សារព័ត៌មានបរទេស កាលពីថ្ងៃទី៨ មករា ២០១៥ ផ្សាយថា លោកអីុមរ៉ាន ខាន អាយុ៦២ឆ្នាំ មេដឹកនាំបក្សប្រឆាំង PTI និងជាអតីតកីឡាករ Cricket បានរៀបអាពាហ៍ពិពាហ៍ តាមទំនៀមទម្លាប់សាសនាអ៊ិស្លាម ជាមួយនាងរ៉េហាម ខាន ពិធីការិនីផ្នែកនយោបាយ អាយុ៤១ឆ្នាំ ។
លោកអីុមរ៉ាន ខាន ស្ថិតក្នុងឈុត Shewani ជាឈុតប្រចាំជនជាតិប៉ាគីស្ថាន ខណៈនាងរ៉េហាម ខាន ស្ថិតនៅក្នុងឈុតរ៉ូបវែង ពណ៌ស មានជាយក្រហម ។ កាលពីមុននេះលោកអីុមរ៉ាន ខាន ធ្លាប់រៀបការជាមួយនាងជេមីកា ខាន ជនជាតិអង់គ្លេស និងមានកូនប្រុស២នាក់ ។ ចំណែកនាងរ៉េហាម ខាន ក៏ធ្លាប់រៀបការដែរ និងមានកូន៣នាក់ តែបានលែងលះគ្នា ។
នាងរ៉េហាម ខាន ពីមុនធ្លាប់ធ្វើជាអ្នកប្រកាសព័ត៌មានពីការព្យាករអាកាសធាតុតាមទូរទស្សន៍ប៊ីប៊ីស៊ី ។
លោកអីុមរ៉ាន ខាន បានប្រកាសរៀបការ ក្រោយពេលផ្តួលរំលំរដ្ឋាភិបាល កាលពីខែសីហា ២០១៤ បន្ទាប់មកផ្អាកកិច្ចការនយោបាយនៅខែធ្នូ ក្រោយពេលក្រុមសកម្មប្រយុទ្ធតាលីបង់ ចូលកាន់កាប់សាលារៀនមួយ បណ្តាលឱ្យមានអ្នកស្លាប់១៥០នាក់ ។
ជនជាតិប៉ាគីស្ថានជាច្រើនលាននាក់ បានសម្តែងការពេញចិត្តចំពោះលោកអីុមរ៉ាន ខាន ដែលធ្វើឱ្យប្រទេសទទួលជើងឯកពិភពលោក លើកីឡា Cricket នៅឆ្នាំ១៩៩២ ទន្ទឹមនោះ លោកក្លាយជាបុគ្គលមានកេរ្តិ៍ឈ្មោះនៅលើពិភពលោក ៕
ចែករំលែកព័តមាននេះ