រាជធានីភ្នំពេញ ៖ ក្រោយពីរងបណ្តឹងពីបទបរិហារកេរ្តិ៍ជាសាធារណៈ ដែលដើមបណ្តឹងគឺជាភរិយាបច្ចុប្បន្នរបស់អតីតប្តីរបស់តារាចម្រៀងស្រីម៉េង កែវពេជ្ជតានោះ បានធ្វើឲ្យមហាជនចាប់អារម្មណ៍កាន់តែខ្លាំងឡើងចំពោះរឿងរ៉ាវពីឈឺចាបរបស់តារាចម្រៀងជួរមុខនៅកម្ពុជា ដែលកន្លងមកនាងបានអះអាងថានាងសុទ្ធចិត្តឱបក្រសោបកូនទាំងពីរ និងសុទ្ធចិត្តបាត់បង់ទ្រព្យសម្បត្តិញើសឈាមរកបានកន្លងមកក្រោយការលែងលះ ។
តែបើក្រឡេកទៅមើលពាក្យបណ្តឹងដែលប្តឹងអ្នកនាងម៉េង កែវពេជ្ជតានោះ គឺមហាជននិងអ្នកគាំទ្របានបង្ហាញនូវការចាប់អារម្មណ៍ខ្លាំងបំផុតគឺចំនួនទឹកប្រាក់ដែលដើមបណ្តឹង អ្នកនាង រស់ សោភ័ណ្ឌ អាយុ២៨ ឆ្នាំដែលជាភរិយាបច្ចុប្បន្នរបស់លោក មួង ឃីម ទាមទារទៅវិញទេ ។
នៅក្នុងពាក្យបណ្តឹងស្ត្រីឈ្មោះ រស់ សោភ័ណ្ឌ បានសំណូមពរព្រះរាជអាជ្ញាឲ្យចោទប្រកាន់តារាចម្រៀងស្រីរូបនេះ និងគូកនតាមច្បាប់ ព្រមទាំងទាមទារសំណងជំងឺចិត្ត មួយរយរៀល (១០០រៀល) និងឲ្យអ្នកនាងម៉េង កែវពេជ្ជតា ប្រកាសសុំទោសលើបណ្តាញសង្គម Facebook ជាសាធារណៈ» ។ ក្នុងពាក្យបណ្តឹងបានបញ្ជាក់ថា កាលពីថ្ងៃទី១០ ឧសភា ចាប់ពីវេលាម៉ោងជាង ៦រសៀលរហូតដល់ម៉ោងជាង១០កន្លះជាង «អ្នកនាងម៉េង កែវពេជ្ជតា និងគូកនបាននិយាយវាយប្រហារនាងខ្ញុំ ព្រមទាំងក្រុមគ្រួសារតាមបណ្តាញសង្គម Facebook Page Meng Keo Pichenda – ពេជ្ជតា … ដូចជាចោទថា «សោ ភ័ណ្ឌ ជាស្រីរបស់លោកឯង ដែលលោកឯងការក្រោយនេះ ។ លោកឯង នៅមានរឿងច្រើនទៀត! លោកឯង ស្គាល់មីមួយហ្នឹងតាំងពីជំនាន់ណា? តាំងពីរតនៈនៅក្នុងពោះ ខ្ញុំការហើយបានពីរខែ ខ្ញុំតាមទាន់លោកឯង» ។
មតិមហាជនបានបសម្តែងថាសំណងជំងឺចិត្តទាមទារត្រឹម ១០០រៀល ហាក់ជារឿងមិនធ្លាប់មាន តែចំណុចសំខាន់នៃពាក្យបណ្តឹងគឺការទាមទារ អ្នកនាងម៉េង កែវពេជ្ជតា ប្រកាសសុំទោសលើបណ្តាញសង្គម Facebook ជាសាធារណៈ ដែលនោះគឺជាការទាមទារដែលសំខាន់ជាងទឹកលុយនោះ ។
ចំណែកអ្នកនាងម៉េង កែវពេជ្ជតាវិញនៅព្រឹកថ្ងៃទី ៤ មិថុនានេះបានផ្ញើសារទៅកូនប្រុសសំណព្វចិត្តដែលកំពុងសិក្សានៅក្រៅប្រទេស ឲ្យតាំងចិត្តឲ្យមាំបន្តការសិក្សា ព្រោះថាតាំងពីដើមរៀងមក គឺឪពុករូបនេះមិនដែលយកចិត្តទុកដាក់លើកូនៗឡើយ ។
អ្នកនាងបានបញ្ចេញសារបង្កប់នូវក្តីបារម្ភចំពោះកូនប្រុសយ៉ាងដូច្នេះថា «ចំពោះកូនៗ! កូនសម្លាញ់! ម៉ែដឹងថាពេលនេះកូនពិបាកចិត្ត តែម៉ែសូមអោយកូនកុំខូចចិត្តថ្វី ព្រោះគេមិនគិតកូនយូរហើយ ។ កុំយកទុកក្នុងចិត្តអីណាមាសម្តាយ។ អ្វីដែលកូនត្រូវគិត គឺកូនៗត្រូវខំរៀន និងប្រព្រឹត្តខ្លួនជាកូនល្អ មនុស្សល្អទៅអនាគត ។ ចំពោះម៉ែ ចូរកូនកុំបារម្ភ។ ដើម្បីយុត្តិធម៌ ភាពស្អាតស្អំ និងស្នាមញញឹមកូនៗ ម៉ែតមិនខ្លាចនឹងឈឺចាប់ទេ ម៉ែមិនអីទេ!» ៕
ចែករំលែកព័តមាននេះ