ខេត្តមណ្ឌលគិរី ៖ តំបន់អាទិភាពសំខាន់ៗដែលត្រូវរក្សាទុកសម្រាប់ការអភិវឌ្ឍ រួមមាន របៀងអេកូទេសចរណ៍ និង ទេសចរណ៍ធម្មជាតិនៃដែនជម្រកសត្វព្រៃទាំង៥របៀងអេកូទេសចរណ៍វប្បធម៌ និង អេកូទេសចរណ៍ ប៊ូស្រា -ដាក់ដាំ ក្រុងសែនមនោរម្យ តំបន់ស្រុកអូររាំង តំបន់ប្រជុំជននៃស្រុកកោះញែក និង តំបន់ទេសចរណ៍សមាហរណតាមច្រកព្រំដែន នេះជាប្រសាសន៏របស់លោក ថោង ខុន រដ្ឋមន្ត្រីក្រសួងទេសចរណ៍ក្នុងសិក្ខាសាលាពិគ្រោះយោបល់លើសេចក្តីព្រាងបឋមផែនការមេសម្រាប់ការអភិវឌ្ឍវិស័យទេសចរណ៍ខេត្តមណ្ឌលគិរី ក្រោមអធិបតីភាពលោក ថោង ខុន រដ្ឋមន្ត្រីក្រសួងទេសចរណ៍ និង ឯកឧត្តម ស្វាយ សំអ៊ាង អភិបាលខេត្តមណ្ឌលគិរី ដែលបានប្រព្រឹត្តិទៅនៅផ្ទះសំណាក់ពេជ្រាដា ក្រុងសែនមនោមរ្យ ខេត្តមណ្ឌលគិរី នាព្រឹកថ្ងៃទី ១០ ខែ សីហា ឆ្នាំ ២០២០ ។
លោករដ្ឋមន្ត្រីបានបន្ថែមថា ដើម្បីសម្រេចបាននូវចក្ខុវិស័យស្របតាមគោលការណ៍ និង គោលដៅយុទ្ធសាស្ត្រ ផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី ត្រូវបានកំណត់ទិសដៅអាទិភាពចំនួន៦ រួមមាន ៖ ១-ការកំណត់តំបន់ទេសចរណ៍អាទិភាពសម្រាប់ការអភិវឌ្ឍ ២-ការអភិវឌ្ឍផលិតផលទេសចរណ៍ និងវិនិយោគក្នុងវិស័យទេសចរណ៍ ៣-ការពង្រឹងគុណភាពទេសចរណ៍ និងធនធានមនុស្សគាំទ្រ ៤-ការសិក្សាទីផ្សារ និង ផ្សព្វផ្សាយ ៥-ការអភិវឌ្ឍហេដ្ឋារចនាសម្ព័ន្ធអន្តរវិស័យគាំទ្រដល់ការអភិវឌ្ឍវិស័យទេសចរណ៍ ៦-ការសម្របសម្រួលការធ្វើដំណើរ ការតភ្ជាប់ និងការធ្វើសមាហរន្តណកម្មក្នុងក្របខណ្ឌជាតិ និង តំបន់ ។
លោករដ្ឋមន្ត្រីបានជំរុញដល់រដ្ឋបាលខេត្ត និង អ្នកពាក់ព័ន្ធទាំងអស់ ត្រូវអនុវត្តអោយបានខ្ជាប់ខ្ជួន នូវបទបញ្ជាររបស់រាជរដ្ឋាភិបាលក្នុងការទប់ស្កាត់ការកាប់ទន្ទ្រានដីរដ្ឋ ដីព្រៃ ដីកម្មសិទ្ធិឯកជន និងការជួយសម្រួលដល់ការចុះបញ្ជីរមណីដ្ឋានទេសចរណ៍សំខាន់ៗ អោយបានច្បាស់លាស់ និង បន្តទប់ស្កាត់ការរាតត្បាតនៃជំងឺឆ្លងកូវីដ-១៩ នៅតាមតំបន់ទេសចរណ៍ ក្លឹបកម្សាន្ត ខារ៉ាអូខេ ត្រូវតាមដានត្រួតពិនិត្យ អនុវត្តអោយបានត្រឹមត្រួវទៅតាមការណែនាំរបស់ក្រសួងសុខាភិបាល ៕ (កែសម្រួលដោយ ៖ ធីតា)
ចែករំលែកព័តមាននេះ