រាជធានីភ្នំពេញ ៖ ចាប់ពីថ្ងៃទី២៣ កុម្ភៈ ដល់ថ្ងៃទី៣ មីនា ឆ្នាំ២០១៥ ក្រសួងវប្បធម៌និងវិចិត្រសិល្បៈរៀបចំមហោស្រពសិល្បៈយុវជនទូទាំងប្រទេសដើម្បីអបអរទិវាវប្បធម៌ជាតិ៣មីនា លើកទី១៧ ឆ្នាំ២០១៥ ក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន។ ក្នុងពិធីបើកមហោស្រពកាលពីម្សិលមិញ ក្រុមសិល្បៈពីទូទាំងប្រទេសបានជួបជុំគ្នា ។
គោលបំណងសំខាន់នៃមហោស្រពឆ្នាំនេះ ដើម្បីអប់រំ បណ្តុះបណ្តាលយុវជនខ្មែរ ពិសេសសិស្សថ្នាក់មធ្យម និងនិស្សិតថ្នាក់ឧត្តមឱ្យយល់ពីតម្លៃសិល្បៈប្រពៃណីជាតិខ្មែរគ្រប់ទម្រង់ ។
ក្នុងពិធីបើកមហោស្រពសិល្បៈយុវជនទូទាំងប្រទេសនាព្រឹកថ្ងៃទី២៣ កុម្ភៈ នៅសាលសន្និសីទចតុម្មុខរាជធានីភ្នំពេញ លោកជំទាវភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈថ្លែងថា មហោស្រពសិល្បៈយុវជនទូទាំងប្រទេសឆ្នាំ២០១៥ដែលរៀបចំធ្វើឡើងនេះ គឺអនុវត្តតាមប្រសាសន៍របស់សម្តេចតេជោ ហ៊ុន សែន នាយករដ្ឋមន្ត្រី ដែលណែនាំក្នុងឱកាសទិវាវប្បធម៌ជាតិ៣មីនាលើកទី១៦ឆ្នាំ២០១៤ ។ នេះជាលទ្ធផលនៃកម្លាំងពលកម្មរបស់សិល្បករសិល្បការិនី លោកគ្រូ អ្នកគ្រូនិងសិស្ស-និស្សិតដែលជាយុវជនកម្លាំងបន្តវេនមិនអាចខ្វះបាន ។ «វប្បធម៌រលត់ ជាតិរលាយ វប្បធម៌ពណ្ណរាយជាតិថ្កើងថ្កាន» ការរួមចំណែករបស់យុវជនសិស្ស-និស្សិតក្នុងចលនាការពារ និងកសាងជាតិ គឺជាកត្តាដ៏ចាំបាច់ពិតមែន តែដោយឡែកការចូលរួមក្នុងព្រិត្តការណ៍«យុវជនដើម្បីវប្បធម៌ជាតិ» គឺជាការរួមចំណែកធ្វើឱ្យប្រទេសជាតិកាន់តែរុងរឿង ។
សិល្បៈវប្បធម៌ជាផ្នែកមួយសំខាន់នៃអត្តសញ្ញាណជាតិ និងជាប្រភពនៃអង្គឯកភាពជាតិផងដែរ ។ បំណងធំរបស់ក្រសួងវប្បធម៌ចង់សាបព្រោះនូវសញ្ញាណនៃសិល្បៈប្រពៃណីជាតិឱ្យបានជ្រាបចូលយ៉ាងទូលំទូលាយក្នុងស្រទាប់យុវជន ព្រោះថា ភារកិច្ចរបស់យុវជនគឺជាអ្នកបន្តវេន និងទ្រទ្រង់កេរតំណែលវប្បធម៌។ ជឿជាក់ថា គ្រាប់ពូជទាំងនេះពិតជានឹងដុះដាលរីកលូតលាស់ច្រើនជាបន្តបន្ទាប់ ។
លោកឃឹម សារិទ្ឋ រដ្ឋលេខាធិការក្រសួងវប្បធម៌និងវិចិត្រសិល្បៈថ្លែងថា ក្រសួងវប្បធម៌បានសហការយ៉ាងជិតស្និទ្ធជាមួយក្រសួងអប់រំតាំងពីថ្នាក់កណ្តាលរហូតដល់ថ្នាក់មូលដ្ឋានក្នុងការបំផុសចលនាឱ្យយុវជនថ្នាក់មធ្យមនៅរាជធានី-ខេត្តនិងនិស្សិតថ្នាក់ឧត្តមទទួលការហ្វឹកហាត់អស់រយៈពេលជាច្រើនខែពីបច្ចេកទេសសម្តែងសិល្បៈពីរទម្រង់ គឺសិល្បៈរបាំ និងឈុតល្ខោនអប់រំ ។ ជាលទ្ធផលបន្ទាប់ពីបានចម្រាញ់ជម្រើសនិងជម្រុះតាមរយៈការបើកមហោស្រពត្រៀមនៅតាមរាជធានី-ខេត្ត ក្រសួងប្រមូលផ្តុំបានក្រុមសិល្បៈយុវជនឆ្នើមទូទាំងប្រទេសចំនួន៣៧ក្រុមដែលក្នុងនោះមានយុវសិស្ស និងនិស្សិតចូលរួមចំនួនជាង១.០០០នាក់ ។ ក្រុមសិល្បៈយុវជនឆ្នើមទាំង៣៧ក្រុមជាទូទៅមានស្នាដៃសិល្បៈរបស់ខ្លួនក្នុងមួយក្រុមចំនួន២ស្នាដៃគឺស្នាដៃរបាំ និងឈុតល្ខោនអប់រំមួយឈុតដែលសរុបទាំងអស់មានចំនួន៧២ស្នាដៃ ។ បើបែងចែកឱ្យដាច់ស្រឡះគ្នារវាងសិស្សថ្នាក់មធ្យមរាជធានី-ខេត្ត និងនិស្សិតថ្នាក់ឧត្តម ឃើញថា សិស្សថ្នាក់មធ្យមដែលមកពី២៥រាជធានី-ខេត្តទូទាំងប្រទេសមាន៥០ស្នាដៃ ។ និស្សិតថ្នាក់ឧត្តមនៅរាជធានីភ្នំពេញពីសាកលវិទ្យាល័យ ធំៗចំនួន១២មានស្នាដៃសិល្បៈចំនួន២២ ។ ស្នាដៃទាំង៧២នេះជាផលិតផលវប្បធម៌របស់យុវជនដែលបម្រើសេចក្តីសប្បាយរីករាយថ្លៃថ្នូរនិងការអប់រំ ។
ក្រុមសិល្បៈសិស្សថ្នាក់មធ្យមរាជធានីភ្នំពេញដែលយករបាំ «ផ្កាម្លិះ» និងឈុតល្ខោនរឿង «លាសែនឆ្ងាយ» ចូលរួមសម្តែងមានទឹកចិត្តរីករាយ តែថាការចូលរួមប្រលងនេះ គ្មានបំណងដណ្តើមជ័យលាភីពេកទេ សំខាន់គឺបានចូលរួមរក្សាតម្លៃសិល្បៈវប្បធម៌ជាតិទាំងអស់គ្នា ព្រោះជាកូនខ្មែរ ។ ម្យា៉ងទៀតពួកគេបានបង្កើតចំណងមិត្តភាពជាមួយយុវជនតាមបណ្តាខេត្ត-ក្រុងទាំងអស់ទូទាំងប្រទេស ។ ពួកគេសប្បាយពេលឃើញយុវជនខ្មែរជាសិស្សចូលរួមហាត់សិល្បៈដើម្បីប្រកួតគ្នាក្នុងន័យដឹងពីសមត្ថភាព និងយល់ដឹងពីអត្តសញ្ញាជាតិខ្មែរ។
ក្រុមសិល្បៈយុវជនដដែលនេះអំពាវនាវឱ្យមហាជនចូលរួមទស្សនាការសម្តែងសិល្បៈនៅសាលសន្និសីទចតុម្មុខចាប់ពីថ្ងៃ២៣កុម្ភៈដល់២៨មីនាដើម្បីជាកម្លាំងចិត្តដល់សិល្បករ ៕
ចែករំលែកព័តមាននេះ