រាជធានីភ្នំពេញ ៖ ឆ្នាំ ២០២០ នេះអាចជាឆ្នាំប្រវត្តិសាស្ត្រនៃការធ្លាក់ចុះភ្ញៀវទេសចរបរទេសមកដល់ប្រទេសកម្ពុជា ក្នុងរយៈពេលជាង១ទសវត្សរ៍កន្លងទៅនេះ ។ ជាក់ស្ដែងក្នុងរយៈ៦ខែ ឬ១ឆមាសដំបូងនៃឆ្នាំ ២០២០នេះ…
រាជធានីភ្នំពេញ ៖ ឆ្នាំ ២០២០ នេះអាចជាឆ្នាំប្រវត្តិសាស្ត្រនៃការធ្លាក់ចុះភ្ញៀវទេសចរបរទេសមកដល់ប្រទេសកម្ពុជា ក្នុងរយៈពេលជាង១ទសវត្សរ៍កន្លងទៅនេះ ។ ជាក់ស្ដែងក្នុងរយៈ៦ខែ ឬ១ឆមាសដំបូងនៃឆ្នាំ ២០២០នេះ ភ្ញៀវទេសចរអន្តរជាតិមកប្រទេសកម្ពុជាបានធ្លាក់រហូតដល់៦៤,៦ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៩កន្លងទៅ ។ នេះបើតាមរបាយការណ៍របស់ក្រសួងទេសចរណ៍កម្ពុជា ។
តាមរបាយការណ៍ដដែលនេះបានបង្ហាញរយៈពេល៦ខែកន្លងទៅនេះ ភ្ញៀវបរទេសដែលបានមកដល់ប្រទេសកម្ពុជាមានចំនួនប្រមាណតែ១,១៨លាននាក់ប៉ុណ្ណោះ ពោលគឺបានធ្លាក់ចុះជាអវិជ្ជមានជាបន្តបន្ទាប់ចាប់ពីដើមឆ្នាំ២០២០នេះ ជាពិសេសចាប់តាំងពីខែមីនា២០២០ ដែលជាពេលជំងឺកូវី១៩ចាប់ផ្ដើមរាលដាលខ្លាំងនៅលើពិភពលោក ។
ក្នុងរបាយការណ៍នេះក៏បានបង្ហាញពីចំនួនភ្ញៀវបរទេសមកដល់កម្ពុជាតាមផ្លូវអាកាសនិងផ្លូវគោកផងដែរ ក្នុងនោះ រយៈពេល៦ខែដើមឆ្នាំ ភ្ញៀវបរទេសមកកាន់ទឹកដីកម្ពុជាតាមជើងហោះហើរមានចំនួនជាង ៦៨ម៉ឺន២ពាន់នាក់ បើធៀបនឹងរយៈពេលដូចគ្នាកាលពីឆ្នាំ ២០១៩មានការធ្លាក់ចុះ៧១ភាគរយ ក្នុងនោះដែរ ភ្ញៀវបរទេសមកដល់កម្ពុជាតាមព្រលានយន្តហោះអន្តរជាតិភ្នំពេញធ្លាក់ចុះ៦៤,៨ភាគរយ តាមព្រលានយន្តហោះអន្តរជាតិសៀមរាប ៧៤,៧ភាគរយ និងភ្ញៀវបរទេសមកដល់កម្ពុជាតាមព្រលានយន្តហោះអន្តរជាតិកងកេងព្រះសីហនុ ធ្លាក់ចុះ ប្រមាណ៨១,១ភាគយផងដែរ ។ ដោយឡែកភ្ញៀវអន្តរជាតិដែលមកកម្ពុជាតាមច្រកព្រំដែនគោក មានចំនួនប្មរាណ៤៤៨ពាន់នាក់ផងដែរធ្លាក់ចុះ៥០ភាគរយ និងព្រំដែនទឹក មានចំនួន៥១ពាន់នាក ធ្លាក់ចុះ៤០,៨ភាគរយធៀបនឹងរយៈពេលដូចគ្នាកាលពីឆ្នាំមុន ។
ក្នុងរបាយការណ៍ក៏បានបង្ហាញពីភ្ញៀវបរទេសចាកចេញពីកម្ពុជាប្រមាណ១,២៣លាននាក់ ធ្លាក់ចុះ៦០,៣ភាគរយ ខណៈភ្ញៀវទេសចរកម្ពុជាទៅក្រៅប្រទេសក៏មានការធ្លាក់ចុះប្រមាណ៦៩ភាគរយផងដែរ គឺមានចំនួន៣១១.១៦៧នាក់ ។
ក្នុងឆ្នាំ២០២០នេះរយៈពេល៦ខែភ្ញៀវទេសចរចិននៅតែឈរលំដាប់ថ្នាក់លេខ១ជាភ្ញៀវមកកម្ពុជាច្រើនជាងគេដែលមានចំនួនជាង២៧ម៉ឺន៥ពាន់នាក់ បើធៀបនឹងរយៈពេល៦ខែឆ្នាំ ២០១៩ ធ្លាក់ចុះប្រមាណ ៧៨,៧ភាគរយ ។
ដោយមើលឃើញថាវិស័យទេសចរណ៍នៅតែរងផលប៉ះពាល់ពីវិបត្តិនៃជំងឺរាតត្បាតកូវីដ១៩ រាជរដ្ឋាភិបាលកម្ពុជាបានសម្រេចលើកលែងពន្ធ ទៅលើវិស័យសណ្ឋាគារ ផ្ទះសំណាក់ ភោជនីយដ្ឋាននិងក្រុមហ៊ុនភ្នាក់ងារទេសចរណ៍ចំនួន២ខែបន្ថែមទៀតគឺនៅខែសីហា និងខែកញ្ញា ដើម្បីសម្រួលដល់ការចំណាយរបស់ម្ចាស់អាជីវកម្ម ដែលមិនអាចរកចំណូលបានក្នុងអំឡុងពេលកូវីដ១៩នេះ ។
មន្ត្រីជាន់ខ្ពស់នៃក្រសួងទេសចរណ៍កម្ពុជាលោកប៉ាក់ សុខុម រដ្ឋលេខាធិការបានលើកឡើងថា ឆ្នាំ២០២០នេះ កម្ពុជាព្យាករណ៍ពីការបាត់ចំណូលប្រមាណ៣ពាន់លានដុល្លារអាមេរិកពីវិស័យទេសចរណ៍ ហើយព្យាករណ៍ថាភ្ញៀវអន្តរជាតិមកដល់កម្ពុជាធ្លាក់ចុះប្រមាណ៧០ភាគរយបើធៀបនឹងឆ្នាំ២០៩១កន្លងទៅ ៕
ចែករំលែកព័តមាននេះ