ខេត្តសៀមរាប ៖ លោកជំទាវ ខៀវ ស៊ីណា ជា ចាន់តូ អនុប្រធានកិត្តិយសសាខាកាកបាទក្រហមកម្ពុជា បានអំពាវនាវដល់ព្រះសង្ឃ ប្រជាពុទ្ធបរិស័ទ និងប្រជាជាពលរដ្ឋឲ្យបង្កើនការប្រុងប្រយ័ត្នខ្ពស់ថែមទៀត ក្នុងការការពារជំងឺកូវី១៩ កុំឲ្យមានរលកទី២ ខណៈដែលជំងឺជាសកលមួយនេះមិនទាន់ផុតរលត់ពីភពផែនដីយើងនោះ។
ការអំពាវនាវរបស់លោកជំទាវ ខៀវ ស៊ីណា ជា ចាន់តូ ដូចនេះក្នុងឱកាសដែលលោកជំទាវនិងក្រុមការងារនាំយកទៀនព្រះវស្សា គ្រឿងបរិក្ខារ ព្រមទាំងបច្ច័យមួយនួនទៅប្រគេនព្រះសង្ឃគង់ចាំព្រះវស្សាដល់វត្តចំនួន៣ ស្ថិតក្នុងខេត្តសៀមរាប កាលពីថ្ងៃទី២៧ មិថុនា ឆ្នាំ២០២០។
លោកជំទាវ ខៀវ ស៊ីណា បានទូលប្រគេនសង្ឃក៏ដូចប្រជាពុទ្ធបរិស័ទដែរថា ៖ ទោះបីនៅកម្ពុជា មិនមានការរីករាលដាលដល់សហគមន៍ និងគ្មានអ្នកបាត់បង់ជីវិតដោយសារជំងឺកូវីដ១៩ក៏ដោយ ដាច់ខាតយើងត្រូវរួមគ្នាការពារតាមការណែនាំរបស់ក្រសួងសុខាភិបាលកម្ពុជា និងចូលរួមទប់ស្កាត់កុំឲ្យមានការឆ្លងរាលដាលដល់មូលដ្ឋាន និងសហគមន៍។
លោកជំទាវបន្តទៀតថា ៖ បច្ចុប្បន្នជំងឺកូវីដ១៩ នៅតែបន្តរីករាលដាលលើពិភពលោកនៅឡើយទេ ចំណែកនៅកម្ពុជាប្រជាលរដ្ឋដែលឆ្លងសុទ្ធតែឆ្លងមកពីប្រទេសក្រៅតែប៉ុណ្ណោះ ហើយកាលថ្ងៃទី២៧ មិថុនា ឆ្នាំ២០២០ តាមសេចក្ដីប្រកាសព័ត៌មានរបស់ក្រសួងសុខាភិបាល មានអ្នកមកពីប្រទេសឥណ្ឌូនេស៊ី ៩នាក់ បានឆ្លងជំងឺកូវី១៩។
ប៉ុន្តែទោះជាយ៉ាងនេះក៏ដោយ ប្រជាជនកម្ពុជាយើងអាចធ្វើបុណ្យទានបានជាធម្មតា តាមប្រពៃណីដដែល ប្រការសំខាន់នោះគឺបងប្អូនប្រជាពលរដ្ឋទាំងអស់យកចិត្តទុកដាក់ និងអនុវត្តតាមការណែនាំរបស់ក្រសួងសុខាភិបាល គឺត្រូវលាងដៃឲ្យបានញឹកញាប់ជាមួយសាប៊ូ និងទឹកស្អាត ឬទឹកអាល់កុលលាងដៃ, ត្រូវខ្ទប់មាត់ និងច្រមុះនៅពេលក្អក ឬកណ្តាស់ ដោយប្រើក្រមា ឬក្រដាសអនាម័យ រួចយកទៅបោះចោលក្នុងធុងសំរាម ឲ្យបានត្រឹមត្រូវ, ជៀសវាងប៉ះពាល់ជិតស្និទ្ធជាមួយអ្នកដែលមានគ្រុនក្ដៅ ក្អក ឬផ្ដាសាយ ឬអ្នកជំងឺ, ពេលមិនទាន់លាងដៃសូមកុំប៉ះពាល់ភ្នែក ច្រមុះ ឬមាត់, បរិភោគអាហារ ដែលចម្អិនបានឆ្អិនល្អ, ស្វាគមន៍គ្នាដោយសំពះ ជំនួសការចាប់ដៃ។
ទាក់ទងការធ្វើបុណ្យទាននានាក្នុងព្រះពុទ្ធសាសនា ព្រះមហាវិមូលធម្ម ពិន សែម ចៅអធិការវត្តរាជបូណ៌ ក្នុងក្រុងសៀមរាប ដែលជាវត្តចំណាស់មួយនៅលើកទឹកដីវប្បធម៌ និងទេសចរណ៍នេះ មានសង្ឃដិកាឲ្យបានដឹងថា រាល់ការធ្វើបុណ្យផងទាំងពួង ត្រូវតែមានការយល់ដឹងពីតម្លៃនៃពិធីបុណ្យនីមួយៗឲ្យច្បាស់ ទើបជាការប្រពៃ និងទទួលបានកុសលតាមកម្លាំងសុទ្ធាតាមសេចក្ដីប្រាថ្នា។
សូមបញ្ជាក់ជូនថា ៖ នៅក្នុងខេត្តសៀមរាប មានវត្តព្រះព្រហ្មរ័ត្ន, វត្តរាជបូណ៌ និងវត្តប្រាសាទបាគង ត្រូវបានលោកជំទាវខៀវ ស៊ីណា ជា ចាន់តូ និងក្រុមការងារបានប្រគេននូវទៀនព្រះវស្សា១គូ អង្ករ មី ត្រីខ ទឹកដោះគោ ទឹកសុទ្ធ ទឹកក្រូចទឹកត្រី ទឹកស៊ីអ៊ីវ អំបិល ប៊ីចេង តែ កាហ្វេ និងបច្ច័យមួយចំនួនសម្រាប់ទ្រទ្រង់តម្រូវការរបស់ព្រះសង្ឃនៅក្នុងរយៈ៣ខែ ពេលចូលព្រះវស្សាផងដែរ៕ ដោយសហការ
ចែករំលែកព័តមាននេះ