រាជធានីភ្នំពេញ ៖ ក្រុមអ្នកដឹកទំនិញតាមប្រព័ន្ធអនឡាញចំនួនជាង១០០នាក់ ដែលភាគច្រើនជាក្រុមយុវជនបាននាំគ្នាធ្វើការតវ៉ានៅខាងមុខក្រុមហ៊ុន foodpanda ដោយទាមទារអោយក្រុមហ៊ុនរក្សាតំលៃឈ្នួលអោយនៅដូចដើម និងមានម៉ោងធ្វើការដឹកជញ្ជូនជាប្រចាំថ្ងៃ ក្រោយពីធ្វើការចរចាគ្នានៅមិនទាន់មានដំណោះស្រាយ ទើបនាំគ្នាឈប់ធ្វើការតទៅទៀត លុះត្រាណាតែមានដំណោះស្រាយនោះ។…
រាជធានីភ្នំពេញ ៖ ក្រុមអ្នកដឹកទំនិញតាមប្រព័ន្ធអនឡាញចំនួនជាង១០០នាក់ ដែលភាគច្រើនជាក្រុមយុវជនបាននាំគ្នាធ្វើការតវ៉ានៅខាងមុខក្រុមហ៊ុន foodpanda ដោយទាមទារអោយក្រុមហ៊ុនរក្សាតំលៃឈ្នួលអោយនៅដូចដើម និងមានម៉ោងធ្វើការដឹកជញ្ជូនជាប្រចាំថ្ងៃ ក្រោយពីធ្វើការចរចាគ្នានៅមិនទាន់មានដំណោះស្រាយ ទើបនាំគ្នាឈប់ធ្វើការតទៅទៀត លុះត្រាណាតែមានដំណោះស្រាយនោះ។
ការតវ៉ាខាងលើនេះដែរបានធ្វើឡើងកាលពីវេលាម៉ោង១១និង៣០នាទីព្រឹកថ្ងៃទី២២ ខែមិថុនា ឆ្នាំ២០២០ នៅចំណុចខាងមុខក្រុមហ៊ុន foodpanda ទីតាំងលេខ ៨៨ ផ្លូវលេខ ៣៨៤ ក្នុងសង្កាត់ទួលស្វាយព្រៃទី២ ខណ្ឌបឹងកេងកង។
តាមប្រភពពីអ្នកដឹកទំនិញឱ្យក្រុមហ៊ុនខាងលើម្នាក់បានប្រាប់ឱ្យដឹងថា ក្នុងពេលនេះដែរ ពួកគាត់ដែលជាក្រុមអ្នកដែលបានចុះឈ្មោះធ្វើការដឹកជញ្ជូនអោយក្រុមហ៊ុន foodpanda ដែលជាក្រុមហ៊ុនទទួលដឹកជញ្ជូនម្ហូបអាហារគ្រប់ប្រភេទតាមប្រព័ន្ធអនឡាញមានរហូតទៅដល់ចំនួនជាង១០០នាក់ បាននាំគ្នាធ្វើការតវ៉ាទាមទារទៅក្រុមហ៊ុនចំនួន២ចំណុច ក្នុងនោះទី១-សុំអោយក្រុមហ៊ុនរក្សាតំលៃឈ្នួលអោយនៅដូចដើមដដែល និងទី២-សុំអោយមានម៉ោងសំរាប់ពួកគាត់ទាំងអស់គ្នា គឺមានម៉ោងធ្វើការដឹកជញ្ជូនជាប្រចាំថ្ងៃ ។
តាមប្រភពដដែលបានបន្តថា ការតវ៉ានេះដែរ ពួកគាត់បានធ្វើការទាមទារទៅក្រុមហ៊ុនខាងលើនេះអស់រយៈពេល៣ថ្ងៃមកហើយ តែខាងក្រុមហ៊ុនហាក់ព្រងើយកន្តើយ និងមិនរកដំណោះស្រាយដល់ពួកគាត់ឡើយ ។
តាមប្រភពដដែលបានបន្តថា ដោយកាលពីមុន ដឹកក្នុងមួយជើងក្នុងចម្ងាយក្រោម១គីឡូម៉ែត្រ ចាប់ពី៧០សេនទៅ១ដុល្លារ និងចាប់ពីចម្ងាយលើសពី១គីឡូម៉ែត្រឡើងទៅ ក្នុងមួយជើងបានចំនួន២ដុល្លារ លុះមកដល់ប៉ុន្មានថ្ងៃកន្លងមកនេះ ទោះក្នុងចម្ងាយពី១គីឡូម៉ែត្រទៅដល់៤ ឬ៥គីឡូម៉ែត្រ ត្រូវបានក្រុមហ៊ុនទម្លាក់តំលៃមកសល់នៅត្រឹម៨០សេនប៉ុណ្ណោះ ហើយពេលខ្លះក៏មានដឹក និងពេលខ្លះក៏មិនមានម៉ោងដឹក ឱ្យបានត្រឹម ក៏នាំគ្នាអង្គុយលេងឥតប្រយោជន៍ប៉ុណ្ណោះ។
តាមប្រភពដដែលបានប្រាប់បន្តទៀតថា ដោយសារតែក្រុមហ៊ុន foodpanda បានធ្វើការបញ្ចុះតំលៃដឹកជញ្ជូនទាបជាងមុន និងម្យ៉ាងទៀតមិនមានម៉ោងធ្វើការដឹកជញ្ជូននោះ ទើបពួកគាត់បាននាំគ្នាព្យាយាមធ្វើការនិយាយដោះស្រាយជាមួយភាគីក្រុមហ៊ុន ដើម្បីជួយដោះស្រាយគ្នា តែខាងក្រុមហ៊ុនបែរជាមិនមាន ដំណោះស្រាយ និងនិយាយដដែលៗ ដោយឱ្យរង់ចាំ៣ថ្ងៃសិនដើម្បីរកដំណោះស្រាយជូន ទើបពួកគាត់សម្រេចធ្វើការតវ៉ានៅខាងមុខក្រុមហ៊ុនបែបនេះតែម្តង។
តាមប្រភពដដែលបានបន្តថា ក្នុងការចុះឈ្មោះធ្វើការដឹកជញ្ជូនក្នុងក្រុមហ៊ុននេះដែរ គឺខាងក្រុមហ៊ុនមិនមានអ្វីផ្តល់អោយឡើយ ដោយម៉ូតូជារបស់ផ្ទាល់ខ្លួន ចំណែកឯធុងដាក់អីវ៉ាន់ខាងក្រោយ និងអាវពាក់ក្នុងការបម្រើការងារ គឺជារបស់ទិញពីក្រុមហ៊ុនក្នុងតម្លៃចំនួន៣៥ដុល្លារ។ កាលពីពេលមុន ក្នុងមួយថ្ងៃពួកគាត់អាចដឹកបានលើសពី១០ម៉ោងឡើង និងបានប្រាក់ឈ្នួល១៥ដុល្លារ លុះមកដល់មួយរយៈនេះ ខាងក្រុមហ៊ុនក៏បានបន្ថយម៉ោងធ្វើការមកនៅត្រឹមតែ៥ទៅ៦ម៉ោង ម្យ៉ាងទៀតប្រាក់ឈ្នួលមិនថាជិត ឬឆ្ងាយក៏បញ្ចុះមកនៅត្រឹមតែ៨០សេន ក្នុងមួយជើង ។ មិនថាជិត ឬឆ្ងាយ ក្នុងមួយថ្ងៃអាចរកលុយបានត្រឹម៥ទៅ៨ដុល្លារប៉ុណ្ណោះ ដោយទូទាត់ថ្លៃចាក់សាំង និងហូបបាយអស់ទៅ ពួកគាត់នៅត្រឹមតែ១ម៉ឺនរៀលប៉ុណ្ណោះ និងមានការលំបាកយ៉ាងខ្លាំង។
ក្នុងការតវ៉ារបស់ក្រុមអ្នកដឹកជញ្ជូនទំនិញតាមប្រព័ន្ធអនឡាញទាំងជាង១០០នាក់នាព្រឹកនោះដែរ ខាងតំណាងក្រុមអ្នកដឹងកជញ្ជូនទំនិញចំនួន៥នាក់ ត្រូវបានភាគីខាងក្រុមហ៊ុន foodpanda អនុញ្ញាតអោយចូលទៅធ្វើការដោះស្រាយគ្នា «ដោយតម្រូវអោយរង់ចាំរយៈពេល៣ថ្ងៃទៀត និងបន្តរកដំណោះស្រាយគ្នាជាបន្តទៅទៀត» ។ ដោយសារគ្មានដំណោះស្រាយ ទើបក្រុមអ្នកតវ៉ាទាំងនោះក៏បាននាំគ្នាជិះម៉ូតូតវ៉ាបន្តទៅទៀត និងសម្រេចឈប់ធ្វើការអោយក្រុមហ៊ុនមួយនេះចាប់ពីពេលនេះតទៅផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ