សហរដ្ឋអាមេរិក ៖ យោងតាមរ៉យទ័រថា ក្រសួងការពារប្រទេសអាមេរិកប្រកាសនាយប់ថ្ងៃទី២មិថុនាថា បានដាក់ពង្រាយទាហាន១.៦០០នាក់ ក្នុងតំបន់ក្រុងវ៉ាស៊ិនតោន ខណៈរដ្ឋធានីសហព័ន្ធនោះក៏ដូចជាទីក្រុងសំខាន់ៗរបស់សហរដ្ឋអាមេរិក ជាទីលាននៃបាតុកម្មហិង្សា បរិហារអំពើហិង្សាដ៏សាហាវរបស់ប៉ូលិស។
ការប្រកាសនោះកើតមានបន្ទាប់ពីប្រធានាធិបតីលោកដូណាល់ត្រាំថ្លែងនាថ្ងៃទី១មិថុនាថា លោកនឹងដាក់ពង្រាយកងទ័ពនៅក្រុងវ៉ាស៊ិនតោន និងត្រៀមធ្វើដូចគ្នានោះក្នុងបណ្ដាទីក្រុងដែលអាជ្ញាធរមូលដ្ឋាន មិនអាចត្រួតត្រា លើការបះបោរនិងការប្លន់បាន ដែលចលនាតវ៉ាកើតមានក្រោយការស្លាប់ របស់ជនស្បែកខ្មៅម្នាក់ ពេលប៉ូលិសចាប់ខ្លួននៅក្រុងមីននីប៉ូលីស ។
ក្នុងសេចក្ដីប្រកាសមួយអ្នកនាំពាក្យមន្ទីរប៉ង់តាហ្កោនបញ្ជាក់ថា កងទាហានត្រូវដាក់ពង្រាយតាមបណ្ដាមូលដ្ឋានយោធានៃតំបន់រដ្ឋធានី តែមិនមែនក្នុងទីក្រុងវ៉ាស៊ិនតោនផ្ទាល់ឡើយ។
អ្នកនាំពាក្យរូបនោះថ្លែងទៀតថា កងទ័ពស្តិតក្នុងស្ថានភាពប្រុងជើងការខ្ពស់ តែមិនចូលរួមក្នុងប្រតិបត្តិការរបស់អាជ្ញាធរស៊ីវិលឡើយ៕ ដកស្រង់ចេញពីវេបសាយ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ