ៊ំពូមីង លោកតា លោកយាយ ។ សូមអរគុណដល់បងប្អូន អ៊ំ ពូមីងទាំងអស់គ្នាសម្រាប់ពាក្យជូនពរ ល្អៗមកកាន់ក្រុមគ្រួសាររបស់ខ្ញុំ »។
ចាប់តាំងពីអំឡុងពេលពពោះនោះមកទាំងសួស វីសា និងលោកថមមី បានទម្លាក់ចោលការងារសិល្បៈស្ទើរទាំងស្រុង ដើម្បីទុកឱកាសបានច្រើនមើលថែកូនដំបូងរបស់ពួគេ ក្នុងនោះតារាចម្រៀងរូបនេះត្រូវគេមើលឃើញថា នាងជានារីដែលមានភាពកក់ក្តៅ និងសុភមង្គលយ៉ាងខ្លាំង ដោយសារតែនាងបានទទួលការថ្នាក់ថ្នម និងការមើលថែយ៉ាងយកចិត្តទុកដាក់បំផុតពីស្វាមី ។
យ៉ាងណាក្ដីបើទោះបីជាអ្នកទាំងពីរបានលុបចោលការងារសិល្បៈមួយរយះនេះក៏ដោយ ប៉ុន្តែគូភរិយាស្វាមីដែលជាអ្នកសិល្បៈដូចគ្នានេះតែងតែបង្ហាញសុភមង្គលគ្រួសាររបស់ពួកគេតាមរយៈការស្និទ្ធស្នាល និងផ្អែមល្ហែមតាមរយៈការដើរលេងកម្សាន្តនៅតាមរមណីយដ្ឋាននានាជាបន្តបន្ទាប់ មិនចាញ់គូស្វាមីដែលជាអ្នកសិល្បៈដូចគ្នាមួយចំនួនទៀតនោះឡើយ ៕
ចែករំលែកព័តមាននេះ