ខេត្តត្បូងឃ្មុំ ៖ ភ្លៀងធ្លាក់មេធំលាយឡំដោយខ្យល់កន្ត្រាក់បានធ្វើឲ្យលំនៅដ្ឋានរបស់ប្រជាពលរដ្ឋរលំទាំងស្រុងចំនួន២ខ្នង និង៦ខ្នងទៀតរបើកដំបូល តែមិនមានប្រជាពលរដ្ឋណាម្នាក់រងគ្រោះថ្នាក់ដល់ជីវិតនោះទេ ។
ហេតុការណ៍ខាងលើនេះបានកើតឡើងកាលពីយប់ថ្ងៃទី២០ មិថុនា ឆ្នាំ២០២០ នៅភូមិថ្មដារ ឃុំជាំក្រវៀន ស្រុកមេមត់ ខេត្តត្បូងឃ្មុំ ។
លោកវរសេនីយ៍ឯក ហុង គឹមហឿន អធិការនគរបាលស្រុកមេមត់ ប្រាប់ឲ្យដឹងថា នៅក្នុងរដូវវស្សាអោយតែមានភ្លៀងលាយឡំដោយខ្យល់កន្ត្រាក់មកលើស្រុកមេមត់នាពេលកន្លងមក តែងតែបង្កឲ្យមានខូចខាតក្នុងនោះរួមមានដូចជាបាក់ដើមកៅស៊ូ របើកដំបូលផ្ទះ និងរលំផ្ទះជាដើម។
អធិការនគរបាលស្រុកមេមត់បានប្រាប់បន្តថា ចំពោះគ្រោះធម្មជាតិដោយភ្លៀងធ្លាក់លាយឡំខ្យល់កន្ត្រាក់ដែលបានកើតឡើងនាថ្ងៃកើតហេតុខាងលើនេះ បណ្ដាលឱ្យខូចខាតផ្ទះសរុបចំនួន៨ខ្នង ក្នុងនោះខូចខាតទាំងស្រុងចំនួន២ខ្នងរួមមាន ១-ឈ្មោះយាន តែ ភេទប្រុស អាយុ៣២ឆ្នាំ និង២-ឈ្មោះ មិះ ជាតិ ភេទប្រុស អាយុ៣៤ឆ្នាំ ។
រីឯផ្ទះចំនួន៦ខ្នងទៀតដែលរងខូចខាតរបើកដំបូលដូចជា ១-ឈ្មោះ ងុិល មិះ ភេទប្រុស អាយុ៦៣ឆ្នាំ (របេីកដំបូលប្រក់ក្បឿងចំនួន២០០សន្លឹក) ២-ឈ្មោះ ងុិន យាន ភេទប្រុស អាយុ៥៥ឆ្នាំ (ខូចខាតដំបូលក្បឿងអស់៣០០សន្លឹក) ៣-ឈ្មោះ កាច ខ្លោត ភេទប្រុស អាយុ៤៩ឆ្នាំ (ខូចខាតដំបូលក្បឿងអស់១២០សន្លឹក) ៤-ឈ្មោះ ងួន ស៊ួន ភេទប្រុស អាយុ៤០ឆ្នាំ (ខូចខាតដំបូលដែកអស់១២សន្លឹក) ៥-ឈ្មោះ សុិក ទួច ភេទប្រុស អាយុ៥០ឆ្នាំ (ខូចខាតដំបូលក្បឿងអស់១៥០សន្លឹក) និង៦-ឈ្មោះ ហ៊ុន លី ភេទស្រី អាយុ៥៤ឆ្នាំ
(ខូចខាតដំបូលដែកអស់៦សន្លឹក) នៅក្នុងហេតុការណ៍នេះមិនបណ្ដាលឲ្យនរណាម្នាក់រងគ្រោះថ្នាក់ដល់ជីវិតនោះទេ។
សូមបញ្ជាក់ថា តាមការណែនាំរបស់លោកឧត្តមសេនីយ៍ទោបែន រ័ត្ន ស្នងការនគរបាលខេត្តនាពេលកន្លងមក ឲ្យតែមានគ្រោះធម្មជាតិកើតឡើងមិនថា គ្រោះធម្មជាតិដែលកើតឡើងដោយសារភ្លៀងនិងខ្យល់កន្ត្រាក់ ឬទឹកជំនន់ទន្លេមេគង្គ និងហេតុការណ៍អ្វីផ្សេងៗទៀតដែលកើតឡើង គឺកម្លាំងសមត្ថកិច្ចតែងតែចុះអន្តរាគមន៍ជួយដល់ប្រជាពលរដ្ឋជាប្រចាំផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ