ខេត្តឧត្តរមានជ័យ ៖ រថយន្តម៉ាកតូយូតាវីហ្គោពីរបាំងបុកជាមួយរថយន្តភ្លៅប្រាំក្រឡាប់ស្លាប់មនុស្ស២នាក់ និង៥នាក់ទៀតរងរបូសធ្ងន់-ស្រាលត្រូវបានដឹកទៅសង្គ្រោះនៅមន្ទីពេទ្យបង្អែកខេត្តភ្លាមៗ ។ ហេតុការណ៍នេះបានកើតឡើងកាលពីវេលាម៉ោង៩ និង៣០នាទីព្រឹក ថ្ងៃទី២៧ ខែកុម្ភៈ ឆ្នាំ២០១៥ នៅចំណុចផ្លូវគ្រួសក្រហមបំបែកជាបួនក្នុងភូមិកំណប់ សង្កាត់បន្សាយរាក់ ក្រុងសំរោង ។
ប្រភពនៅកន្លែងកើតហេតុបានឱ្យដឹងថា រថយន្តម៉ាកតូយូតាវីហ្គោពីរបាំង ពណ៍ស្ករ ស្លាកលេខភ្នំពេញ 2K 4066 ផ្ទុកមនុស្សប្រុស-ស្រីចំនួន៦នាក់ បើកបរក្នុងទិសដៅពីជើងទៅត្បូង ក្នុងល្បឿនលឿន បានបុកទទឹងជាមួយរថយន្តយីឌុបកង់១០ ពណ៌ប្រផះលាយខៀវ ពាក់ស្លាកលេខ ក្រចេះ 3A 0339 បើកបរក្នុងទិសដៅពីលិចទៅកើតក្រឡាប់ស្លាប់២នាក់នៅកន្លែងកើតហេតុ និង៥នាក់ទៀតរងរបួសធ្ងន់ និងស្រាលត្រូវបានដឹកតាមរថយន្តទៅសង្គ្រោះនៅមន្ទីពេទ្យបង្អែកខេត្តភ្លាមៗផងដែរ ។
សមត្ថកិច្ចប៉ូលីសនិយាយថា ចំនួនមនុស្សរងគ្រោះថ្នាក់ចរាចរនេះមាន២នាក់បានស្លាប់ ១-ឈ្មោះ សំ រិទ្ធមុន្នីសេត ភេទស្រី អាយុ៨ឆ្នាំ,២-ឈ្មោះ ឃ្លាំង ចាន្នី ប្រុស អាយុ៥៦ឆ្នាំ ។ ចំណែកអ្នករងរបួសធ្ងន់-ស្រាលចំនួន៥នាក់ទៀតមានឈ្មោះ ១-ទៀង ចាន់ដារ៉ា ភេទប្រុស អាយុ៣០ឆ្នាំ រស់នៅភ្នំពេញ(អ្នកបើកបរ), ២-ជួង ប៊ុននី ភេទប្រុស អាយុ៣៦ឆ្នាំ, ៣-សំ វុទ្ធី ភេទប្រុស អាយុ៥៤ឆ្នាំ, ៤-សំ ពុទ្ធា ភេទស្រីអាយុ៣០ឆ្នាំ និងទី៥-គង់ យ៉េត ភេទស្រី អាយុ៥០ឆ្នាំ ហើយអ្នកទាំង៧នាក់ជួបគ្រោះថ្នាក់នេះមាន៥នាក់មានអាសយដ្ឋាននៅភ្នំពេញ និង២នាក់ទៀតរស់នៅខេត្តឧត្តរមានជ័យ ៕
ចែករំលែកព័តមាននេះ