រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានថ្លែងនៅព្រឹកថ្ងៃទី ២២ ខែមិថុនានេះថា ដោយសារតែវិបត្តជំងឺឆ្លងកូវីដ ១៩ បានដាក់ឲ្យសេដ្ឋកិច្ចកម្ពុជាយើងឲ្យស្ថិតក្នុងស្ថានភាពមិនច្បាស់លាស់…
រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានថ្លែងនៅព្រឹកថ្ងៃទី ២២ ខែមិថុនានេះថា ដោយសារតែវិបត្តជំងឺឆ្លងកូវីដ ១៩ បានដាក់ឲ្យសេដ្ឋកិច្ចកម្ពុជាយើងឲ្យស្ថិតក្នុងស្ថានភាពមិនច្បាស់លាស់ ហើយបង្កជាវិបត្តិសេដ្ឋកិច្ចពិភពលោកនិងតាមប្រទេសនីមួយៗ ជាក់ស្តែងសម្រាប់កម្ពុជាផ្ទាល់ខាងធនាគារអភិវឌ្ឍន៍អាស៊ី ហៅកាត់ថា (ADB) ក៏ដូចជាមូលនិធិរូបិយវត្ថុអន្តរជាតិ (IMF) សេដ្ឋកិច្ចកម្ពុជាអាចនឹងធ្លាក់ចុះក្នុងរង្វង់ -១,៥ ទៅដល់ – ២,៩ ភាគរយ ខណៈភាគីរដ្ឋាភិបាលផ្ទាល់ការ វាយតម្លៃភាពប្រាកដប្រជាគឺអាចនឹងធ្លាក់ចុះ -១,៩ ភាគរយ នៅក្នុងឆ្នាំ ២០២០ នេះក៏ពិតមែន តែការអភិវឌ្ឍន៍ចាំបាច់សំខាន់គឺត្រូវតែបន្ត ដូចជាការកសាងនូវព្រលានយន្តហោះជាដើម ។
សម្តេចបានប្រកាសបែបនេះជាឱកាសអញ្ជើញពិនិត្យដំណើរការសាងសង់អាកាសយានដ្ឋានអន្តរជាតិភ្នំពេញថ្មី នៅខេត្តកណ្តាល ព្រឹកថ្ងៃចន្ទ ទី២២ មិថុនា ដែលក្នុងនោះសម្តេចតេជោបានបញ្ជាក់ថា ដូច្នេះឆ្នាំនេះ ប្រាកដជាមានប្រទេសតិចណាស់ដែលនឹងមានសេដ្ឋកិច្ចព្យាករណ៍ថានឹងវិជ្ជមាន ខណៈប្រទេសច្រើនណាស់នឹងមានសេដ្ឋកិច្ចអវិជ្ជមាន គឺធ្លាក់ បានសេចក្តីថា ដក (-) ដូចជាសិង្ហបូរី ប្រកាសថាសេដ្ឋកិច្ចប្រទេសខ្លួននឹងធ្លាក់ដល់ទៅ – ៧ ភាគរយ ខណៈមានប្រទេសផ្សេងទៀតក៏បានព្យាករណ៍ថាសេដ្ឋកិច្ចប្រទេសខ្លួននឹងអាចធ្លាក់ដល់ -១០ ភាគរយ ។
សម្តេចតេជោ បានហៅការព្យាករណ៍សេដ្ឋកិច្ចឃើញសញ្ញា ( -) នេះយ៉ាងដូច្នេះថា «ដែលនេះជាស្ថានភាពមិនធ្លាប់មាននៅកម្ពុជានៅក្នុងរយៈពេលជាង ២០ ឆ្នាំ ។ ប៉ុន្តែសួរថាបើអ្នកឯងមានវិបត្តិសេដ្ឋកិច្ចអត់ឡើងអញ្ចឹង តើព្រលានយន្តហោះចាំបាច់ត្រូវការកសាងទេ ? ម៉េចក៏មិនទុកលុយយកទៅធ្វើអីផ្សេង ?» ។
ឆ្លើយតបទៅនឹងការរិះគន់ថា បើសិនសេដ្ឋកិច្ចកម្ពុជាត្រូវបានព្យាករណ៍ថានឹងឃើញសញ្ញាអវិជ្ជមាន (-) ទៅហើយ ហេតុអីចាំបាច់សាងសង់ព្រលានយន្តហោះនោះ សម្តេចនាយករដ្ឋមន្ត្រីបានបន្តថា «សូមបញ្ជាក់ជូន ក្រុមហ៊ុននៅកម្ពុជាបច្ចុប្បន្ននេះមិនទាន់មានក្រុមហ៊ុនណាមួយប្រកាសក្ស័យធនទេ ហើយប្រកាសអាសន្នអំពីការខ្វះទុននិងធនដែរទៅលើការវិនិយោគ ។ យើងឧទាហរណ៍នៅទីកន្លែងនេះ ត្រូវការវិនិយោគ ១៥០០លានដុល្លារ ក្រុមហ៊ុនមួយនេះអត់ទាន់និយាយពីរឿងខ្វះលុយ ហើយផ្អាកដំណើរការសាងសង់ទេ» ។
សម្តេចបានបញ្ជាក់ថា លោកបានជួបក្រុមហ៊ុនដទៃទៀត ដូចជាក្រុមហ៊ុនប៉េង ហួត ក្រុមហ៊ុន ជីព ម៉ុង ជាដើម ដែលកំពុងតែបើកការដ្ឋានសាងសង់ទាំងអស់ ។ ពីមុនធ្លាប់សាងសង់យ៉ាងម៉េច នៅតែសាងសង់ដដែល ។ សម្តេចតេជោបញ្ជាក់បន្ថែមថា តាមរយៈការសាកសួរថ្នាក់ដឹកនាំក្រុមហ៊ុនទាំងនោះបានឲ្យដឹងថា ការលក់ផ្ទះគឺនៅលក់ដាច់ដដែល គ្រាន់តែទាបជាងមុនបន្តិច។ ជាក់ស្តែងការលក់ផ្ទះក្នុង ខែ ៥ នេះគឺតួលេខហក់ឡើងវិញ ដែលកាលពី ខែ ៤ តួលេខនៃការលក់ធ្លាក់ចុះបន្តិច អញ្ចឹងត្រង់នេះគឺមានន័យថាបងប្អូននៅមានលទ្ធភាពជាវផ្ទះនៅឡើយ ៕
ចែករំលែកព័តមាននេះ